羅馬書 16
16
請安
1我對恁推薦咱的姊妹菲比，伊是堅革哩教會的執事。 2請恁因為主的緣故，照信徒的本分給伊接待。伊有什麼需要，請恁給伊幫贊。伊一直熱心幫贊真多人，包含我本身。
3請替我給百基拉及亞居拉請安；𪜶及我是佇基督耶穌內面的同工。 4𪜶曾為著我冒性命的危險；毋若我，連所有外邦的教會嘛攏欲給𪜶感謝。 5嘛給佇𪜶兜啲聚集的教會請安。
請替我請安我所疼的以拜尼土；伊是亞細亞頭一個歸信基督的人。 6嘛請安為著恁受真多勞苦的馬利亞。 7閣給我的親族，及我做夥關監的安多尼古及猶尼亞請安；𪜶佇使徒中是有名望的人，比我較代先歸信基督。
8請替我請安主內我所疼的暗伯利。 9請安佇基督內面的同工耳巴努及我所疼的士大古。 10請安佇基督經過考驗的亞比利。給亞利多布家內的人請安。 11給我的親族希羅天請安。給拿其數家內信主的人請安。
12請替我請安為著主受真多勞苦的土非拿及土富撒。給所疼的彼息請安；伊曾為著主勞苦工作。 13請安佇主受揀選的魯孚及伊的老母；伊的老母嘛是我的老母。 14給亞遜其土、弗勒干、黑米、八羅巴、黑馬，以及及𪜶做夥的兄弟姊妹請安。 15給非羅羅古及猶利亞，尼利亞及伊的姊妹，及阿林巴，以及及𪜶做夥的眾信徒請安。
16恁著親切互相請安。基督的眾教會攏給恁請安。
最後的勸勉
17兄弟姊妹，我苦勸恁，著小心提防許個製造分裂，互恁犯罪，違背恁所領受的教示許個人。 18因為此款人毋是作僕人啲服事咱的主基督，是啲顧家己的腹肚，用花言巧語誘惑老實人的心。 19因為恁的順服，眾人已經攏知，所以我為著恁歡喜。我愛恁對好事著巧，對歹事著戇。 20賜平安的上帝真緊就會將撒旦踏碎，互伊屈服佇恁腳下。
願咱的主耶穌的恩惠及恁同在！
21我的同工提摩太以及我的親族路求、耶孫、所西巴德給恁請安。
22我德提，就是此張批的代筆人，佇主內給恁請安。
23接待我及全教會的該猶給恁請安。此個城的會計長以拉都及咱的兄弟括土嘛給恁請安。#16.23 有的抄本有 24 節「願咱的主耶穌基督的恩惠及恁大家同在。阿們！」
頌讚
25願榮光歸互上帝！伊會照我所傳的福音，就是所宣揚的耶穌基督，來堅固恁的信心。此個福音是萬古以來所隱密的奧妙， 26今已經照永活上帝的命令，通過眾先知的冊顯明出來，欲互萬民知，通信來順趁。
27願榮光通過耶穌基督歸佇獨一全智的上帝，直到永遠。阿們！
Currently Selected:
羅馬書 16: TTVH
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2021
