1 Reyes 2
2
Slajibal buelta smandal David
1Te c'alal la staix yorail ya xlaj a te David, la spas jilel ta mandal te snich'ane, ja' te Salomón:
2—Ya xjajch'on xan ta beel swenta slajibal buelta, jich te bit'il ya xc'ot ta swenta spisil te mach'atic ayic ta balumilale. Ayuc me yip awo'tan, toj me xawac' aba, pasa aba ta lequil winiquil. 3Ac'a me c'otuc ta pasel awu'un te bila ya yalbat te Cajwaltic te Dios cu'untique, pasbeya me sc'anjel yo'tan. Ja' me xapasbey te bila ya yal spisil ta jchajp te mandaliletic yu'une, jich te bit'il ts'ibubil ta mandaliletic yu'un te Moisés. Jich me ay yutsil ya xc'ot ta spisil a te bila ya apas soc ta bayuc ya xbaat. 4Soc swenta yu'un jich me ya yac' c'otuc ta pasel a te Cajwaltic te bila yalojbone, te jich la yalbon: “Teme toj yo'tan ya yac' sbaic ta jtojol, soc teme toj ya x'ainic ta jtojol ta melel ta spisil yo'tanic soc ta spisil xch'ulelic te anich'nabe, ma me ayuc bi ora te ma ja'uc ya xmo ta muc'ul nactijibal yu'un Israel te ats'umbale”, xi' te Cajwaltique.
5“Jich yu'un yo'tic, ja'at ana'ojix te bi la spasbon te Joab te yal Sarvia: ja' te bi la spasbey te cheb generaletic yu'un soldado-israeletic, ja' te Abner#2 S 3.27. snich'an Ner soc te Amasa#2 S 20.10. snich'an Jeter, te la smil ta yorail lamal q'uinal, swenta sujt'esel spacol te ch'ich' malem ta scaj guerra. Jo'on la yac'bon ta jwenta te milawe. 6Ja' yu'un at'ejan me soc sp'ijil awo'tan, ma me xawac' te lequil lajel ya yaiye. 7Yan te snich'nab Barzilai te talem ta Galaad,#2 S 17.27-29. lecuc me awo'tan ta stojol stuquelic, soc ic'a me ta we'el ta amesa spisil ora, melel ja'ic la scoltayonic te c'alal yacalon ta anel yu'un abanquil Absalón. 8Soc yan xan, ila awil te li' ay te Simei te snich'an Gera te Benjamín-winic, te talem ta Bahurim. Ja' te la yalbon buen tulan ixta c'op te c'alal yacalon ta bael ta Mahanaim#2 S 16.5-13. a, pero ta patil loc' smaliyon ta muc'ja' Jordán. Jich puersa la calbey ta jamal ta stojol te Cajwaltic te ma ba ya jmil.#2 S 19.16-23. 9Ja' yu'un ma me xapasbey perdón te bit'il ay sp'ijil awo'tan, ila awil bila ya xju' ya apasbey, pero te c'alal ya xlaje, ja' lec te milel ya yaiy te ya xlaje —xi' jilel te muc' ajwalil David.
Laj David
(1 Cr 29.26-30)
10Laj David, c'ot ta muquel ta Lum-yu'un-David, ta banti mucul te mach'atic ay yu'un te c'axiquix ta q'uinale. 11C'ax ta muc' ajwalil ta Israel cha'winic (40) ja'wil. Och ta muc' ajwalil juqueb ja'wil ta Hebrón, soc oxlajuneb xcha'winic (33) ja'wil ta Jerusalén. Jich cha'winic (40) ja'wil c'ot ta spisil.#2 S 5.4-5; 1 Cr 3.4. 12Ja' och jilel ta muc' ajwalil te Salomón. Ja' la sjelolin David, ja' te anima state.#1 Cr 29.23. Stalel ay bayal yip te yat'el ta ajwalil te Salomone.
Slajibal te Adonías soc te mach'atic t'unot yu'une
13Te Adonías, te yal Haguit, ba yil te Betsabé, ja' te sme' Salomón. Jojc'obot yu'un:
—¿Lamal bal awo'tan yacalat ta talel? —la yut.
—Lamal —xi' ta sjaq'uel te Adonías. 14Soc la yal xan:
—Ay bi ya calbat —xi' te Adonías.
—Albon jiche —xi' ta sjaq'uel te Betsabé.
15La yal te Adonías:
—Ja'at ana'oj te jo'on ya c'an c'otuc ta jwenta te mandalteswaneje, melel spisil Israel yacalic ta smaliyel te jo'on ya x'ochon ta muc' ajwalile. Ja'uc me to, te at'el ta muc' ajwalil ac'botix ta swenta te quijts'ine, melel ja' nix te Cajwaltic te jich la sc'an te la yac'beyix ta swenta stuquele. 16Yo'tic ja' xanix ya jc'anbat wocol, ma me xawal te ma xawac'bone —xi'.
—C'opojan —xi' te Betsabé.
17Jich la yal te Adonías:
—Wocoluc a, c'anbeya te muc' ajwalil Salomón te yacuc yac'bon quinamin te Abisag te sunemil-ach'ixe. Ya yich'bat ta wenta te ac'op te ja'ate —xi'.
18La sjac' te Betsabé:
—Lec ay, jichuc. Ya xba jc'opon te muc' ajwalile —xi'.
19Jich te Betsabé ba sc'opon te muc' ajwalil Salomón ta swenta te Adonías. Te muc' ajwalil la stejc'an sba, la yic' ta stojol, soc la stinan sba swenta yich'el ta muc' te sme'e. Patil cha'sujt' xan bael ta naclej ta smuc'ul nactijib. La yal mandal ta ich'el tel muc'ul silla yu'un snactijib te sme'e. Jich la yac' sba ta naclej ta swa'el te muc' ajwalile. 20Jich albot yu'un:
—Ay bi ya jch'in c'anbat ta atojol. Ma me xawal te ma xawac'bone —xi'.
—C'anbon te bila ya ac'ane. Ya me cac'bat —xi' te muc' ajwalile.
21—¿Ya la bal awac' permiso te ya yich' aq'uel yinamin abanquil Adonías te Abisag, te sunem-ach'ixe? —xi' te Betsabé.
22La yal te Salomon:
—¿Bi yu'un ya ac'anbey yinamin Adonías te Abisag te sunem-ach'ixe? Ja' xanix ma ba ya ac'anbon te ya cac'bey te cat'el quich'oj ta muc' ajwalile, melel ja' banquilal cu'un soc te ja' jun ay soc te sacerdote Abiatar soc Joab te yal Sarvia —xi'.
23Te c'alal jich la yal te muc' ajwalil Salomón, jc'axel jich la yal ta stojol Cajwaltic:
—Ac'a yac'bon tulan castigo te Dios teme ma ba ya xlaj te Adonías yu'un te bila la yale. 24Jc'axel ya cal ta stojol Cajwaltic te yo'tic nix ya xlaj te Adonías. Ja' te Cajwaltic te la yac'on ta ajwalile, soc te la yaq'uix c'otuc ta pasel te moonix ta smuc'ul nactijib te David, ja' te anima jtat, soc te chapalix yu'un te ma xch'ay bael te jts'umbale —xi' te Salomón.
25Ora nax la yalbey mandal te Benaía snich'an Joiada te ya xba smil te Adonías. Jich bajt', c'o smil te Adonías. 26Yan te sacerdote Abiatar, pasot ta mandal yu'un te muc' ajwalil:
—Baan ta Anatot ta aq'uinal. Ya sc'an te ya xlajat te jichuque, pero ma ba ya jmilat, melel ja'at la awich' ta beel ta stojol te anima jtat David#2 S 15.24. te cajón yu'un Cajwaltic, soc te pajal c'ax awocol soque#1 S 22.20-23. —xi' sc'oplal. 27Jich la sloq'ues ta sacerdoteil ta stojol Cajwaltic te Abiatar te Salomón. Jich c'ot ta pasel a te bi la yal Cajwaltic ta Silo, ja' te sc'oplal te mach'atic ay yu'un te Elí.#1 S 2.27-36.
28Ta neelal to te Joab jun la yac' sba soc te Adonías, pero ma ba jun la yac' sba soc stuquel te Absalón. Ja' yu'un te c'alal la yaiy te bila yac ta pasele, te Joab bajt' ta anel ta ch'ul Nailpac' Templo yu'un Cajwaltic, c'o scoltay sba ta scajtijib ta chiq'uel milbil smajt'an Dios. 29Pero la yalbeyic te muc' ajwalil Salomón te bajt' ta anel ta Nailpac' Templo te Joab, te ba scoltay sba ta scajtijib milbil smajt'an te Diose. Te Salomón la sticun te Benaía te snich'an Joiada te ya xba smil te Joab. 30Te Benaía bajt' ta ch'ul Nailpac' Templo, jich c'o yalbey te Joab:
—Te muc' ajwalil la yalix mandal te ya xloc'ate —la yut.
Pero te Joab la sjac', jich la yal:
—Ma niwan. Li' ya xlajone —xi'.
Te Benaía bajt' ta stojol te muc' ajwalil, c'o yalbey te bila albot yu'un te Joab. 31Te muc' ajwalil jich la yal:
—Pasbeya te bila ya sc'an te yo'tane. Mila, muca, ch'aybeya sc'oplal ta swenta sts'umbal te anima jtat, soc ta jwenta uuc, te bit'il tojol la yaiy milaw te Joab. 32Te Cajwaltic ja' ni me ya yac'bey c'otuc ta swenta te Joab te bit'il ja' nix ta scaj smul te laje. Melel te Joab ma smandaluc jtat te la smil ta puñal te cheb buen lequil winiquetic te c'axem lec yat'elic te bit'il yat'el stuquel. Ja'ic te Abner snich'an Ner, general yu'un soldado-israeletic, soc te Amasa te snich'an Jeter, general yu'un soldadoetic ta Judá. 33Te xch'ich'elic ac'a c'otuc ta swenta Joab soc ta swenta sts'umbal sbajt'el q'uinal. Yan ta stojol David soc te patil alnich'anetic yu'un te xmelmon ya x'ochic bael ta muc' ajwalile, soc te muc'ul nactijibal yu'une, sbajt'el q'uinal lamal q'uinal ta stojol yu'un Cajwaltic stuquel —xi'.
34Jich bajt' te Benaía, c'o smil Joab. Bajt' ta muquel ta sna ta jochol taquin q'uinal. 35Te muc' ajwalile ja' la yac' ochel ta general yu'un soldadoetic te Benaía swenta sjelol te Joab, soc te sacerdote Sadoc ja' sjelol te Abiatar. 36Patil la sticun ta iq'uel te Simei, la spas ta mandal, jich la yalbey:
—Pasa junuc ana ta Jerusalén, nainan tey a. Pero ma me xloc'at bael ta bayuc nax, 37melel te bi c'aalil ya xloc'at baele, teme c'axat ta jejch' beja' Cedrón, na'a me te c'axel ya xlajate. Pero ja'at nix ta amul —xi'.
38La sjac'bey sc'op muc' ajwalil te Simei:
—Lec ay, jichuc. Ya me jpas te bila ya awalbone, muc' ajwalil cu'un —xi'.
Te Simei jalaj ta nainel ta Jerusalén. 39Pero c'ax oxeb ja'wil, loc' ta anel cheb yabat, bajt'ic ta nainel soc Aquis snich'an Maaca, muc' ajwalil ta lum Gat. C'alal la yaiy te Simei te ayic ta Gat xchebalic te yabate, 40jajch', la xchajban sburro, bajt' ta Gat ta banti ay te Aquis ta sleel te yabate. Te c'alal yacalix ta sujt'el tel ta Gat soc a te cheb yabat te Simei, 41la yaiy te Salomón te loq'uix bael ta Jerusalén, bajt' ta Gat te Simei soc te yaquix ta sujt'el tele. 42Jich la sticun ta iq'uel te Simei te muc' ajwalile, jich la yalbey:
—¿Ma bal lajuc awal ta stojol Cajwaltic te ma ba ya xloc'ate? La calbat te bi ora ya xloc'at jajch'el te ya xbaat ta bayuc te jc'axel ya xlajate. ¿Ma bal lajuc awalbon jiche te lec ay, te ya ach'uunbon te jmandale? 43¿Bi yu'un ma ba la awac' c'otuc ta pasel te bila jc'axel la awal ta stojol te Cajwaltique, soc te ma ba la ach'uunbon te jmandale? 44Ana'oj ta lec te bila amen la apasbey te David, ja' te jtate. Ja' yu'un te Cajwaltic la yaq'uix sujt'uc ta awenta te bila amen la apase. 45Yan te jo'on te muc' ajwalilone ya me quich' xan bendición ta smuc'ul nactijib David, stalel me chapal ya xjil sbajt'el q'uinal ta stojol Cajwaltic stuquel —xi' te muc' ajwalile.
46Patil te muc' ajwalil la spas ta mandal te Benaía snich'an Joiada. Loc' bael te Benaía, ba smil te Simei. Jich la yich' xan yip ta mandalteswanej te Salomone.
Currently Selected:
1 Reyes 2: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.