Miqueas 7
7
Boloben xcuxlejal Israel
1¡Obol jba! Jich c'oemon ya caiy te bit'il ya jle xan
te c'alal c'axemix a te bila la yich' tulele;
ma ba ya jtaix sit ts'usub ni sit higuera,
ja'ic te bi ya smulan co'tan swe'elinel xane.
2Ma'yuc ya xjilix ta balumilal winiquetic te toj ayique,
ni ja'uc te jun yo'tanic ta stojol Dios.#Sal 12.1.
Spisilic ya smaliyic te bi ora ya xju' yu'unic uts'inwanej;
juju-jtul ya spasbey sbaic syaquilic.
3Ja'ic maestroetic yu'un spasel te bila amene.
Te ajwaliletic ya sujawanic ta sc'anel majt'anil.
Te juecetic ya sc'an smajt'an taq'uinic ta muquen.
Te mach'atic tulanic ya spasic te bila ya sc'an yo'tanic
soc ya sjowtesic te lume.
4Te mach'atic lec yilel jich c'oemic te bit'il ch'ix;
te mach'a ich'bil ta muq'ue, jich nix c'oemic.
Ja'uc me to, ya sta sc'aalelal te ya yich' ilel te at'elile,
ja' te bi c'aalil la yalbat te j'il-q'uinale.
Ja' yu'un jich ya xcajic ta soquetel.
5Ma xach'uunbey sc'op te apat-axujq'ue,
ni ma me smuc'ulin awo'tan te ajoye;
ya me atsajtay aba te ya xc'opojat soc te awiname.
6Melel te nich'aniletic ma lecuc yo'tanic
yu'un te sme'-statique.
Te ach'ixetic ya stoy sbaic ta stojol te sme'ique.
Te alibaletic ya stoy sbaic ta stojol te yalib-me'elique.
Te scontro juju-jtul, ja' nix te mach'a ay ta yutil snae.#Mt 10.35-36; Lc 12.53.
7Ja'uc me to, ya jmaliy te Cajwale;
ja' ayon ta smaliyel jtuquel te Dios te Jcoltaywanej cu'une,
melel ya yaiybon stojol jc'op stuquel.
Tsalaw yu'un Israel
8Ja'at nación te jcontroate,
ma me binuc nax awo'tan yu'un te jwocole.
Manchuc me yalon, ya me xjajch'on;
manchuc me la sjoytayon te ijc' q'uinal,
te Cajwal ja' saquil q'uinal cu'un stuquel.
9Jtaoj jmul ta stojol te Cajwale,
jich yu'un ya me xc'ax cu'un te yilimbae.
Ja'uc me to, ya me stabon te bi swentailuc
soc toj me ya xchajbanon.
Te Cajwaltic ya me yic'on bael ta saquil q'uinal,
ya me yac'bon quil te tsalaw yu'une.
10Ya me yil te jcontro,
soc ya me xpotsot ta q'uexlal yu'un.
Melel la yalbon:
—¿Banti ay te Ajwalil te Dios awu'une?#Sal 79.10; Jl 2.17.
—xi' ta yalel.
Ja'uc me to, ta ora yo'tic ya me jmulan yilel
te ya yich' teq'uel jichuc ajch'al ta calleetic.
11Jerusalén, ya me xc'ot sc'aalelal
te ya yich' pasel xan te ajoyob ts'ajc'ule,
soc ya me xmuc'ubat xan bael.
12Ya me xc'ot sc'aalelal
te ya xtalic ta atojol spisil ta bayuc:
c'alal ta Asiria ja' to me ta Egipto,
c'alal ta muc'ja' Nilo ja' to me ta muc'ja' Éufrates,
c'alal ta mar ja' to ta yan mar,
c'alal ta wits ja' to ta yan wits.
13Te q'uinal ya xc'atp'uj ta jochol taquin q'uinal
ta scaj smul te yajwal,
ta scaj te bila amen spasojique.
14Cajwal, canantaya te lum awu'une,
ja' te chijetic te awu'unineje,
te pijt'em stuquelic ta ja'maltique,
te joytaybilic yu'un te buen lequil q'uinale.
Jich me x'awic'tilay bael
ta aquiltic ta Basán soc ta Galaad,
jich te bit'il la apas ta nameye.
15Pasbeya yilic jchajp at'elil,
jich bit'il te bi c'aalil la aloq'ues tel ta Egipto.
16Ac'a me yilic te yantic nacionetic,
soc jich me ya xpotsotic yu'un te q'uexlale,
manchuc me ay yipic te spisil ya xju' yu'un ta sc'opique.
Jichuc ac'a jiluquic te bit'il uma' soc cojc'.
17Jich me ac'a sleq'uic tan te bit'il chanetic
soc jich bit'il yantic te bitic staslajanic ta beele.
Yacuc me ta nijq'uel ya xloq'uic tel ta spechech,
soc nojeluc me xiwel ta yo'tanic ya xtalic ta atojol, Cajwal Dios cu'untic.
Dios ya spasbey perdón te lum yu'une
18Ma'yuc yan Dios jich te bit'ilate,
melel ya apasbey perdón yu'un te bila amen spasojique,
soc ya ach'aybey ta awo'tan stoybail te lum te jilem xan jtebuque.
Te ja'at ya awac'botic quiltic te xc'uxul awo'tan;
soc ma'yuc ta awo'tan sbajt'el q'uinal te awilimbae.
19Na'botic xan yo'bolil jbatic ta yan buelta;
soc ac'a yich' muquel awu'un te bila amen jpasojtique.
Ch'ojbotic coel jmultic ta sc'ubulil te mare.
20Cajwal, junuc me awo'tan soc ayuc me xc'uxul awo'tan,
te jich nix jamal la awal ta namey
ta stojol te antiguo jme'-jtatic ja' te Abraham soc Jacob.#Gn 12.1-3; 17.6-8; 28.13-15; Lc 1.55,73.
Currently Selected:
Miqueas 7: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.