2 Korintus 6
6
1Ikoi nopo do songkoruangan nogi do Kinoringan kumaraja, om mokitulung ikoi marong dikovu supaya ada muju posisiawo i ponudukan iri naramit muju do i Kinoringan opuavang mamarakat dikovu. 2Do kivarono tangar di Kinoringan si Kitab do ka,
“Ontok di maso di kinouvanganKu
om norongouKuno i sambayangnu,
om maso di noonuanKu ika di kovijaan nga notulungKui ika,”
kadi Kinoringan.
Om sabanar marong itino maso maino komoion diri do kouvangan do Kinoringan, om itino tadau diti do koonuan do tulun di kovijaan.#Antangai Yasaya 49:8.
Kosusaan di Poulus
3Om lumogos ikoino papaandai do gaagayaja supaya ausoi katangaran do tulun pakasala diti dagai do ponudukan, om okoniko kivaro kapalid do tulun diti ponudukanja. 4Om onuu nopo gaagayaja nga tandaian dagai do pointalang si tulun vokon do kumaraja ikoi si di Kinoringan, irino do alanut i ginavojo do sumangal#6:4 sumangal: tumaan saralom do kosusaan, om kosimpitan om kasansaraan, 5irad do pinloloposon ikoi, om pojiilon ikoi, om urunan ikoi, om sukupja monginontob kumaraja, om piipiro sodop do au koodop om impiipiro do au kaakan. 6Om iti nogi gaagayaja do popointalang si di tulun vokon do kumaraja ikoi si di Kinoringan, irino do mantad di kolidango do ginavoja, om toilaanja pasal do Kinoringan, om kolonuto do ginavoja, om kaandaioja, om pokiporintaanja do Tatod do Tolidang iti dagai do gaagaya, om oinonomod do au kojuu ikoi do tulun vokon, 7om mangaabar ikoi di oinomod om i kuasa do Kinoringan. Om irino gaagayaja do abanar i pinokosindataja do lumavan ko monirung. 8Kivaro mongurumat, om kivaro mangaraat dagai; kivaro mangarajou om kivaro pakasala. Pokovuduton ikoi, ombo bala do oinomod i tangarja. 9Om anggapon ikoi do au otutunan di tulun do susuuon ikoi di Yisus, nga otutunan ikoji di kasangkat do tulun, om insan potingkabangpo kapatajan nga ovijau ikoji, om insan sindualan ikoipo nga aui sampai do otilus ikoi. 10Om insan oludus#6:10 oludus: olunggui ko osusa marong ginavo ikoi nga asanang i ginavoja, om omiskin ikoi daa kaantangan do tulun nga ikoi nogi pakaya do ginuuan do tulun do kovijaan mantad di ponudukanja, om insan tulun ikoi do auso nunuu nga songonuvonja kasangkat do onuu nopo si di Kinoringan.
11Oou dikovu tulun si Korintus, pinavantangjano marong dikovu onuu nopo iri opurimanan do ginavoja. 12Om ikoi nopo mimang do au kojuu dikovu, nga ikoi nopo sino dikovu om au songkuro i ginavo muju dagai. 13Nga aandaian oku monosiat dikovu do iradonku do tanakku kondiri, irino do poimbulajo mujuno iri ginavo muju do au kojuu dogo do irad di ginavoku do au kojuu dikovu. Ovi-ovio mujuno ino ginavo do au kojuu marong dagai.
Pogoduan do Rumunggum di Tulun di Au Aparsaya
14Ada kouno sumompuu do tulun di au aparsaya, sabap au kopiirad. Do mimang au kadapat iri tulun do abanar rumunggum diri tulun do au mangasip do Kinoringan. Om au kadapat iri tanavau, irino tulun di aparsaya, rumunggum diri totuvong, irino tulun di au aparsaya. 15Om au kadapat miandai di Koristus om i kotua do rogon, om irad nogi dino i tulun do aparsaya do au kopiinong di gaagaya do tulun diri au aparsaya. 16Om au obuli i patung pinokokinoringan di tulun kaapir do pokoyon si valai do Kinoringan. Om itokouno iri valai do Kinoringan do maja di natangar di Kinoringan do irad diti,
“Mindada Oku si diolo
om manau-panau Oku si pialatan diolo.
Om Iokuno i Kinoringan i monguasa diolo
om iolono iri sumamba Dogo,”
kadi Kinoringan.#Antangai Imam 26:12; Yoromia 32:38; Ijikiol 37:27.
17Om iri nogi kinatangaran do Kinoringan irad diti do,
“Rijang kouno mantad di tulun di au aparsaya
om insodu kouno diolo,” kadi Tuhan,
“om adaaino i ri sasambawon iri okonko Kinoringan do arangon Disido iri,
om torimawonKui ikovu.#Antangai Yasaya 52:11; Ijikiol 20:34, 41.
18Om Iokuno pinakatama muju,
om ikovuno pinakatanakKu do kusai om tongondu,”
kadi tangar di Tuhan i Agajo Marong Kuasa.#Antangai 2 Somuil 7:14; 7:8.
Currently Selected:
2 Korintus 6: LabukPKV
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.
