Golotia 5

Tatapno siri Kinoiduan Muju mantad Kuasa di Undang-undang Ugama

1Tokou nopo maino nga okonko irad di turipon do misti maja diri Undang-undang Ugama do Joudi, sabap i Koristus pinapalapas daton!#5:1 daton: ditokou Sabap diri do tatapno siri kinoiduan muju om adano mokiuripon kavagu diri Undang-undang Ugama do Joudi.

2Pongorongou kouno marong! Ioku i Poulus do popoilo dikovu nong mokisunat kouno, nga auso dii guna muju di Koristus. 3Porongoonkupo kavagu ikovu do pointikid-tikid di tulun do mokisunat nopo nga misti do maja kasangkat di Undang-undang Ugama do Joudi. 4Om ikovu nopo dino i mangaarap di Undang-undang Ugama do Joudi do pakabanar daa dikovu si di Kinoringan nga nokoinsodu kouno dii mantad di Koristus om nokoidu kouno dii mantad di ginavo do Kinoringan do opuavang dikovu. 5Nga ikoi nopo om miintong do kaanu di iarap-arapja, irino do pakabanaron ikoi di Kinoringan sabap aparsaya ikoi di Koristus mantad do kuasa di Tatod do Kinoringan. 6Do ii nopo tongotulun di nokopiiso di Koristus Yisus nong mokisunat ko au mokisunat pun miinongi do ausoi kountungan. Nga iri aparsaya di Koristus oporlu, do irino popoimbulai di ginavo do au kojuu di tulun vokon.

7Do iri nopo di pogulu om olosu kovi marong maja diri ponudukan di oinomod. Nokuroi do pobojoon muju i tulun monginlolomok#5:7 monginlolomok: mongindolomok ko monginlalamok. Irino komoion do mitangar supaya mikubobojo i tulun manaak di kouvangan dikovu popotingkod maja diri ponudukan di oinomod? 8Nga ii nopo nakabajajat dikovu om okoniko mantad di Kinoringan iri minongoloou dikovu. 9Insanpo mai do okuyak i ponudukan di au oinomod nga irad di poudor, do insan okuyak nga kakambangi di kasangkat do tapung. 10Nga atatap marong i ginavoku sabap kopiiso tokou di Tuhan do ausono daa soromoonon muju sondiang mantad dogo. Nga isai-isai nopo iri tulun di momoringou di ginavo muju om irino oukuman do Kinoringan.

11Oou kosusuladanku, ioku nopo dogo aui monuduk do oporlu iri sunat supaya kaanu do kovijaan do auso koovion, om irino dii do pokorualan oku di tongotulun Joudi. Do insan monuduk okupo pasal diri kapatajan di Koristus siri salib, nong monuduk oku nogi do oporlu iri sunat nga aui rumaatan i tongotulun Joudi dogo. 12Nga tulun nopo diri momoringou dikovu do monuu do monunat nga aandai nogi do rumijang iolo supaya obojou di kouvangan diolo kondiri om aui obojou momoringou dikovu.

13Oou dikovu i kosusuladanku, pinoidu kouno mantad do maja diri Undang-undang Ugama do Joudi, nga okoniko pinoidu do maja diri kouvangan muju kondiri, nga irino do apatut kou do moiuup-uup sabap do au kojuu di tulun vokon. 14Do kasangkat diri ponuuan saralom do Undang-undang Ugama do Joudi nga nountun sumiliu do iso ponudukan do irad diti, “Misti do auko kojuu di tulun vokon irad dino kojuvannu kondiri,” ka.#Antangai Imam 19:18. 15Nga nong auso ginavo muju do irad dino, koguru kouno di gaagaya do dupot do moisisinduol kou kondiri, nga antatangai mujuno supaya au kovi moipapatai.

Gaagaya di Tatod do Kinoringan om Gaagaya do Tulun

16Nga itino tangaronku dikovu do misti do mokiporinta kou soumur di Tatod do Kinoringan supaya om au kovi kaavaja diri kouvangan do kojuvan muju diri araat. 17Do kouvangan muju nopo diri araat nga kumilavan diri kouvangan di Tatod do Kinoringan, om kouvangan nopo di Tatod do Kinoringan nogi nga kumilavan di kouvangan muju di araat, om mongiduvo diri nga au miandai, supaya aui olumbusan muju maja iri kouvangan muju daa. 18Nga nong noporinta kouno di Tatod do Kinoringan, nga iri nopo Undang-undang Ugama om auno monguasa dikovu.

19Do gaagaya nopo do tulun mantad di kouvangan do ginavojo kondiri om atalangi do irad diti: mamaal kalalasu, mikaraja do asaim, monongondu, 20sumamba di okonko i Kinoringan, kitoilaan, moibobonsi, moiodu-odu, mongimbogu, obingungos, mokiinggojoo do ngaran, moititimbai, rumijang do kivaro karaatan, 21tumaai,#5:21 tumaai: dumangi moginovukan, moginakanon di auso gosob om oguupo mantad diri. Kasangkat diri nitaalikku#5:21 nitaalik: nosiat dikovu pogulu, iri nogi itaalikku dikovu maino do tulun nopo do kivaro gaagaya do irad diri nga aui kadapat masu siri Kopomorintaan do Kinoringan.

22Nga gaagaya nopo do tulun kivaro Tatod do Kinoringan om atalangi do au kojuu do vokon, om i ginavo oponu do kasanangan, osondod i ginavo, alanut i ginavo, obinsianan, aandai i ginavo, obintuman do janji, 23osuribak i ginavo om kokodos. Om nong irad dino gaagaya tokou nga maja tokou di undang-undang do Kinoringan. 24Tongotulun nopo diri nasanganuno di Koristus Yisus om napataino diolo iri gaagayajo taraat, irino gaagaya do tulun om kasangkat diri kouvangan do kojuvan di araat#5:24 kouvangan do kojuvan di araat kiarati do kiginavo do mangantak. om i kouvangan do ginavo do araat. 25Nga nong Tatod nopo do Kinoringan minanaak do kovijaan tokou, om misti tokou soumur maja diri isuu Disido. 26Ada tokouno misinggagajo, om moiruruol do ginavo om moitaai-taai.

Currently Selected:

Golotia 5: LabukPKV

Highlight

Copy