Joel 3
3
Xchajbanel yu'un Cajwaltic ta stojol nacionetic
1Jich ya yal te Cajwaltic:
—C'alal ya xc'ot yorail
ya me cac' te ya staic yutsilal te Judá soc te Jerusalén.
2Ya jtsob spisil te nacionetic,
ya me quic' bael ta stenlej xatal q'uinal yu'un Josafat.
Tey me ya xc'o cac'bey stojic a
te bila la spasbeyic te lum Israel cu'une.
Melel la spucbonic bael ta swolol balumilal te israeletic,
soc la spucbey sbaic te jlum-jq'uinale.
3La spucbey sbaic te lum cu'une,
la spasbeyic snumeroil ta na'el mach'a ya xc'ot ta swenta.
La xchonic te alalqueremetic
soc te alal ach'ixetique.
Te stojole la slajinic ta vino,
la slajinic ta swenta jmulawil antsetic.
4“¿Bi ya ac'anic ta jtojol, Tiro, Sidón,#Is 23.1-18; Ez 26—28; Am 1.9-10; Zac 9.1-4; Mt 11.21-22; Lc 10.13-14. soc Filistea?#Is 14.29-31; Jer 47; Ez 25.15-17; Am 1.6-8; Sof 2.4-7; Zac 9.5-7. ¿Ya bal asujt'esbonic spacol? ¿Ay bal bila ya ac'anbonic stojol? Nopol ya cac'beyex te bila ja'ex nix lebil awu'unique. 5Ja'ex la awelc'anbonic te plata soc te oro cu'un, la awich'bonic bael te c'ulejalil cu'une, c'o awaq'uic ta temploetic yu'un awajcananic. 6La awiq'uic bael ta c'ubul te yajwal Judá, soc la awiq'uic bael te mach'atic nainemic ta Jerusalén, la achonic ta mosoinel yu'un griegoetic. 7Pero jo'on me ya quic' loq'uel tel te banti la achonic baele. Te ja'exe ya me cac'beyex awocolic uuc, jich nix me te bit'il c'ax yu'unic te mach'atic la awac'beyic swocolique. 8Ya me jchonbey judioetic te aquerem-nich'nabic soc te awantsil-nich'nabic, swenta yu'un ya xchonbeyic bael sabeo-winiquetic te c'ubul slumalique. Jo'on Ajwalilon, yacon ta yalel —xi' te Cajwaltique.
9Albeyaic te nacionetic,
albeyaic ta jamal te ya xjajch'ix te ch'ul guerra.
Ic'aic tel te mach'atic ma xiwique;
ac'a taluc, ac'a ju'uc yu'unic te guerrae.
10Ac'a spasic ta puñal te yasadonic;
te hoz,#Is 2.4; Mi 4.3. ac'a spasic ta lanza.
“Jo'on mero bayal quip”,
xiuc me te mach'a ma'yuc yipe.
11Ta apisilic ja'ex nacionetic te patxujc' ayexe,
suja abaic ta ora, la'ic, la' tsoba abaic.
Manchuc me ja'uc te mach'a lamal yo'tane,
ya xc'atp'uj ta jguerra-winic.
12Ac'a me stij sbaic te nacionetic,
ac'a ochuc bael ta stenlej xatal q'uinal yu'un Josafat.
Tey me ya yaiy chajbanwanej a te Cajwaltique,
ya xchajban ta spisil te nacionetic te patxujc' ayique.
13Melel mero jc'axel amen yo'tanic.
Set'aic jichuc yijuben trigo,
la staix yorail te c'ajoje.#Ap 14.14-16.
Tenaic jichuc ts'usubetic,
melel chapalix yu'un ya yich' pasel te vino c'oeme.#Is 63.3; Lm 1.15; Ap 14.19-20; 19.15.
14Mero bayalix mach'atic ayic ta
stenlej xatal q'uinal yu'un Chajbanel,
melel nopolix yorail te sc'aalelal te Cajwaltique.
15Ya me x'ijc'ub c'aal, ya me x'ijc'ub u,
ya me xtup' xojobil te eq'uetique.
16Te Cajwaltic ya yac' ta aiyel sc'op,
jich me sc'op te bit'il ya xt'om chawuc.
Ya me xc'opoj tel c'alal ta wits Sión, ta Jerusalén;#Jer 25.30; Am 1.2.
ya me stij sba te ch'ulchan
soc ya me stij sba te lumq'uinale.
Pero te Cajwaltic ja' me anjibal jcoltaywanej yu'un israeletic,
melel ja'ic te lum yu'un stuquele.
Ya me xtal yutsilal Judá
17Jich ya yal te Cajwaltic:
—Te ja'ex ya me ana'ic te Ajwalilon te Dioson awu'unique,
nainemon ta Sión, ja' te ch'ul wits cu'une.
Te Jerusalén ch'ul lum ya xc'ot;
ma me ayuquix bi ora ya x'u'uninotix
yu'un jyanlumetic.
18Te c'alal ya xc'ot sc'aalelal,
te vino soc te leche ya me x'oquin c'oem ta
tseletic soc ta witstiquil.
Te beja'etic yu'un Judá
ya me yich'ic bael bayal ja'.
Ta templo cu'un ya xchicnaj sloq'uibja'
te ya yajts'es te stenlej xatal q'uinal yu'un Sitim.#Ez 47.1-12.
19Te Egipto jc'axel me jinem ya xjil;
te Edom ya me yich' c'atp'unel
ta jochol taquin q'uinal.
Melel la yac'beyic guerra te yajwal Judá,
ta slum-sq'uinal la smalbeyic xch'ich'el te
mach'atic ma'yuc bila amen snopoj ta yo'tanique.#Abd 10.
20-21Jo'on me ya jsujt'esbey spacol te bit'il la yich'ic milele,
ma ba ya jpasbey perdón te mach'a la yaiy milawe.
Pero te Judá soc Jerusalén,
spisil me ora ay yajwal stuquelic.
Te jo'on Ajwalilon ya me xnainon ta wits Sión
—xi' te Cajwaltique.
Currently Selected:
Joel 3: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.