San Lucas 3
3
La xchol sc'op Dios ta jochol taquin q'uinal te Juan J'ac'-ich'ja'e
(Mt 3.1-12; Mr 1.1-8; Jn 1.19-28)
1Yo'lajunebalix ja'wil yochel ta muc' ajwalil a te Tiberio Cesare, ja' ay ta Gobernador ta bay sq'uinal Judea te Poncio Pilatoe. Te Herodese ja' ay ta ajwalil ta bay sq'uinal Galilea. Soc ay ta ajwalil ta sq'uinal Iturea soc ta sq'uinal Traconite te Felipe te yijts'in te Herodese. Soc ja' ay ta ajwalil ta sq'uinal Abilinia te Lisaniase. 2Soc ay ta muc' sacerdoteil a te Anás soc te Caifase. Jich yorail te ay ta jochol taquin q'uinal te Juan J'ac'-ich'ja'e te snich'an Zacariase. Tey c'opoj ta yo'tan a te Diose. 3Jich la yoclin spisil te ti'ti'ja' Jordán. La yalbey te ants-winiquetic te ac'a sujt'es yo'tanic ta stojol te Diose, soc ac'a yac' sbaic ta ich'ja', yu'un jich me ya spasbot perdón yu'un a te smulique. 4Jich bit'il ts'ibubil jilel yu'un te j'alwanej Isaiase:
“Ya me xcaj ta aw ta jochol taquin q'uinal.
Jich me ya yal ta aw: ‘Chajbanbeyaic me sbe te Cajwaltique,
toj me xajamic bael te sbee.
5Ac'a yich' but'el te stenlej xatal q'uinaletique,
soc ac'a yich' jinel coel te witsetique.
Ac'a yich' pasel ta toj nax te buelta beetique,
soc ta bay lomajtic ya me yich' pamanel.
6Spisil ants-winiquetic ya me yilic ta sitic te bit'il ay colel yu'un te Diose’, xi' me ta aw”,#Is 40.3-5. xi' te Isaiase.
7Talic te ants-winiquetic ta stojol te Juane, yu'un c'an yac' sbaic ta ich'ja'. Jich la yalbey yaiyic:
—Te ja'exe ja' sts'umbalex c'oem te jti'awal chanetique.#Mt 12.34; 23.33. ¿Mach'a la yalbeyex awaiyic te ya xju' ya acoltay abaic loq'uel ta swenta te tulan castigo te talelixe? 8Ac'a me chicnajuc ta ilel ta swenta awat'elic te bit'il sujt'emix awo'tanic ta mero melel yu'un te amulique. Ma me jichuc xawalic: “Te jo'otique sts'umbalotic Abraham”,#Jn 8.33. ma me xauquex. Melel xcalbeyex te ya xju' yu'un te Diose te ya sc'atp'un ta sts'umbal Abraham in tonetic to. 9Pajal c'oemex soc te'etic te chapalix yechejul ta ts'etele. Melel spisil ta pejt' te' te ma xyac' lec site, ya me yich' ts'etel soc ya me yich' chiq'uel ta c'ajc'#Mt 7.19. —xi' te Juane.
10Te ants-winiquetic la sjojc'oyic: —¿Bila ya sc'an ya jpastic jiche? —xiic.
11La yal te Juane:
—Te mach'a ay cha'lijc' sc'u' ya sc'an ya yac'bey lijc'uc te mach'a ma'yuc sc'u'e. Ja' nanix jich te mach'a ay swe'ele, ya sc'an ya yac'bey uuc te mach'a ma'yuc swe'ele —xi'.
12Ay tal yac' sbaic ta ich'ja' uuc te jc'an-patanetique.#Lc 7.29. La sjojc'obeyic te Juane:
—Maestro, ¿bila ya sc'an ya jpastic uuc te jo'otique? —xiic.
13La yal te Juane:
—Te patan-taq'uin te ya ac'anique, ma me xjelaw ta c'anel awu'unic a te bit'il mandal awich'ojique —la yut.
14Ay talic uuc te soldadoetique. La sjojc'oyic uuc:
—Ja' xan te jo'otique, ¿bila ya sc'an ya jpastic uuc? —xiic.
La yalbey yaiyic:
—Ma me ayuc mach'a xapojbeyic sbiluc ta swenta nax ac'ajc'al-c'opic soc ta jontol le-mulil. Tic'anic me a te atojol te ya x'ac'botexe —la yut.
15Te ants-winiquetique la smaliy yilic te mach'a a te Juane, yu'un la ayan yo'tanic teme ja'ix te Cristoe. 16Ja'uc me to, la yal te Juane:
—Melel te jo'one ja' nax ya cac'beyex awich'ic ja' ta swenta nax te ja'e. Yan te mach'a ya xtale, ja' me ya yac'beyex awich'ic te Ch'ul Espíritu soc c'ajc'. Ja' tulan yat'el yich'oj stuquel. Jichon ta stojol ya caiy te bit'il ma'yuc jtuul ta jyalele, ni yacuc xju' ya jtilbey sc'ab te xanabe. 17Te mach'a ya xtale, stsacojix ta sc'ab te yic'ojibal sulil trigo. Patil ya stsob ochel ta sq'uejibal te sbaq'ue. Yan te sulile ya me xchic' ta c'ajc' te banti ma xtup' sbajt'el q'uinal —xi' te Juane.
18Jich la yal ta stojol te lume, soc ay to xan bayal consejo la yalbey ta stojolic ta swenta te lec yach'il c'ope. 19Soc la yalbey ta jamal smul te ajwalil Herodese. Yu'un ja' la yic' yinamin te Herodías te yinam Felipe ja' te yijts'ine. Soc la yalbey xan spisil te bitic amen spasoje. 20Ja'uc me to, te Herodese la to yesmantes xan a te smule, ja' te la yac' ta chucjibal te Juane.#Mt 14.3-4; Mr 6.17-18.
Jesús la sc'an yich' ja'
(Mt 3.13-17; Mr 1.9-11)
21C'alal yac ta yich'el ja' a te lume, tal yac' sba ta ich'ja' uuc te Jesuse. C'alal yac ta sc'oponel Dios a te Jesuse, jam te ch'ulchane. 22Jich coj tel ta stojol Jesús te Ch'ul Espiritue. Chican ta ilel, melel jich bit'il stsumut te jul ta stojole. Soc la yaiyic stojol te ay mach'a c'opoj tel ta ch'ulchan te jich la yale: “Ja'at Jnich'anat te bayal c'uxat ta co'tan. Bin nax co'tan awu'une”,#Gn 22.2; Sal 2.7; Is 42.1; Mt 3.17; Mr 1.11; Lc 9.35. te xie.
Te stsumbal coel te Jesucristoe
(Mt 1.1-17)
23C'alal ayix lajuneb xcha'winic (30) ja'wil ya'wilal a te Jesuse, jajch' ta at'el. Cuybil te ja' snich'an te José, te jich ay moel ta cumulcum te sts'umbale: 24Elí, Matat, Leví, Melqui, Jana, José, 25Matatías, Amós, Nahúm, Esli, Nagai, 26Maat, Matatías, Semei, José, Judá, 27Joana, Resa, Zorobabel, Salatiel, Neri, 28Melqui, Adi, Cosam, Elmodam, Er, 29Josué, Eliezer, Jorim, Matat, 30Leví, Simeón, Judá, José, Jonán, Eliaquim, 31Melea, Mainán, Matata, Natán, 32David, Isaí, Obed, Booz. Salmón, Naasón, 33Aminadab, Aram, Esrom, Fares, Judá, 34Jacob, Isaac, Abraham, Taré, Nacor, 35Serug, Ragau, Peleg, Heber, Sala, 36Cainán, Arfaxad, Sem, Noé, Lamec, 37Matusalén, Enoc, Jared, Mahalaleel, Cainán, 38Enós, Set, Adán, ta slajibal ja' te Diose.
Currently Selected:
San Lucas 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.