Golotia 4

1Nga komoionku nopo om irad di tanak i manansanganu di porompon di tamajo, do insanpo mai do kasanganu isido kasangkat do barang diri, tapi irad di turipon isido salaid#4:1 salaid: salama do tanganakpo. 2Do ontok diri, jagaanpo isido di tulun iri kinorunggumojo om i momimiara di barang do songonuvonjo, gosob do norikot i maso irad di nibilin di tamajo laid. 3Om tokou nogi nga irad diri tanak di pogulupo, sabap do uriponon tokou di rogon siti vonuvo. 4Nga korikotpo dii marong i maso diri natantu om suuo nogi dii di Kinoringan i TanakJo mongoi siti vonuvo i nipaanak di iso tongondu, om porintawon Isido di Undang-undang Ugama do Joudi. 5Jadi irad dino mongolukat Isido di tulun di porintawon do Undang-undang Ugama diri supaya obuli Isido mananganak daton.#4:5 daton: ditokou 6Nga sabap do osiliu tokou do tangaanak do Kinoringan, om irino dii kinoponuuan Disido di Tatod di TanakJo masu si ginavo tokou gosob do mongoloou i TatodJo do mokiAmo, Amo! 7Nong irad dino okonnoko pinokoturipon tokoupo nga pinakatanak tokouno Disido. Jadi nong tangaanak tokou do Kinoringan, nga kaanu tokou nogi kasangkat diri posongonuvon Disido di tangaanakJo.

Osusa i Ginavo di Poulus di Tulun Golotia

8Di aupo kotutun kou do Kinoringan, ikovuno pinokoturipon do rogon i roitan muju do, “Tongokinoringan iri,” ka, nga okoniko Kinoringan iri. 9Nga maino nopo dii do nokotutun kouno do Kinoringan, nga apatut do tangaronku i Kinoringan do kotutun dikovu, om monguropo dii do mokiuripon koupo kavagu di rogon siti vonuvo diri auso guna-guna iri oluoi om omiskin? 10Momuadat kou noopo diri tongotadau, om vulan, om maso tadau tagajo, om pomutounan. 11Osurau oku nong osia-siano iri karajaku sino dikovu.

12Oou kosusuladanku, pokionuonku marong dikovu do sumugut kou dogo do au oporintaan do Undang-undang Ugama do Joudi, do ioku nga nosiliu inongi dikovu tulun di okonko bansa Joudi. Om aupo insan kou sumala si dogo. 13Ondomo mujuno do ontok di timpuuni do mangaabar oku dikovu diti Abar do Aandai irino sabap do kitoruol oku. 14Om songkuropo toruolku diri do poposusa dikovu pun au okui posuribakon dikovu, nga pinoindakod okui dikovu do inong di moloikat do Kinoringan, ko inongpo di Koristus Yisus pinoindakod oku dikovu. 15Do songkuro kasanango di ginavo muju ontok diri nga maino onuno dii koompusan? Aparsaya oku dikovu ontok diri do nong adapat-dapat mujupo daa monungkit#4:15 monungkit: monuvil mongidu ino mato muju, nga sungkitonno#4:15 sungkiton: suvilon om pataakon muju daa dogo sabap do kaandaio di ginavo muju. 16Nga soromononku maino nosiliu oku kama do musu muju sabap do porongou oku dikovu diri ponudukan do oinomod.

17Iri nopo tongotulun mamamalid om mongoi papaabar marong di tinangaran dikovu nga okoniko aandai iri tujuanjo, do tujuan nopo diolo diri nga poporijang daton#4:17 daton: ditokou supaya do maja kou marong diolo. 18Nga nong kabatuki i tujuan, aandaii do soumur ogiat kou di gaagaya do aandai, om okoniko ontok noopo do poirunggum oku si dikovu. 19Oou tangaanakku di au kojuuanku, nasansara okuno kavagu kopurimananku sabap dikovu, irad di tongondu do asansara monsusu, om asansara okupo salaid do i gaagaya muju di aupo koinong diri gaagaya di Koristus. 20Nga uvang okuno marong daa nong sino okuno poirunggum dikovu maino, supaya do okoniko iti-iti noo tangaronku dikovu daa, do nolijotno iti sinoromoku dikovu.

IAgar om i Sara Pinoiradan

21Oou dikovu kosusuladanku iri uvang do mokiporinta di Undang-undang Ugama do Joudi, kinam koupo rumongou dogo do patarangonku dikovu iri ponudukan do oinomod i nokotulis siri buuk do Undang-undang Ugama do Joudi. 22Do siri nopo nga kivaro nokotulis do minaganak iIbraim do duvo kusai. Iri nopo koiso om tanakjo di tongondu turiponjo iri pinaapid, om iri nopo koduvo nga tanakjo diri tongondu okonko turipon. 23Nga iri nopo tanak di tongondu pinokoturiponjo om najadi irad di koubasan do tulun, nga iri nopo tanak di tongondu di okonko turipon najadi sabap nijanji mantad di Kinoringan.

24Iti nogi onuon do poiradan do mongiduvo iolo tongondu diri nga poiradan diri duvo piniokunan do Kinoringan si di tongotulun. Iri nopo koiso om iAgar ngaranjo, om minaganak isido di sumiliu do turipon. Om iAgar nopo nga poiradan nogi di Undang-undang Ugama do Joudi, i nitaak do Kinoringan siri Kulud#4:24 kulud: kotud do Sinai. 25Om Kulud do Sinai nopo nga siri Vonuvo Arab. Om iAgar nogi nga miirad diti Bandar Yorusalim maino do uriponon, do i tongotulun mijon siri Yorusalim nga pinokoturipon di Undang-undang Ugama do Joudi irad di tanak diAgar do uriponon. 26Nga iri nopo Yorusalim si savat suruga om irino irad di savo diIbraim i tongondu di okonko turipon, i Sara ngaranjo, om i Yorusalim si savat suruga nga irad do pinokotidi tokou. 27Do kivaro siri Kitab nokotulis do irad diti,

“Ou dika tongondu, kaandaiaino i ginavonu

do ika au nokokinam do maganak.

Pongoluvapno om sajauno do

ika do au insan asansara monsusu.

Do iri nopo tongondu di noiduan do savo

om lobi-lobipo ginuu do tanak mantad do tongondu di kisavo,”

kadi tinangaran si Kitab.#Antangai Yasaya 54:1.

28Oou kosusuladanku, tokouno iti tangaanak do Kinoringan i najanji do Kinoringan, do itokouno irad diIsak do naanak diIbraim sabap i nijanji do Kinoringan. 29Nga ontok diIbraim, iIsmail nopo nga nosusu irad di koubasanan di tulun, nga pokoruol isido diIsak, irino i tanak diri nosusu mantad do kuasa di Tatod do Kinoringan. Om irad nogi dino maino, do iri nopo tongotulun maja di Undang-undang Ugama do Joudi nga pokoruol diri tongotulun do maja di Koristus. 30Nga onu kadi natangar siri Kitab? Kadi tangar do Kinoringan siri Kitab, “Adaaino ino tondu turipon mivaja dino tanakjo, do ino nopo tanak do turipon om aui oboogijan dino songonuvon di tanak diri tongondu di okonko turipon,” kadi Kinoringan.#Antangai Kinovorunan 21:10. 31Oou kosusuladanku, irad nopo diri, itokou nopo nga irad di koturunan diri tondu di okonko turipon, okoniko irad di koturunan diri tondu di turipon.

Currently Selected:

Golotia 4: LabukPKV

Highlight

Copy