Ruum 3

1Jadi nong irad dino do okonko kouvangan do Kinoringan do kisunat si kojuvan noo, onuno kountungan do tulun Joudi mantad bansa vokon, om onu kogunaan do sunat? 2Oguui kountungan di tulun Joudi, koiso nopo nga nipaarap do Kinoringan diolo i tinangaran Disido. 3Jadi potingkuro nong kivaro tulun Joudi di au rumalan maja di tinangaran di nipaarapJo? Au naku ralanon do Kinoringan i nijanjiJo si diolo? 4Ralanoni Disido gia. Insan ovudutpo kasangkat i tongotulun siti vonuvo nga oinomodi soumur i Kinoringan. Irino irad di pointulis si Kitab do ka,

“Ou Kinoringan, kointalangi mantad di tinangaranNu do abanarKo,

om kotoriKoi nong insalawonKo do tulun,”

ka.#Antangai Buuk Sinding 51:4.

5Nga kivaro kama tulun do mitangar do irad diti, “I karaato di gaagaya tokou nga popointalang si di tongotulun vokon do otulid i ginavo do Kinoringan. Nong irad dino au otulid i ginavo do Kinoringan do mongukum di duso tokou,” ka. -- Nga iti nopo tangar do tulun toomod. -- 6Tantu otulid i Kinoringan, do nong au otulid, au kadapat Isido mongukum di tongotulun siti vonuvo.

7Nga kivaro kama tulun vokon do mitangar do irad diti, “Nong mantad di tangarku do au oinomod do pointalang marong do oinomod i Kinoringan gosob do oruangan i kagajaanJo, om nokuro do mongukum i Kinoringan dogo do tulun oku kiduso?” kangku daa. 8Nong oinomod i tangar di tulun do irad dino, buli nogi isido mitangar do, “Gaam nogi do vaalon tokou i araat supaya rumikot i aandai,” ka. Nga kivaro tulun pakaraat dogo do manantam do inono ponudukanku! Nga tulun nopo do mitangar do inong dino nga apatutno do oukuman do Kinoringan.

Kasangkat do Tulun nga Kiduso

9Jadi potingkuro batoi, ouli-uli ikoipo dii tulun Joudi naku mantad di bansa vokon? Aui gia, nakatarangkuno do i tulun Joudi ko tulun okonko bansa Joudi kasangkat nga porintawon do duso. 10Irino irad di nokotulis si Kitab do ka,

“Auso iiso tulun do abanar,

insan iisopo nga auso.

11Auso iiso kaarati nong isai i Kinoringan,

om auso iiso uvang sumamba Disido.

12Om kasangkat do tulun nga sinumondiang do Kinoringan om napalid.

Auso iiso tulun mamaal do aandai,

insan iisopo nga auso,”

kadiri tinangaran si Kitab.#Antangai Buuk Sinding 14:1-3; 53:1-3; Monunuduk 7:20.

13“Katatangaro nopo do kabang diolo nga araat

irad do ovutong sumoribau mantad si lobong di poingukab,

om dila nopo diolo nga agaan do monoro,”

kadiri tinangaran vokon.

“Om tinangaran nopo diolo nga pokoruol di ginavo do tulun vokon

irad di bisa do vulanut mantad si kabang diolo,” ka.#Antangai Buuk Sinding 5:9; 140:3.

14“Om poimponu i kabang diolo do tulus om kovuvusung,” ka.#Antangai Buuk Sinding 10:7.

15“Alangkis iolo mongoi mamatai do tulun.

16Isai-isai nopo avajaan diolo nga osusa om ogorovot.

17Au maja iolo di gaagaya do miandai,” ka.#Antangai Yasaya 59:7-8.

18“Om aupo nokoilo iolo

potingkuro rumosi do Kinoringan,”

kadiri tongotinangaran si Kitab.#Antangai Buuk Sinding 36:1.

19Nga maino nopo oilaan tokovi do onuu nopo i tinangar si Undang-undang Ugama do Joudi nga pinorikot si dagai i tulun do Joudi, do porintawon ikoi di Undang-undang Ugama diri, supaya ausoi koontodon do pokoinomod di gaagaya tokou, om oilaani do kasangkat i minijon siti vonuvo nga oukuman do Kinoringan. 20Do irino do auso iiso tulun kavaja di Undang-undang Ugama Joudi do abanar si di Kinoringan, sabap Undang-undang Ugama nopo diri nga kunomo do pongilaan do kiduso i tulun.

Pakabanaron do Kinoringan i Tulun do Aparsaya di Yisus Koristus

21Nga do maino pinointalang di Kinoringan nong potingkuro obuli Isido pakabanar di tulun. Nga okoniko do pakabanar Isido diolo do maja di undang-undang. Nga insan irad diri, iri nopo Undang-undang Ugama do Joudi om i buuk tinulis di tongonabi nga papasaksi do okoniko maja di undang-undang do pakabanar i Kinoringan di tongotulun. 22Irino do pakabanaron do Kinoringan kasangkat do tongotulun di aparsaya di Yisus Koristus, sabap i kaparsayaan diolo di Koristus, do ausoi pisondiangan di tongotulun, 23do kasaangkat nga nakapamaal do duso om nokoinsodu mantad di vinaang do kagajaan di Kinoringan. 24Nga nong aparsaya iolo di Koristus Yisus i minongolukat diolo mantad di duso diolo, nga pakabanaroni toomod di Kinoringan iolo sabap opuavang Isido. 25Do natantuno di Kinoringan do posiliu di Yisus Koristus do isogit supaya oompunan i duso di tongotulun. Nong aparsayai i tulun diri raa di Koristus do nokotuntug do mongugas di dusojo, nga oompunani isido. Do irad nopo diti poontong i Kinoringan do otulid Isido. Do iri nopo pogulu nga pinobojou di Kinoringan i tongotulun mamaal do duso sabap do au oribau i ginavoJo do araatan om au turus mongukum diolo. 26Nga do maino nopo om popoontong Isido di kotulidoJo do mongukum Isido di duso do tulun. Irino koilaan tokou do otulid i Kinoringan, om nogi pakabanaron Disido i tulun diri aparsaya di Yisus.

27Jadi kivaro naku jalan tokou do misinggagajo nong maja tokou di Undang-undang Ugama do Joudi? Ausoi. Nokuro do auso? Sabap pakabanaron tokou di Kinoringan do aparsaya tokou di Koristus, om okoniko mantad di gaagaya do aandai. 28Om iradno diti komoion marong dino, do pakabanaron i tulun di Kinoringan sabap aparsaya isido di Koristus, om okoniko mantad di kaandaiojo sabap maja di Undang-undang Ugama do Joudi. 29Jadi potingkuro? I Kinoringan nopo nga i Kinoringan di tulun Joudi noopo naku? Okoni bato i Kinoringan nopo nga i Kinoringan di tongotulun di okonko bansa Joudi? Oono, 30sabap i Kinoringan nopo nga isoi. Om pakabanar Isido di tulun Joudi om i tulun di okonko bansa Joudi nong aparsayai iolo di Koristus. 31Jadi obuli naku komoion do mongolijot tokou diri Undang-undang Ugama do Joudi sabap do aparsaya tokou di Koristus? Aui, okonko mongolijot tokou nga irino monukung tokou di Undang-undang Ugama diri.

Currently Selected:

Ruum 3: LabukPKV

Highlight

Copy