Judas 1
1
Spatjibal-o'tanil
1Jo'on Judason#Mt 13.55; Mr 6.3. te abaton yu'un te Jesucristoe, soc ja' jbanquil te Jacoboe. Ya jpatbeyex awo'tanic ja'ex te ic'bilex yu'un te Jtatic Diose, soc te ch'ultesbilex yu'une, soc te canantaybilex yu'un te Jesucristoe. 2C'axem to xan ac'a xc'uxtayex te Diose, soc lamaluc me q'uinal ya awaiyic yu'un, soc ayuc me bayal xc'uxul awo'tanic ta apisilic.
Lotil maestroetic
(2 P 2.1-7)
3Quermanotac te c'uxex ta co'tane, ay ta co'tan te ya jts'ibubeyex ta carta te bit'il ay sc'oplal te jcoleltic te pajal ay ta jwentatique, Ja'uc me to, la jnop te ja' lec ya jts'ibubeyex carta ta ora naxe. Yu'un ya jtac'uyex te ya me xc'opojex yu'un te xch'uunjel awo'tanic te jc'axel awac'ojiquix ta stojol Dios soc spisil te mach'atic ch'ul lum yu'un te Diose. 4Yu'un ay mach'atic te ju' yu'unic te la slo'layex te muquen ochemiquix ta awolilique. Ja'uc me to, namey ts'ibubilix jilel sc'oplalic ta Sjun Dios te quechelic ta yich'el castigoe. Melel c'ax amen te yo'tanique. Syantesejiquix ta slejibal smulic te bit'il ayotic ta c'uxtayel yu'un te Diose. Ma xyaq'uic ta ich'el ta muc' te Cajwaltic Jesucristoe, te ja' nax cajal yat'el stuquele.
5Ya jc'an te yacuc xjul ta awo'tanic, manchuc teme ana'ojic stojol, te bit'il c'ot ta loq'uel ta namey te israeletique.#Ex 12.51. Ja' bi, ja' te ac'otic ta lajel yu'un Cajwaltic te jich yipal ma la xch'uunique,#Nm 14.29-30. manchuc teme la scoltay loq'uel tel ta banti sq'uinal Egipto. 6Soc te ch'ul abatetic te ma la yich' ta muc' te yat'elique, la yijq'uitayic te banti ayique. Ayic ta chuquel ta ijc' q'uinal ta ora to, swenta yu'un ya me yich' ich'el ta c'op te c'alal ya sta sc'aalelale. 7Jich bit'il te lum Sodoma soc Gomorra soc te yan lumetic te ayic ta sjoylejale, pajalic soc te ch'ul abatetic te la calixe. La sle smulic ta sbaq'uetalic. C'aic ta spasel te sjoy sbaic nax ta winiquil te ya yuts'inbey sbaic sbaq'uetalique. Ja' in lumetic to, ja' ejemplo ta stojol spisil ants-winiquetic te ac'botic castigo ta c'ajc' sbajt'el q'uinal.#Gn 19.1-24.
8Manchuc teme yaiyojic stojol in winiquetic to, ja'uc me to, swaichic nax c'oem te bit'il cuxulic ta q'uinale. Jich ya sboltes te sbaq'uetalique. Soc scuyojic te ma'yuc yat'el yich'oj te Cajwaltique, soc ya yixta-c'optayic te mach'atic cajal yu'elic ta ch'ulchane. 9Yan te Miguele,#Dn 10.13,21; 12.1; Ap 12.7. te jwolwanej yu'un te ch'ul abatetique, tulan c'opoj soc te pucuj ta swenta sbaq'uetal Moisés#Dt 34.6. te c'alal lajemix ae. Ja'uc me to, ma ba jelaw sc'op te Miguele. Ma la yalbey xch'ayel te pucuje. Ja' nax jich la yalbey: “Te Cajwaltique ya me scomat stuquel”,#Zac 3.2. xi' soc. 10Yan in winiquetic to, ya yixta-c'optayic te bitic ma sna'beyic sbae. In te bitic ya sna'beyic sbae, tey ya sboltes sbaic a, jich bit'il chambalametic te ma sna'ic q'uinale.
11¡Ac'a me yil sbaic stuquelic! Melel snopojbeyic yo'tan te Caine.#Gn 4.3-9; Heb 11.4; 1 Jn 3.12. Sganar nax sna'ojic, jich jowejemiquix jich bit'il te Balaame.#Nm 22.1-35; Ap 2.14. Soc jich ya xlajic bit'il te Coré te ac'ot ta lajel yu'un te bit'il la scontroin te Moisese.#Nm 16.1-35. 12Ja' nax ya sboltesbeyex ac'oplalic te bit'il sjoinejex ta spasel te q'uin swenta c'uxul-o'tanile. Melel xchinchon nax q'uinal yu'unic tey a te yacalic ta we'el-uch'ajele. Ja' nax ya sle stuquelic te bila ya xtuun yu'unique. Pajalic soc tocal te ma'yuc ya'lel, te bayuc ya x'eanot bael yu'un te iq'ue. Pajalic soc te'etic te ma xyac' sit ta yoraile, te cheb buelta lajemique, soc te bulbil loq'uel soc te yisime. 13Pajalic soc sbul mar te bayal sbolilal te q'uexlaltic sba te bila ya spasique. Pajalic soc eq'uetic te jowejemic ta beele te chapal sc'oplalic te ya xba ainuquic sbajt'el q'uinal ta bay mero ijc' nax te q'uinale.
14Jich nix la yalbey sc'oplal uuc te Enoc#Gn 5.18,21-24. te ja' sjuccumul sts'umbal te Adane. Jich la yal: “La quil te Cajwaltique, sjoinej tel bayal ta jmil te ch'ul abatetic yu'une. 15Tal yalbey ta jamal te bi yilel yat'el ta spisilic te ants-winiquetique, soc tal yac'bey castigo spisil te mach'atic la spasic te bila amene, soc spisil te jmulawiletic te la yalic bol c'op ta stojol te Diose”, te xie. 16Ja'ic in to, jmuquen-ayantaywanejetic, jc'an-parteetic, te ja' nax baem ta yo'tanic te bila ya smulanique. Nojel ta yeic toybail. Ya sleic bit'il ya slo'laybeyic yo'tan yantic, yu'un ay bila ya sc'an ya staic a.
Stac'uyjibal te jch'uunjeletique
17Quermanotac te c'uxex ta co'tane, ma me xch'ay ta awo'tanic te bila la yalic ta neelal to te jpuc-c'opetic yu'un te Cajwaltic Jesucristoe. 18Melel jich la yalbeyex awaiyic: “Ta nopol slajibal c'aal ay me jlabanwanejetic. Yu'un ja' nax baem ta yo'tanic spasel te bila amen smulanejic spasele”,#2 Ti 3.1-5; 2 P 3.3. te xiique. 19Ja'ic me te ya yac'beyex axat abaique. Ja' nax ay sc'oplal ta yo'tanic te bila ya sc'an te sbaq'uetalique, te melel ma'yuc ta yo'tanic te Espíritu yu'un te Diose.
20Yan te ja'ex quermanotac te c'uxex ta co'tane, ja' me ac'a yipin awo'tanic te xch'uunjel awo'tanic te ch'ultesbile. Spisil me ora c'oponaic Dios ta swenta te Ch'ul Espiritue. 21Jc'axel ac'a abaic ta bay xc'uxul yo'tan te Diose. Soc maliyaic te bi c'aalil ya xc'uxtayotic te ya yac'botic jcuxlejaltic sbajt'el q'uinal ta jpisiltic te Cajwaltic Jesucristoe.
22Junantesbeya yo'tanic te mach'atic bayal ya x'ayan yo'tanique. 23Coltayaic me te yantique, loq'uesaic tel ta bay te c'ajq'ue. Soc c'uxbajuc me ta awo'tanic te yantique. Ja'uc me to, ilaybeyaic te smulique soc te sc'u'-spac' te boloben yu'un te mulil spasojique. Xiwanic me yu'un.
Ay ta ch'uunel te Dios Tatile
24-25Te jip jtul Dios te bayal sp'ijile, te Jcoltaywanej cu'untic, ay yu'el ta scanantaybelex te manchuc ya xyalex ta mulile, swenta yu'un ma me ayuc amulic te ya atejc'an abaic ta stojol ta bay te yutsilale. Jich me bayal ya xbujts'naj awo'tanic yu'un. Ay yutsilal stuquel, soc ay ta ich'el ta muc', soc ay yu'el, soc ya xmandalaj spisil ora ta swenta te Cajwaltic Jesucristo, ja' to ta xjajch'ibal, soc ta ora to, soc ta sbajt'el q'uinal. Jichuc.
Currently Selected:
Judas 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.