Susuuon 12

Pokoruol i Raja di Tongotulun i Naparsaya di Yisus

1Om ontok diri, timpuunno dii i Raja Irudis pokoruol di tongotulun i naparsaya di Yisus siri poiuuntunan. 2Om minonuu isido monotok di liou di Yakub,#12:2 I Yakub nopo nga tanak di Jobidi om iakajo di Yaya. Isidono iri susuuon di Yisus i pinatai di Raja Irudis Ogoripa. iakajo di Yaya. 3Kaantangai nopo dii di Raja Irudis do aandaian i tongotulun Joudi do napatai i Yakub om suuojono dii i soujorjo do manangkap di Pitrus nogi. Nga ontok diri om Tadau Tagajo di tongotulun Joudi do Kapangakanan diolo Kuui do Auso Poudor. 4Katangkap nopo dii diolo i Pitrus, om pojiilo nogi dii diolo. Om kivaro opulu om onom soujor taraapat-apat moisusuvoli mangajaga di Pitrus saralom jiil. Natantuno daa di Raja Irudis do mongindad do katalib i Tadau Tagajo do Paska, om ovito nogi dii disido i Pitrus lumabus do bisarawon si gotuvang di tongotulun om patajon nogi dii disido i Pitrus.

5Ontok di nataan i Pitrus siri jiil, ogiat marong i tongotulun si poiuuntunan do tulun di aparsaya do sumambayang di Pitrus do mokitulung do Kinoringan.

Pinalabus di Moloikat i Pitrus mantad siri Jiil

6Om korikot nopo dii i sodop dii do aupo mongovit i Raja Irudis di Pitrus lumabus supaya bisarawon isido, om nokoodop isido siri pialatan duvo soujor. Gibang vanan di longon di Pitrus kinagasan do rantai si longon di soujor siri misampapingjo. Om iri nopo koiso soujor mangangajaga nga poingkakat siri pintu di bilik. 7Om tigog kai dii do nokorikot iso moloikat di Tuhan om tumitiu i vinaang siri bilik do jiil. Om tapapo dii di moloikat i Pitrus, om kadisido, “Posikno kosikap!” ka. Om turus rinumatu toomod i tongorantai si longon di Pitrus.

8Om kadi moloikat kavagu di Pitrus, “Pokogosono ino kambot sino tavaknu om panangkasutno,” ka. Om vojoono dii di Pitrus i tinangarjo. Om kadi moloikat kavagu, “Kurilibono#12:8 Kurilibo: Pasapajo si tongokajab ino sabungnu om kayono vajano dogo,” ka. 9Om vajano dii i Pitrus di moloikat mampanau lumabus mantad si jiil. Nga okonko oilaan di Pitrus do obontol iri vaalon di moloikat. Panantaman nopo daa disido om nipoontong si disido iri moloikat. 10Om labusno dii iolo siri iso pintu i jinagaan di soujor, om talibno dii iolo di koduvo pintu do kivaro soujor mangangajaga, om nokorikot iolo siri pintu bosi i mongoi siri bandar. Om minukab dii toomod iri pintu bosi, om labusno dii iolo. Om pampanauno dii iolo duvo di moloikat siri iso ralan, om tigog kai dii do linumijot iri moloikat diri.

11Kopurimanai nogi dii di Pitrus do sabanar do nakalabus isido mantad siri jiil, om kadisido, “Na, baru nogi dii oilaanku do obontol do sinuu di Tuhan i moloikatJo mongoi monulung dogo. Om popoidu Isido dogo mantad do kuasa di Raja Irudis, om mantad do kouvangan di tulun Joudi do mamatai dogo,” ka.

12Koilaai nopo dii di Pitrus do irad diri, om ongoino dii isido siri valai di Moria, iinojo di Yaya Markus. Om oguu dii i tongotulun minuntun siri do sumambayang. 13Korikot nopo dii i Pitrus siri valai om kotukono dii disido i pintu si luar. Om korikot iso raraa gogojian, ngaranjo i Rouda, do mongorongou disido. 14Kotutunai nopo dii disido i dolou di Pitrus, om aandaian dii marong i ginavojo gosob do noolingan disido mongukab i pintu. Nga panangkusno#12:14 panangkus: pogundak dii isido gumungguli do masu si saralom do popoilo di tongotulun, “Silono i Pitrus nokorikotno poingkakat si luar,” kadisido.

15Jawapno dii iolo do ka, “Mulaukoi,” ka.

Nga ogiat i Rouda mitangar do, “Oinomod bo do silo i Pitrus,” ka.

Nga kadiolo, “Irino moloikatjo kama,” ka.

16Nga au tumingkod i Pitrus mongotuk di pintu. Jadi ongoiono dii diolo ukabai i pintu, om kaantangai dii diolo i Pitrus om osumboijan dii marong iolo. 17Om mapoi-kapoi dii i Pitrus do popootos diolo do ongolalava. Nokootos nopo dii iolo, om pangaabarno dii i Pitrus diolo pasal di Tuhan do pinapalabus disido mantad siri jiil. Om ponuuno dii isido diolo do ka, “Poiloo muju i Yakub om i tongosulod vokon i naparsaya di Yisus diti abarku,” ka. Om pampanauno dii isido mongoi sondiang pantok.

18Kanavau nopo dii di susuvab, om okonko aalang-alang iri tongosoujor osurau mogium nong sinombo i Pitrus. 19Om sinuu di Raja Irudis i tulun do mogium di Pitrus, nga aui dii nosomungan diolo. Jadi tikidono dii disido i tongosoujor mongoduat, om ponuu dii i Raja Irudis di soujor mamatai di tongosoujor iri minangajaga di Pitrus siri jiil.

Katalibpo dii iri om ongoino dii i Raja Irudis mantad Bandar Yorusalim do mijon soi Bandar Koisoria.

Napatai i Raja Irudis

20Kivaro iso maso do naraatan marong i Raja Irudis di tulun siri Bandar Tirus om Sidun. Nga monguasa i Raja Irudis di vonuvo nontodon di tongotaakanon di tulun Tirus om Sidun. Jadi taanon daa dii di raja iri tongotaakanon diolo do au polobuson sabap araatan isido. Om irino dii kosusaan di tongotulun Tirus om Sidun diri. Jadi minongoi iri piipiro tulun mantad siri Tirus om Sidun do sumamung di iso tulun, ngaranjo nopo nga i Balatus. Isidono monguasa do valai di Raja Irudis. Om papaabar iri tongotulun di Balatus di kosusaan doisido. Om samung nogi dii iolo di Raja Irudis do mokianu kopiandaian.

21Korikot nopo dii i tadau pinili di Raja Irudis do sumamung di tongotulun diri om panansabungno dii isido di sabungjo, irino sabung do raja. Om ongoino dii isido si toogomonjo do mitangar di tongotulun. 22Om sonluluvap dii i tongotulun di Raja Irudis do ka, “Okonko tulun ilo, i pinokokinoringan ilo,” ka. 23Om aandaian dii i Raja Irudis di tongotulun do mangarajou disido. Jadi tigog kai dii do pokorualai dii di moloikat do Tuhan i Raja Irudis sabap nga au mongurumat isido do Kinoringan. Om ginirason dii i raja gosob do napatai.

24Nga makin nogi tumongkop i tinangaran di Kinoringan om muang-ruang dii i tongotulun i naparsaya di Yisus.

I Banabas om i Soul Pinili do Popitongkop di Abar do Aandai

25Nokoopod nopo dii i Banabas duvo di Soul di kurion diolo soi Bandar Yorusalim om uli nogi dii iolo soi Bandar Ontukia. Om pinavaja nogi diolo i Yaya pinonguranan do i Markus.

Currently Selected:

Susuuon 12: LabukPKV

Highlight

Copy