Ruum 6

Napatai do Kiduso nga Novijau si di Koristus

1Irad nopo diri, onupo dii tangaron tokou? Buli naku nong tumilombus tokou mamaal do duso, supaya muang-ruang i Kinoringan do opuavang mamarakat daton?#6:1 daton: ditokou 2Au, tantu do au buli! Ombo dii buli tumilombus tokou mamaal do duso kavagu sabap ausono kuasa diri duso si daton do irad do napatai tokou. 3Noilaan mujuno do ontok di botisai#6:3 botisai: boptoisai tokou, ontoki diri do nokopiiso tokou di Koristus Yisus. Komoion nopo dino nga nakavaja tokou diri kinapatajan Disido. 4Om irino di botisai tokou do irad do tanda do nakaavaja tokou di kinapatajan Disido, om nokorunggum tokou Disido linobong. Om irad di Koristus vinijau mantad di kinapatajan sabap di kagajaan di kuasa di TamaJo, om irad tokou nogi diri nga koimban do osiliu do avagu iri gaagaya do kovijaan tokou.

5Sabap nong nokopiiso tokou di kinapatajan di Koristus ontok di nobotisan#6:5 nobotisan: noboptoisan tokou, tantu do kopiiso tokou nogi diri kinovijaanJo kavagu. 6Noilaan tokouno do iri nopo gaagaya tokou laid nga nakavaja di Koristus pinasalib supaya kavaja iri gaagaya tokou laid diri kinapatajan Disido, om supaya auno monguripon kavagu i duso daton, 7do iri nopo tulun di napatai nga auno porintawon do duso.

8Nga sabap do nakavaja tokou di Koristus napatai, aparsaya tokou do kavaja tokou Disido mijau. 9Do noilaan tokouno do novijau i Koristus mantad si di tulun nongapatai om irino do auno apatai Isido kavagu sabap ausono kuasapo di kapatajan si Disido. 10Om kinapatajan nopo Disido diri nga sabap do i duso do tulun, om insan noo Isido napatai om au nono gosob salaid-laid. Nga kovijaan nopo Disido maino, irino supaya ourumat i Kinoringan.

11Jadi irad nopo diri, misti do minsoromo tokou do irad do napatai tokouno om sabap diri do koidu tokou mantad siri kuasa do duso. Nga maino nopo nga misti do ovijau tokou supaya ourumat i Kinoringan do nokopiiso tokou di Koristus Yisus. 12Sabap diri ada tokouno pobojoo kavagu i duso do momorinta dino kojuvan tokou i moilo matai, supaya aui avaja i kouvangan do ginavo tokou di araat. 13Ada do kivaro iiso boogian do kojuvan tokou do ipokuasa tokou do duso do pakajon mamaal di taraat. Nga ipokuasa tokou iti kojuvan tokou do Kinoringan i minomijau daton do irad di poimpatai tokoupo, nga maino novijau tokouno om ipapakai ino boogian do kojuvan tokou di Kinoringan do mamaal diri abanar. 14Do ada tokou mokiporinta do duso maino sabap porintawon tokou do Kinoringan iri opuavang mamarakat daton, om okonnoko porintawon tokoupo diri Undang-undang Ugama do Joudi.

Sumiliu Turipon Kumaa diri Abanar

15Na! Potingkuro dii maino? Auno obuli minsoromo tokou do, “Buli tokou mamaal do duso, sabap opuavang i Kinoringan do monguasa daton,#6:15 daton: ditokou om okonnoko porintawon tokoupo di Undang-undang Ugama do Joudi,” ka. 16Nga oilaan tokovi gia do isai-isai nopo iri pokiporintaan tokou, om irino pinokotuan i monguripon daton om irino vojoon tokou marong. Nong maja tokou di isuu di duso nga kakaa tokou si kapatajan, ko nong maja tokoupo di isuu di Kinoringan nga kakaa tokou si Disido i pakabanar daton. 17Nga monorimakasi okuno marong do Kinoringan do insan pun nokoinam kou uriponon do duso di pogulupo, nga nokotimpuun kouno do mangavi-avi di ginavo muju do maja marong di ponudukan do oinomod i noomit muju mantad di nituduk dikovu. 18Nga obojou kouno do pinoiduno mantad si duso supaya osiliu kou irad do turipon kumaa diri abanar.

19Maganu oku do poiradan do mitangar dikovu do ongoluoi kou supaya kaarati kou diti komoionku. Irino irad do turipon om tuan, do iri pogulupo nipasanganu muju i gaagaya do kasasaim om muang-ruang iri kararaat sino kojuvan muju. Irad nogi dino maino, do misti ipasanganu muju i gaagaya do abanar supaya lumidang kou. 20Om ontok diri inuripon koupo do duso, au kou rumalan maja diri abanar. 21Nga onu dii kountungan muju diri gaagaya muju do irad diri? Ausoi dii, do irino koikum-ikum dikovu maino, do koompusan nopo diri gaagaya muju nga kapatajan! 22Nga do maino nopo dii do nokoidu kouno mantad di duso, om nosiliu kouno do turipon do Kinoringan, om kountungan mujui do onuan kou dii do kolidango do ginavo muju, om koompusan nopo nga kovijaan di auso koovion. 23Do isuli nopo diri duso nga kapatajan, nga iri nopo itaak do Kinoringan toomod nga kovijaan di auso koovion, do nokopiisono di Koristus Yisus i Tuhan tokou.

Currently Selected:

Ruum 6: LabukPKV

Highlight

Copy