2 Tesalonicenses 2
2
Te jmulawil winique
1Quermanotac, te bit'il ay sc'oplal te ya xtal te Cajwaltic Jesucristoe, soc te ya quich'tic stsobel yu'un ta stojole,#1 Ts 4.15-17. ya calbeyex wocol ta atojolic: 2Ma me ayuc yan te bila ora nax ya xyanaj ta nopel awu'unique. Ma me xjajch' amel awo'tanic yu'un teme ay mach'a ya yalbey sc'oplal te c'axix sc'aalelal te Cajwaltique, soc teme ya yalic te jo'on caloj ta sc'opique, soc teme ya yalic te ay carta te pasbil cu'untic te jich ya yal ta sc'opique. 3Ma me ayuc mach'a ya awac' abaic ta lo'layel yu'un. Ma to xcha'tal te Cajwaltique. Ja' neel ya xc'ot ta pasel te ay tsobol ya xch'ay ta jc'axel te xch'uunjel yo'tanique, soc ya xchicnaj uuc te mach'a mero jmulawil winique te yu'un te ch'ayele. 4Ya me scontroin spisil te bila yu'un te Diose, soc te bila ch'uunbile.#Dn 11.36; Ez 28.2. Ya me snajc'an sba ta bay yutil templo yu'un te Diose soc ya me xcaj yal sba te ja' cuxul Dios ta sc'op stuquele.
5¿Yu'un bal ch'ayemix ta awo'tanic te jich la calbeyex te c'alal joinejexe? 6Soc ana'ojic stojol te bila combil yu'un ta ora to, swenta yu'un ma ba ya xchicnaj ja' to teme ya sta yoraile. 7Melel muquen yaquix ta at'el te mulile. Ja' xanix ma to ya yich' loq'uesel bael te mach'a ay ta comawe. 8Teme ya yich' loq'uesele, ya me xchicnaj te mach'a mero jmulawil winique. Te Cajwaltic Jesuse ta sjab nax ye#Is 11.4. ya smil. Tic' ya sjinbey yu'el a te bit'il ya xchicnaj tel soc yip yu'el te Cajwaltique. 9Te mero jmulawil winique, ya me x'at'ej ta swenta yu'el Satanás. Ya me xtal yac' ta ilel bayal yu'el soc señailetic soc jchajp at'eliletic#Mt 24.24. ta swenta lo'layel. 10Ya me stuuntes spisil ta jchajp muliletic te ya slo'lay a te mach'atic ya xbajt'ic ta ch'ayel, ta scaj te ma la sc'an xch'uun te smelelil c'op te ay colel yu'une. 11Ja' swentail te Diose ya me sticunbey tulan boltesel ta yo'tanic. Yu'un jich me ya xch'uunic te lotil c'ope, 12swenta yu'un jich me ya x'ac'otic ta castigo spisilic te mach'atic ma la sc'an xch'uunic te smelelil c'ope, soc te ja' bin nax yo'tanic yu'un te bila ma stojiluque.
Tsabilic yu'un Dios te ya xcolique
13Jich yu'un, quermanotac, ya sc'an ya calbeytic wocol Dios ta awentaic, te c'uxex ta yo'tan te Cajwaltique, te bit'il xjajch'ibal to stsaojex Dios yu'un te ya xcolexe. Ja' ta swenta te Espíritu te ya xch'ultesbeyex awo'tanique, soc ja' ta swenta te ay xch'uunjel awo'tanic yu'un te smelelil c'ope. 14Ja' swentail te la yiq'uex te Diose ta swenta te lec yach'il c'op te cat'elinejtic xcholel te jo'otique, swenta yu'un ya awich'beyic uuc te yutsilal te Cajwaltic Jesucristoe.
15Jich yu'un quermanotac, ayuc me yip awo'tanic ta spisil ora. Ma me xch'ay ta awo'tanic te bila la cac'beyex anopique, chican teme ta que la calbeyexe, o ta carta te la cale.#1 Co 11.2. 16Ja' nix te Cajwaltic Jesucristoe soc te Jtatic Diose te c'uxotic ta yo'tane soc te yac'ojbotic smuc'ul co'tantic sbajt'el q'uinale, soc te ay bi ya jmaliytic ta swenta yutsil yo'tan cu'untique, 17ac'a me yac'beyex yip awo'tanic soc stulanil awo'tanic. Jich me lec spisil te bila ya awalique soc te bila ya apasique.
Currently Selected:
2 Tesalonicenses 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.