Tatanigaina 43

Ira Tahinamane Zosepu Di Leghu Lao Taremehana Benizemeni Ani Izipi

1Ia songe neke toraina muko fuludu ngama neke au ghu ani Kenani. 2Ka ia dike to age mahai va noghariro maneri ira leghu witi dike tabara mehario nga Izipi, Zekopu neke kahe ghua iahi ka ira tuunamane, “O leghu lao oke la tabara vanadani ghu keha birusudi witi,” neke ghua. 3Ghe Zuda neke kahe ghua iahi ka manei, “Ia mane neke toraina kahe va gigimai ta deona ge va malumu ghai ghu ta ke la fininina ghai manei nato deo la ga hio taremehaimai lao ghu tahimaimane ta ite ini. 4Noto va malumi la agho Benizemeni ta lao taremehamaina, ghai a boka la tabara vananigho meha ghano mo. 5Nga noto deo la agho go va malumi ghu manei, ghai e deo ga lao ghu, vununa ia mane neke va kahe ghini ghai ta deona ghai ga boka la haghele ghu ka kenuna manei, nato deo la ga hio taremehamai lao ghu tahimaimane ta ite ini. ”

6Zekopu neke kahe ghua iahi, “?Ne heve ghe noke va kahe ghini nga ghau manei ta auna keha tahimu manenani, no vanagu va tehi mamarutana ghu?”

7Maneri dike ungene tughui, “Ia mane neke notoho ma neke au ghu ghini ghaina ghai nia fototatamana iahi ka ghita e ghua kahe ghuana iahi, ‘?Nomu mama mu ne doli nga? ?E au mo keha tahimu manenani ghau?’ ta ghua irahi. Ghai a toraina ungene tughuri notoho ari ka manei. ?Heve ghe gake boka kusu avohi nga ghai mu, manei e age kahe ghini ghai ghatu ta mala hio vanani laona tahimaimane ini, ta ghuana?”

8Ianimu tuna ghe neke kahe ghua nga iahi Zuda ka nona mama, “O va leghu taremehagu ara rekaha mane nia ato ghahe ghu ghai. E ghua ghe ge deo nga hei ka ghita ta age lemena ka lemei mahai. 9Ara a naiungene ta age kopu ghini va vehana ia doli ka manei, e riva ghu ka ara take mala hio leghu meha va dufuina manei aiahi. Nato deo la ara ga hio leghu meha va veha vananigho ghu, ara ta age zutu ghinina ka ia kamotona doli ara. 10Geke deo la ghita gada afa soduai ghu, geala ghita toke boka palu fafata lao meha mo.”

11Ianimu tuna ghe neke kahe ghua nga iahi ka maneri nodi mama, “E toraina ghua ianimu neto ghua la, nai hagheleri ka baiki nira kehara ka ira leghutau ta toraina veha ta meha ka ira nunuma ghita, la namaha vanani ghu ia mane gavana. O hio birusudi leghutau ta mala va hurangi veveha ta va kudo ghidi gamu, bamu, maa, nia birusudi ka mizuana, keha fuadi pisitasio nia fuadi alamoni, e ghua. 12O hio lao rongo taghe palu fafata tehidi ira rongo noke kusu hio laorio, vununa ghau o toraina ke la va leghuri ira rongo dike fate laoro ka baiki nira ghau. Haeba neke suna kaike va zezea ma bana mu ianimu. 13O hioi haro tahimumane ini to leghu lao ghu ka ia mane. 14Verevere fangai God Torai Mana, e fihikini ghu ia mane mala dudumana ghini ghauna, e mala age vanamu leghu ghu manei Benizemeni nia ia keha tahimumane, e ghua. Taghe ka ara mu, nato mala toraina siana ghidi la ara ira nogu rekaha, ara a toraina siana ghidi maneri.”

15Ira tatahinamane dike hiori ghu ira namaha, ira rongo dike kusu hio laorio nia ira rongo ta mala ke la tatabara ghano e ghua, dike lao taremehana ghu Benizemeni. La va podolori tuna taghodi ka Zosepu dike ghua. 16Zosepu ka ia fini laoi Benizemeni taremehadira maneri, manei neke va kahe ghini iahi ia maneriva ta kenu ka ia suga kamoto manei, “Hio laori mane irahi ka sugana ara. Maneri edi mahai taremehagu ara ghatu hoatai ravata, o atungi ghu kaike tagukava o vatanai ghu.”

17Ia maneriva neke hio laori maneri ka ia sugana Zosepu leghuina taghe neke va kahe ghinio. 18Ira mane dike maughedi ka ia fafata hio laori maneri ka ia sugana Zosepu dike ngangana ghua ghu iahi, “Di hio ghita meha nga aiahi mu, vununa ghini ia rongo dike nai leghuriro maneri ka ira baiki ghita ka ia kusu mehada. Manei e age magara ghita e posi va gima ghita ghu mala nona mane varituhuna nia hio tada tuna noda dongiki idi, e ghua.”

19Maneri dike turi lao ghu ka ia maneriva ta kenu Zosepu ka ia makatanana suga, 20“Faghina agho,” dike ghua, “ghai nake meha aiahi Izipi kaike fafata sepao mala tabara ghanona. 21Ghe ka ia malau nake la nodono, nake la epuno ghu ia redu, ghai nake la tobeheri ira sopai nomai baiki, nake finiri ghu ira sopai hokotodi nomai rongo ta fate laona ka ira sopai nomai baiki. Ghai nato ke hio leghu meha vanamu ghu. 22Ghai nake hio meha taremehamai molamo keha rongoni mala ke tabara ghanona. Ghai e deo ga avohi ghemai ghu mu hei neke nakai vanamai leghura rongo ari ka ira nomai baiki.”

23“Oka anga ghemu ghu. Oka maughemu ghu,” neke ghua ghidi ia maneriva ta kenu. “Ia nomu God, ia God ka nomu mama, neke toraina vanamu rongona ka nomu baiki nira. Ara na avohi mo nake hiorira ira tabaradi witi ka ghau.” Ianimu tuna ghe neke hio kave vanadi meha nga manei Simoni.

24Ia maneriva ta kenu neke hio laori ira mane ka giliona ia sugana Zosepu. Manei neke la vanadi kolo mala tihirira tabaladi ghahedi ari nia neke valihari ira dongiki ka maneri, e ghua. 25Maneri dike va tanari ira nodi namaha mala vananina Zosepu ka ia sabarana manei ka ia hoatai ravata, vununa maneri dike to va kahe ghidi ta mala mahai taremehanana manei.

26Ka ia sura mehana Zosepu, maneri dike vanani lao ira namaha dike to hio laoriro ka sugana, nia maimanihi dufu hinae lao tuna ka kavana ka kenuna manei, dike ghua. 27Manei neke notohori ghinina di doli veha mo maneri ta ghuana, ghe neke kahe ghua nga iahi, “?Heve ne ghua mo manekusu nomu mama noke turi vanaguo ara ghau? ?Ne doli veha nga manei?”

28Maneri dike ungene tughui, “Ia nou maneriva agho ia nomai mama ghai mu ne doli nga nia ne doli veha nga e ghua.” Nia torongaghituturu tuna gedi maimanihi hinae ghu ka kenuna manei, dike ghua. 29Zosepu ka ia finini Benizemeni ia tahinamane, neke kahe ghua iahi, “?Iahi ghu mu ia tahimumane ta ite, noke turi ghinio ghau vanaguna ara? God e va beanigho agho tuugumaneo.” 30Zosepu magali ma neke kave lao ghu ka keha ringifotana la nakelena, vununa ia nona namaha ka Benizemeni neke toraina faa fuludu. Manei neke lao ghu ka ia ringifota nenemana taghonai neke la nakele ghu aianimu.

31Leghuna daloi manei ia hihilina, manei neke kave meha posi va gimaina ia hihingona, neke kahei ghu ta hio kaverira ira ghano.

32Zosepu dike va fafara vanani ka keha nenemana tevona nia ira tahinamane ka keha tevona, dike ghua. Ira noni Izipi dike auro aianimu dike va fafara vanadi nenema, vununa e beana ka ira noni Izipi ta mahai taremehadira ira noni Hiburu. 33Ira fototatahina dike nohe nokolo ka ia tevo tala laona ka Zosepu mo leghurira ira komuhudi, tatanigaina ka ia neke kusu dolio dufu ghu ka neke doli va nonoghanao. Di finini ghu ia nohe nokolo ka taghodi, maneri dike varimamato nodi ferena. 34Zosepu neke va kahe ghidi ira nona maneriva ta sopa kaikeri peleita ghanona maneri ka ira ghano ta au ka ia tevo taghona. Ia tufana Benizemeni mu neke faa varifata ka tufadi gaha mane. Maneri dike mahai nia ketuhu waeni taremehana ghu Zosepu dike toraina age hoviri ghu.

Currently Selected:

Tatanigaina 43: kji

Highlight

Copy

Compare