Ruma 9

Pablu Gafanaliwan Dawdaw, te, Taw Udyu wa Ngayu Tagafanud sas Isus

1Ku ngay fadugsay, katsi ro ku fagalongun, sa baliwa emi fag ngay taw Udyu. Matuyan wa fiya tuy ku fagalongun, teway tam Fun Isus akwa at taw. Dakdi kamuwagan. Ay Masine fag Falad wan tagfatuyan, te dakdi kamuwagan. Ay anggan si angku ku amatanganan, igfatuyan yangay te, matuyan wa fiya tuy ku fagalongunun sa baliwa emi fag ngay taw Udyu.

2Katatuy ku fagalongun. Glong aw te, at sadi ku amatanganan, kabalu aw dawdaw, te ami fag fulan taw, wa ngayu sirut tagafanud sa tam Isus. Katanya at sadi ku amatanganan. Ay kanya fag amatanganan wa kalyam si angku. 3Namatangan kwa te, taglabi dewa ro aw at kumfaurianan, ku ngay iba nu mlangfe di. Taglabi dewa ro ku Fun Isus umlimata angku, ku ngay iba nu mlangfe di.

4Ngayu wan tam Diyus nafagbulun at masine sa ku iba, sas taw Udyu. Kanya wan ebi taguna Diyus nafili fag fulan taw, laman at ngay unga. Sanya wa fag fulan taw ebi tam Diyus nu gfalag at fagmasineun ay at fagmadaragangun. Ay sanya wan ebi tam Diyus nu gfoyung at ngay fatuyanan ay at ngay suguwan. Ay sanya yangay tam Diyus nu gfoyung at tagtungul fag faran nu gfauseganan anya. 5Ay ebi, taw Udyu at fakasigadan, siginan tuwas Abrayam ay Isaak ay Akub. Ay nu bandi wan, anggan tam Fun Isus nu ke taw, siginan yangay emi fag fulan, taw Udyu. Ay dewa kayunya ayuwayu tam Diyus at nafagbulun masine sa emi fag ngay taw Udyu, wa ngayu sirut takaumsig gafanud sa tam Isus.

Ay kanya tam Isus, kanya wan ebi ginan em fagfanyaun fag Fun, at nanfalangfe unu Diyus at ngay taw. Ay kanya tam Isus, di kata tibak fun. Kanya tam Diyus wan, tagmagurang fagayu nus nge wain. Nu katanya itam, fauseganani anya faggugat ban. Kin, katanyai wa fiya.

Tam Diyus nu Gfagurungan at Fatuyanan, sa tuwa at Filian fag ngay Taw

6Ay labon katsi gamatangan tam te, Diyus wa siring igfagurungan at fatuyanan sas taw Udyu, madyay ngayu way taw Udyu at yud inlangfe. Ay roro mangaro muwag, Diyus igfagurungan tuwa at fatuyanan. Anway te, katsi nu kagurungan, sa way tam Diyus filian fiya fiya fag ngay taw Udyu. Teway tibak taw Udyu, wa katap sas Diyus filian fag fulan taw. Dewa te, Akub yay fufu sat dagat daga, tiba bunwa taw Udyu, tam Diyus nu glag.

7-8Siginan ngay Abrayam, katanya wan tam Diyus fagbulun. Dewa Abrayam baguwama ngayu, roro Diyus at nafili sadi way. Tam Diyus nalong sas Abrayam te, “Nu gfagurungan ban aw ku ngay fatuyanan sa emu, sa way am baguwama Isaak, ay sat ngay unga sat dagat daga.”#9:7-8 Fagsigadan 21:12 Ay fagayu Abrayam unga dasday Isaak, wa katap sis Diyus fatuyanan. At kintap, Isaak way, ay at ngay unga sat dagat daga, teway sis Isaak at faginsalugun, Diyus tuwa at nafatuyanan.

9Sayginan, tam Diyus indasug sas ke Abrayam, gina yud insalug at baguwama Isaak. Ay nafoyung sik fatuyanan. Nalong te, “Katsi ban fag banwa, kaduge yangay katsi fag lungud, gdog kyangay kafoli stiye. Ay laman ban, nu ginanya wan, am mangena e unga wan.”#9:9 Fagsigadan 18:10 Ay katanya wa fiya. Sara inke unga wa fiya. Ay kanya wan Isaak. Katanya wan Isaak faginsalugun, Diyus tuwa at nafatuyanan.

10Ay bandi nu glugo wan, em fufuwama Isaak, inke mangena wan, at ngayan Ribika. Ay bandi Ribika igfafiyon wan. At fagfafiyonun, duwa. 11-12Ay kaduge gfafiyon, Diyus nafoyung wa gugat te, “Kanya ban fag dugsay, igbadbaboan. At ariyan, igbabo ban at kaka.”#9:11-12 Fagsigadan 25:23 Ay gina tam Diyus nalong katanya, ya nsalug kanya fag dugsay. Ye nafagbulun masine ay mauri. Ay dewa katanya, tam Diyus e filian wan.

Katanya tam Diyus nafagbulun, igfalag antam te, tam Diyus nu gfili taw, igfaning at fasadan mandi. Wa gamatangan te, “Tuy fag taw nafagbulun tuway masine, kanya wa ban ku filian.” Yaya, tam Diyus nu gfili taw, igfaning at fasadan mandi.

13Katanya yangay nu tumap tam sa sik afud tam Diyus fanlongan. Nalong te, “Kesug aktuwa Akub, ay anggan at ngay fufu sat dagat daga. Ay kwa kesug Isaw, anggan at ngay fufu sat dagat daga.”#9:13 Malakyas 1:2-3 Katanya tam Diyus longan igfasaful antam te, tam Diyus wan tagfili, te go sinu wa ban at nesugan fag taw.

Tam Diyus wan at Ke Fagmadaragangun Igfili Taw

14Labon tibak taw iglong te, “Ay kin nu katanya way ro tam Diyus nu gfili taw, igsalan way ro at fagbulun.” Ay roro igdi, tam Diyus fagbulun igtungul tuwa. 15Teway tam Diyus wan ay at ke fagmadaragangun igfili at fakafanyuun fag taw. Sayginan ngani, tam Diyus nalong sas Muisis, te, “Aw wan tagfili, te kanya wa fag taw ku fakafanyuun ay ku fagtarabangun.”#9:15 Nu Galin 33:19

16Nu katanya, nalag tam te, bunwa siginan tam nafagbulunan, tam Diyus faginfanyuun antam. Ay bunwa siginan tam nafasadanan mandi. Antuwa te, tam Diyus tuwa mandi at kinkumsig nangafanyu antam.

17Ebi sis talun Iptu, tam Diyus nafatigas at fun daul at amatanganan. Ay Diyus nalong te, “Nafili aw emu laman ku fagfauriun, laman at ngay taw nu lumag ku fagbulun sa emu, sumaful te, madaragang aw. Ay laman ban dewas nganday fag ngay taw dumungug ban te, aw at madaragang.”#9:17 Nu Galin 9:16 Katanya ebi Diyus longan sas fun daul.

18Katanya tam Diyus nafagbulun sanya fag fun daul igfasaful antam te, nus nga setaw tam Diyus fasadan, tam Diyus mafafagurungan tuwa. Galay at fasadanan nanfatigas sik taw at amatanganan, katanya wan at fagbulun sanya fag taw. Ay galay at fasadanan nangafanyu sik taw, anwa fiya nangafanyu ka fag taw.

19Ay labon tibak taw lumong te, “E sek, Diyus ngaro igfatigas way taw amatanganan. Ay itam wa tam mafafabali, nu Diyus wan at nafatigas tam amatanganan. Ay nus tuwa, kanya yay tagfauri, kanya at nafatigas aro taw? Sek, igsalan way siring katanya at fagbulun.” 20Ay roro igdi, di gsalan. Itam taw lag tam fayud tam Diyus. Teway kanya wa ngani Diyus, ay itam sik ngay taw way tam. At awatan way tam. Galay sik taw kawat bisu daga, at awatan wa long mafalong sat naawat te, “Taw katatuy nu kawat o angku?” Ay katanya yangay itam. Lag tam fayud tam Diyus.

21Takawat bisu daga, bagu nangawat, gamatangan yay te, “Go tain ro siring nu kawat aw.” Labon gamatangan te, “Mafud akyap duwa ku fangawat, laman ro ku nafaawat duwa tuwa.” At sadi masine dawdaw, ay at sadi wa kamasine. At masine dawdaw, kanya wa ban at fagsuwadan at ngay mafanud fag fagnuwan. Ay at yud kamasine, at fagsuwadan way at ngay naginautan. Ay takawat bisu nu gfagbulun katanya di gsalan. Teway kanya wan ay takawat. Mafaawat tuwa kata at fasadan.

22-23Katanya yangay tam Diyus, kata sik takawat bisu. Kanya wan at naawat taw. Ay kanya yangay tagamatangan te, “Go tain ro ku fasadan sa sangay taw?” Ay tam Diyus fasadanan sa tiba at awatan, at fakafanyuun tuwa, ay at fagfonan ban at nafamasadan fag fagmasineun ay fag fagmadaragangun. Ay roro tam Diyus fasadanan sa tiba at awatan, anway at fakalimataun ay at fagfauriun.

Ay labon katsi, tam Diyus gafauriananun wa dawdaw at sadik fulan, at fakalimataun fag ngay taw. Gyafalagun wa dawdaw sa sangay taw, te kanya mafafauri wa fiya at nalimatan fag ngay taw. Ay roro ya daw nafatunglus nafauri. Igfabarisun yay. Fakatanyaun tam Diyus fagbulun, teway kanya e fagafoyungun yay sat sadik fulan taw, sat fakafanyuun. Nanfoyung yay sanya fag ngay taw, te roro kanya sik masine tuwa dawdaw, ay sik madaragang tuwa dawdaw. Katanya tam Diyus fagyudun daw igfauri at ngay nalimatan.

24Ay tam Diyus at nafili, at fagtabanun ban sat masine, bundi fagtvngvd taw Udyu. Tiba, taw Udyu wa fiya, ay tiba taw yud Udyu. Ay itam ngani, katanya watam. Itam tiba, taw Udyu, ay tiba, taw yud Udyu. Dewa katanya, Diyus yay tam gugat at nafili.

25Taw yud Udyu, bunwa Diyus filian fag fulan taw. Ay dewa katanya, tam Diyus e filian yay sik ngay taw ayuwayu yud Udyu. Ay katanya tam Diyus fagbulun, kata yangay tam tapan sis Usea rirukan. Sanya fag tapan, tam Diyus glong te, “Ebi ataw bunwa ku filian fag fulan, katsi kanya ku filian tuwa fag fulan taw.” Ay glong yangay te, “Ebi ataw kanya ku nalimatan fag fulan taw. Katsi kanya ku nesugan wa fag fulan taw.”#9:25 Usea 2:23

26Ay katanya yangay tam tapan sa tibak afud Usea rirukan. Ebi unu, tam Diyus kalimata at ngay taw tagbanwan sa sik talun. Ay glong te, “Bunwa ngap am ku taw.” Ay roro nu bandi wan, tam Diyus inkesug yay sanya fag talun at ngay taw. Ay siginan ginanya, nu gngayan sanya fag talun at ngay taw, antuwa at matuyan fag Diyus at unga.#9:26 Usea 1:10 Katanya tam tapan sis Usea rirukan.

27Ay sa sik afud Isayas rirukan, e tapan tam sas taw Udyu baliwa. Glong te, “Taw Udyu kayu was lagnas sas tigyangan dagat. Ay roro at kumlangfe wa ngayu sirut. Sik fulan way sirut taw. 28Teway tam Diyus fadasug wa daw at faurianan, ay fauri wa ban dawdaw at ngay taw.”#9:28 Isayas 10:22-23

29Ay sa tibak afud Isayas rirukan, e tapan yangay tam te, “Gina ban tam Diyus nanfaurianan antam fag ngay taw Udyu, tam Diyus ban di gfamin antam. Nanfe sawad yay tiba, laman ban e taw Udyu tuwa gugat ste swa daga. Ay nu dway katanya tam Diyus fasadan, satu ro nafamin wa daw antam, kata ebi nu gfamin fulan Suduma ay fulan Gumura.”#9:29 Isayas 1:9 Katanya tam tapan sis Isayas rirukan.

Taw Udyu wa Nafaning Diyus Faran nu Gfalangfe Taw

30Ku ngay fadugsay, katatuy nu kafayamag kanya at tungud fag ngay elongan. Ebi ataw, at ngay taw yud Udyu, wa gsarap at fanfalyam at asalanan. Ay dewa katanya, katsi sik ngay taw yud Udyu ayuwayu, inkata wa sik ngay taw yud e asalanan. Fakatanyaun ay, nasaful tuwa gafanud sa tam Fun Isus. Ay siginan gafanud, Diyus nu glag, kanya fag ngay taw kata wa yud e asalanan.

31Ay sik ngay taw Udyu ayuwayu, gugatan tuwa igfaning Diyus suguwan, teway katanya unu at fanfalyam at asalanan. Ay roro dewa katanya, tam Diyus nu glag, e asalanan way gugat. 32-33Taw ro fakatanyaun? Teway kanya fag ngay taw Udyu wa ngani gafanud sa tam Fun Isus, te kanya tuwa tagfalyam taw asalanan. At fagafanudun si way at ngay nafagbulun mandi.

Sa sik afud tam Diyus at fanlongan, e tapan tam sa baliwa sik batu daul. Roro kanya fag batu daul, tam Fun Isus. Tam Diyus nalong te, “Nanfatungkud ban aw sik batu daul sis fulan Erusalem. Ay tibak taw ban tagdalan sanya kataid ay kafulid. Ay roro tibak taw gafanud tuwa sanya fag batu. Ay fagayu ban tagafanud, lumag wa ban fiya at fagsegun.”#9:32-33 Isayas 8:14; 28:16 Ay katsi sik ngay taw Udyu ayuwayu intaid wa fiya sanya fag batu, teway wa gafanud sa tam Isus.

Currently Selected:

Ruma 9: TAWEAST

Highlight

Copy