雅各書 4
4
毋通及世間作朋友
1恁中間的鬥爭及爭執對叨位來？豈毋是對恁肢體中間不時啲爭執及鬥爭的慾望來？ 2恁想欲得著，得𣍐著，就欲刣人。恁慾望滿滿，毋拘𣍐當滿足，就爭執鬥爭。恁得𣍐著所愛的，因為無對上帝求。 3恁祈求，毋拘得𣍐著，因為恁的動機毋好，所求的干焦是欲滿足家己的快樂。 4恁諸個毋信的人啊，豈毋知及世間作朋友就是及上帝作對敵？ 5聖經講：「上帝深深意愛伊囥佇咱內面的神」，#4.5 此句嘛通譯做「上帝囥佇咱內面的神深深意愛咱到欲起怨妒。」恁想聖經所寫此句話無意思是無？ 6不過上帝賜咱的恩典閣較大。因為按呢，聖經有講：
上帝敵對驕傲的人，
施恩互謙卑的人。
7所以，恁著順服上帝，反抗魔鬼，魔鬼就會逃走離開恁。 8著親近上帝，上帝就會親近恁。罪人啊，著洗恁的手；無定性的人啊，著潔淨恁的心。 9著悲傷，哀痛，啼哭；著互恁的快樂變做悲哀，歡喜變做憂愁。 10著佇主的面前謙卑，伊就會給恁高升。
毋通批判兄弟抑是姊妹
11兄弟姊妹，毋通互相講歹話。講兄弟姊妹的歹話，批判兄弟抑是姊妹，就是講律法的歹話，批判律法。你若批判律法就毋是律法的遵守者，是律法的批判者。 12律法的制定者及審判者只有一位，伊會拯救，嘛會毀滅。你是啥人，哪敢批判你的厝邊？
毋通誇口
13呃，恁聽我講。有人講「今仔日抑是明仔載阮欲去某一個城，佇遐住一年，做生理賺錢」。 14恁連明仔載性命會變按怎都毋知！恁假若濛霧出現一下仔久連鞭就消失。 15恁應該按呢講：「主若願意，阮就會活，通做此項做彼項。」 16恁現在敢驕傲自大；此款的驕傲攏是邪惡。
17所以，人知影著做好事，無去做就是犯罪。
Currently Selected:
雅各書 4: TTVH
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2021
