Nahúm 3
3
1¡Ya me awil awocol, ja'at lum te jmalch'ich'ate!
Nojel lot ta awo'tan soc uts'inwanej;
te uts'inwanej ya apasique, ma'yuc slajibal.
2Tulan ya xc'opoj te chicotee,
xnilet nax me ta c'op te carretaetique.
Xpumlajan ta animal te caballoetique,
ya xwilic te carretaetique.
3Pajal nax ya xbeen ta tulan te caballoetique.
Ya xtil puñaletic,
ya xojobaj lanzaetic.
Bayal ta jmil j'ejch'enetic,
bayal ta jbus te mach'a ya xlajique.
Ma xju' ta ajtayel te mach'a lajemique.
Te ants-winiquetic tey ya sc'ojch'in sbaic a.
4Ta spisil, ta scaj smulwej te jmulawil antse.
Te jmulawil ants lec ta ilel soc buen t'ujbil,
maestra yu'un j'ac'-chamel, soc jbolteswanej.
Ta swenta smulwej soc te bila snopoj spasel,
ya slo'lay a te lumetic soc te nacionetique.
5Te Cajwaltic te Spisil ya xju' yu'une,
tulan ya yal:
—Li' ayon to ta jcontroinbelat.
Ya jolbat moel atsec c'alal ta awelaw,
swenta yu'un ya me yilbat abaq'uetal te nacionetique,
ya me yilbat te bila ya xq'uexawat yu'une. 6Soc ya me jch'oj tel ta atojol te bila ya x'ijc'ubat yu'une;
ya cac' bolobuc ac'oplal soc ya cac'at ta tse'luyel ta comonsitil.
7Spisilic te mach'a ya yilate, ya me x'anic bael awu'un,
jich me ya yalic:
“Te Nínive jinotix.
¿Mach'a ya sna'bey yo'bolil sba?
¿Banti ya sta mach'a ya xmuc'tesbot q'uinal yaiy?” xi' me ac'oplal.
8“¿Yu'un bal ya acuy te c'axem jich alequil a te bit'il lum Tebas?
Ja' te lum ay ta sti'il muc'ja' Nilo
te joytaybil yu'un bayal ja'e.
Ta swenta ja' staoj yip, soc ts'ajc' c'oem yu'un.
9Te Etiopía soc Egipto ja' tulanil ts'ajc' c'oem
yu'un te ma'yuc ta ochintayel;
te mach'atic ayic ta Fut soc te mach'atic libiaetic,
ja'ic te xchapoj sba soque.
10Ja'uc me to, te yajwal Tebas ic'ot bael ta mosoil;
te alaletic yu'unic la yich'ic majel ta lum ta bay xujc' calleetic.
La spasbeyic snumeroil ta na'el te mach'atic muc' sc'oplalique;
te jtsobwanejetic yu'unic la xchuquic bael ta cadena.
11Ja' nix me jich te ja'at lum Nínive, ya me syacubtesat;
ch'ayematix ta q'uinal yu'un, ya ale bay ya anac' aba,
ya me ale awanjib yu'un acontro.
12Spisil te tulanil ts'ajq'uetic awu'un jich c'oemic
bit'il higueraetic te nojel nax yuninal site,
ya xlilajic coel teme ya yich' yuq'uilayel te ste'ele,
ya xc'ot ta ye te mach'a ya sc'an slo'e.
13Te soldadoetic awu'un antsetic yilel.
Te yochibal sts'ajc'ul te lum jamaliquix,
ya x'ochiquix tel te acontroe;
te c'ajq'ue ya slajin ta chiq'uel te sc'atal taq'uinale.
14Chajbana awa'al, swenta yu'un ya xju' xcuxinat a
te bit'il macbilat ta yutil lum,
tulantesa xan ta bay ya acoltay aba ta ac'opique.
Ochan ta ajch'al,
wots'a ta teq'uel te ajch'ale,
tsacbeya smoldeil te ladrilloe.
15Tey ya xlajat ta c'ajq'uel a;
jc'axel me ya smilat soc te puñale,
jich c'oem bit'il tsobol c'ulub.
Esmajan jichuc c'ulubetic.
Esmajan jich bit'il te yaxal c'ulubetique.
16Te jchonbajeletic awu'une la yesmantes sbaic,
bayal yajtalulic, jich bit'il eq'uetic ta ch'ulchan.
(Te c'ulube ya sulin jilel snujc'ulel soc ya xwil bael.)
17Te gobernadoretic awu'une jich c'oem bit'il c'ulubetic;
te mach'atic ay ta swentaic sleel te mach'a ya yac' sbaic ta soldadoil
jich c'oemic te bit'il tocal ta ilel melel bayalic.
C'alal ya sicub te q'uinale, ya yac' sbaic ta pajc';
c'alal ya xloc' tel te c'aale, ya xbajt'ique;
ma'yuc mach'a ya sna' te banti ay.
18“Mero wayajtic te jcanan-chijetic awu'un,
ja'at te muc' ajwalilat yu'un Asiria.
Te ajo'tac ta ajwalil ya xcux yo'tanic,
te soldadoetic awu'un pujq'uemic ta beel ta witstiquil,
ma'yuc mach'a ya stsob tel.
19Ma me ayuc poxil yu'un te awejch'ene;
te ac'a'ele ma xju' ta poxtayel.
Spisilic te mach'atic ya yaiybat stojol te awocole
ya spac' sc'abic, ya xbujts'naj yo'tanic yu'un.
Melel ¿ay bal mach'a ma ba woclaj yu'un te bila amen apasojete ma'yuc slajibale?
—xi' te Cajwaltique.
Currently Selected:
Nahúm 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.