San Lucas 6:27-49

“Yan te ja'ex te ya awaiybonic stojol te jc'ope, ya calbeyex: C'ux me xawaiy te acontroe. Soc pasbeyaic bila lec te mach'atic ya yilayexe. C'anbeya bendición te mach'a ya sbolc'optayexe, soc c'oponbeyaic Dios te mach'a ya stoybac'optayexe. Teme ay mach'a ya smajbat te achoe, ac'beya smajbat xan te yan mejch'e. Soc teme ay mach'a ya spojbat te ac'u'e, ac'beya te anajt'il-c'u'e, ma me ayuc bila ya awal yu'un. Spisil mach'a ay bila ya sc'anbeyex, ac'beyaic. Soc teme ay mach'a ya spojbeyex te bila ay awu'unique, ma me x'ac'anbeyic sujt'el. Te bi ya sc'an awo'tanic te ya spasbotex yu'un te yane, jich me xapasbeyic uuc. “Teme jip nax c'ux ya awaiyic te mach'atic c'ux ya yaiyexe, ¿mach'a ya yalbeyex lec ac'oplalic yu'un? Melel jich ya spasbey sbaic uuc te jyanlumetique. Teme ja' nax ay bila lec ya apasbeyic te mach'atic ay bila lec ya spasbeyexe, ¿mach'a ya yalbeyex lec ac'oplalic yu'un? Melel jich ya spasbey sbaic uuc te jyanlumetique. Soc teme ja' nax ay bila ya awac'beyic smajan te mach'atic ay bila ya yac'bat ta majanele, ¿mach'a ya yalbeyex lec ac'oplalic yu'un? Melel te jyanlumetique, jich ya yac'bey sbaic ta majanel uuc te bila ay yu'unique, yu'un ya sna' te ts'acal ya sujt'esbot sjelol yu'une. Yan te ja'exe, c'ux me xawaiy ta awo'tanic te mach'atic ya scontroninexe. Pasbeyaic bila lec soc ac'beya smajanbat te bila ay awu'unique. Ma me x'ac'anbey sjol. Jich me bayal awutsilal ya awich'ic yu'un, soc jich me yal-snich'an ya xc'oex te ch'ul Dios te ay ta ch'ulchane. Melel ya xc'uxtay te mach'atic ma sna'ic yalel wocole soc te mach'atic amen yo'tanique. Jich yu'un te ja'exe aiyaic me c'uxtaywanej uuc jich bit'il ya yaiy c'uxtaywanej te Atatique. “Ma me xalebey smul te yane, swenta yu'un jich ma ba ya yich'beyex ac'opic te Diose. Ma me xawac'beyic castigo yu'un smul te yantique, jich ma ba ya yac'beyex castigo yu'un amulic uuc te Diose. Pasaic perdón, jich me ya spasbeyex perdón uuc te Diose. Ac'beyaic te bila ma'yuc yu'un te yantique, jich me ya yac'beyex uuc te Diose: Lec p'isbil, tenbil ta nojesel ta lec, yuq'uilbil, xt'oquet nax me te ya scojc'an coel ta yawile. Te jich yipal ya ap'isbeyic te yantique, jich nix yipal ya sp'isbeyex uuc te Diose —xi' te Jesuse. Te Jesús la yalbey yaiyic in sloc'ombail-c'op to: —¿Ya bal xju' yu'un awaiy te ya snit ta beel ma'sit te mach'a pajal ma'sit soque? Ma xju'. Teme jiche, pajal me ya xch'ayic coel ta bay joc'bil coel te lume. Soc ni jtuluc jnopojel te cajal ay yu'un te yajmaestroe. Ja' to pajal ya xc'ot soc teme ju' yu'un snopel ta lec te p'ijubtesele. “¿Bistuc ja' ya awil te ch'in ac te ochem ta sit te awermanoe? Yan te muc'ul ts'amte' te c'atal ta asite, ma ba ya awil stuquel. ¿Bit'il ya xju' awu'un te ya awalbey te awermanoe: “Quermano, ac'bon jloq'uesbat te ch'in ac te ochem ta asite”, teme xaate? Melel ay muc'ul ts'amte' te c'atal ta asit atuquele. Te ja'ate cha'lam awo'tan. Loq'uesa neeluc te muc'ul ts'amte' te c'atal ta asite. Jich ya xju' awu'un sloq'uesel te ch'in ac te ochem ta sit te awermanoe. “Ma'yuc lequil te' te amen sit ya yaq'ue; soc ma'yuc amen te' te lec sit ya yaq'ue. Melel te juju-jpejt' te'e ya jna'beytic sba ta swenta te site. Jich bit'il ma ba ya sitin higo ta bay te ch'ixe, soc ma ba ya sitin ts'usub ta bay te chicch'ixe. Te mach'a lec te yo'tane, lec te bila ya yal loq'uel ta yee, yu'un nojel ta yo'tan te bila leque. Yan te mach'a amen te yo'tane, ma lecuc te bila ya yal loq'uel ta yee, yu'un nojel ta yo'tan te bila amene. Melel ta jc'optic ya xchicnaj te bila nojel ta co'tantique. “¿Bi yu'un te “Cajwal, Cajwal”, ya awutonic, te melel ma xapasic te bila ya calbeyexe? Ya calbeyex awaiyic te bi yilel c'oem te mach'a ya xtal yaiybon stojol jc'op soc te ya spas te bila ya cale. Jich c'oem te bit'il jtul winic te la spas sna. Najt' la sjoc'bey coel te yawile, ja' to la sta te p'ijom tone. Tey la yac' ipajuc jajch'el a te yiptajibe. C'alal tal snojel te ja'e, mal c'axel tey a ta bay loq'uem te snae, ja'uc me to, ma ju' yu'un sjinel. Melel ipajem ta bay p'ijom ton. Yan te mach'a ya yaiybon stojol te jc'ope, teme ma ba ya spas te bila ya cale, jich c'oem te bit'il jtul winic te sba lum nax la snajc'an te snae, te ma la yac'bey yiptajibe. C'alal tal snojel te ja'e, mal c'axel tey a ta bay loq'uem te snae. Bot'q'uej yu'un. Jc'axel jin te snae —xi' te Jesuse.