Ruma 11
11
Tam Diyus Nafili tuwa sik ngay Taw Udyu Teway Kafanyu tuwa
1Ay kin nu katanya, go katsi tam Diyus inlimata wa fiya fiya taw Udyu, teway wa ngap igfaning anya? Ay roro igdi, tam Diyus tunglus tuwa kesug. Aw ngani sik taw Udyu akwan. Aw wan at sadi Abrayam fufu sat dagat daga. Ay at sadi ku aguyangan, Benamin wan. 2Ay tam Diyus kesug tuwa gugat emi. Di nlimata at filian fag fulan taw.
Namatang yay ro am tam tapan sas Elyas baliwa, si tam Diyus fanlongan. Elyas, sik taw Udyu yangay, ay dewa katanya kalimata wa dawdaw glag at iba fagbulun. Ay igfoyung sas Diyus te, 3“Ku Fun, katsi ku ngay iba, nafate wan am ngay tagfadasug am fagalongunun sa sangay taw. Ay narasras wan at ngay fagbatasan famanyun sa emu. Ay katsi aw way sesadi at sawad tagseg emu. Ay gafateun wa ngap angku.”#11:3 1 Fun 19:10,14 Katanya Elyas longan. 4Ay roro tam Diyus nabalus Elyas te, “Igdi, bundi o sesadi at sawad. Fituk libu ya at sawad ku taw, at yud batang gseg sas Baal fag fagsegan.”#11:4 1 Fun 19:18 Katanya ebi tam Diyus longan sas Elyas. E sawad yay unu fituk libuk taw Udyu tagseg sa tam Diyus.
5Ay katanya yangay anggan katsi. E sawad yay sik ngay taw Udyu tagseg sa tam Diyus. Teway tam Diyus infanyu tuwa dawdaw tibak taw Udyu, ay nafili tuwa.
6Ay tam Diyus nu gfili at ngay taw, bunwa te, nalag tam ugali te masine. Antuwa te, teway tam Diyus infanyu tuwa dawdaw antam. Satu ro, tam Diyus fagfiliun nu anway at masine fagayu, wa ro tam mafalong te tam Diyus igfangafanyu tuwa.
7Katatuy aro ginan ku ngay foyungan at masuwad. Taw Udyu, gugatan nu kawat at faran mandi, te go tain ro at fagumkalyamun at asalanan. Ay roro tam Diyus wa nafalyam, dasday kayu at filian fag ngay taw Udyu. Ay tiba fagayu, tam Diyus nadingding wan at amatanganan laman wa sumaful anya.
8Ay katanya tam Diyus nafagbulun, kata yangay tam tapan sa sik afud at fanlongan. Glong te, “Tam Diyus nadingding wan at ngay amatanganan, laman wa sumaful anya. Ay nasalag wan kanya fag ngay taw nu tumungul anya ay nu sumaful at fagalongunun. Ay anggan katsi, kanya fag ngay taw katanya yay gugat.”#11:8 Diyuterunumyu 29:4; Isayas 29:10
9Ay sayginan, Dabid igdarangin, sanya baliwa fag ngay taw at yud gsaful tam Diyus. Glong te, “Nus nga setaw katsi tagfanabayan kanya fag ngay taw, sanya ginan nangus fag fagmanabayanun, e mdasug sik mataka. Kata nangus sik taw, glo yama gugat, intaid wa daw ay inbungle wan. Ay at nafagbulun fagayu at yud masine, fafolii wa sa anya. 10Ay fafalyui at amatanganan, laman wa mke fagsafulun. Ay faabiyati dawdaw at ubanan fag ngay natakan.”#11:10 Danyu 69:22-23 Katanya ebi Dabid darangin.
Dewa Taw Udyu ay Dewa Taw Yud Udyu, Tam Diyus Kafanyu tuwa
11Labon aro ginan nu gtap am, gamatangan am te, “Katsi ngaro, tam Diyus infurat wa fiya fiya taw Udyu. Wa ban falangfe.” Ay roro muwag, tam Diyus falangfe yay ban. Anway te, Diyus at fagbulun, nafarabing yay sas taw yud Udyu. Igfalangfe yay sik ngay taw yud Udyu ayuwayu, laman ro, at ngay taw Udyu nu lumag te, taw yud Udyu kalangfe wa ayuwayu, malabian yay ban. Ay nu galabian wa ban, ginanya mandi at ngay taw Udyu umfoli yangay sas Diyus.
12Sik ngay taw Udyu ayuwayu, kamabo wayay katsi, e ndasug masine dawdaw sas taw yud Udyu. Ay bandi ban, kanya fag ngay taw Udyu nu nfoli yangay sas Diyus, e kadasug yangay masine sas taw yud Udyu, glabi yay fiya fiya katsi fag masine.
13Ay katsi, e fagalongunun kyay sas taw yud Udyu. Saful wam te, aw, tam Diyus aw filian tagfadasug at fagalongunun sa ayu. Ay katanya ku fagbulun masine dawdaw sa angku. 14Ay roro at sadi ku fasadan fiya fiya, nu kamoyung aw sas taw yud Udyu, laman ku iba nu lumag, malabian. Ay labon ku iba nu nalabian tuwa, tiba gafanud yangay sa tam Fun Isus. Ay nu katanya tuwa umlangfe yangay.
15Katsi tam Diyus igsalag yay ku ngay iba nu sumaful ayuwayu gafanud sa anya. Igfon yay sik lungud sa sik ngay taw ayuwayu yud Udyu, laman ro kanya yay at kumsadi sa tam Diyus. Ay dewa katanya, bandi ban, tam Diyus igluwang ku ngay iba at amatanganan, laman umsadi yangay. Ay katsi, ku ngay iba kata yay sik ngay matean. Ay dewa katanya, bandi ban, umke leleg yay at yud katabu.
16Ami fag fulan taw, e ugali ami te, kawat ami tinafay, ay igfon ami sas Diyus em awatan taguna. Ay nu katanya tuwa unu, tam Diyus kaumsig glag em awatan fagayu. Ay katanya yangay sis taw Udyu. Katsi ami tibak taw Udyu, naguna wami em iba nu gafanud sa tam Fun Isus. Ay bandi ban, fagayu taw Udyu gafanud yangay.
Ay at sadi taw Udyu nu kafafaskudanan, kata sik fun kayu. At lalid nu mafonan tuwa sas Diyus, anggan ro at familugan, at sanga, fagdaul mafonan wa sas Diyus. Katanya yangay taw Udyu. Ebi ebi taw Udyu nu kafasigad, siginan sik ngay taw at mafonan sas Diyus. Ay bandi ban anggan at ngay fufu sat dagat daga, mafonan yangay ban.
17Ay sadik fafaskudanan, katatuy yangay. Ami fag ngay taw Udyu, kata ami sik fun kayu, at ke gimalu fiya fiya. Ay am fag ngay taw yud Udyu, kata am sik kayu at natugbung sigad, yud e gimalu. Ay tam Diyus, nabul sik ngay sanga sanya ginan fag kayu at yud e gimalu. Ay nafasugfun sa aro fag kayu at ke gimalu. Ay katsi sanya fag kayu at ke gimalu, e sanga dan, ay e sanga yangay at nafasugfun. Ay at dagat sanya ginan fag kayu igfaelo yangay at nafasugfun fag ngay sanga. At masuwad, am fag ngay taw yud Udyu, tam Diyus nafasadi ayu sa emi fag ngay taw Udyu, sat filian fag ngay taw, laman ro at ngay nafamanyun sa emi, igdasug yangay ayu.
18Ay katsi, am fag ngay taw yud Udyu, dangay am e amatanganan igfalabi, te, “Katsi ami wan taglabi taw Udyu.” Teway am sik nafasugfun way am fag ngay sanga. Ay bunwa am tagfatvngvd at familugan. At familugan tuwa baliwa tagfatvngvd ayu.
19Ay labon gamatangan am te, “Ay dewa, dewa ami sik ngay sanga, iglabi wami fiya kanya fag ngay taw Udyu at yud gafanud sa tam Fun Isus. Teway tam Diyus, nalifung wa ngani kanya fag ngay sanga siginan at familugan, ay nasugfun wa ngani emi.”
20Ay kin, tungul wa ngaro fiya kanya ay nalong, te tam Diyus nalifung yay sik ngay taw Udyu siginan at familugan. Ay dewa katanya, am fag ngay taw yud Udyu, lag kadaragang. Faamatanganuni tuwa ayu. Teway tam Diyus fagnalifungun tibak taw Udyu, teway wa gafanud sa anya. Ay fagnafasugfunun ayu, teway am gafanud tuwam. 21Ay bandi ban, am fag fulan taw nu dway am gafanud sa tam Diyus, lumifung yangay ban ayu. Madyay at sanga dan oma tagsiginans familugan, nalifung wan.
22Katsi tam nalag, tam Diyus e ugali duwa, at sadi igfanfauri ay at sadi igfangafanyu. Sik ngay taw Udyu ayuwayu, kauri wayay gafanud sa anya, tam Diyus igfauri ban dawdaw. Ay am tagsiginan tibak fulan taw, kaumsig tuwam ay gafanud, tam Diyus kafanyu tuwa dawdaw ayu. Ay roro ngap, ay unga ban sat dagat daga nu kauri way gafanud, Diyus faurianan ban anya. 23Ay katsi fag ngay taw Udyu at yud gafanud, at unga ban sat dagat daga nu antuwa gafanud, Diyus umfanyu tuwa. Ay igfaful yangay sat filian fag ngay taw. Teway tam Diyus di gatakan igfagbulun katanya. Mafafagbulun way daw.
24Ay katanya at fagbulun nu kafafaskudanan, kata nangus nabul kanya fag ngay sanga ebi at nalifung ay nandog yangay ban fiya nanfasugfun sa ebi at familugan. Ay madyay sik ngay sanga siginan tibak kayu, tam Diyus nafafasugfun tuwa ebi. Ay kaugat wa ro nu at sanga tuwa mandi. Tam Diyus long ban mafafasugfun way daw.
25Ku ngay fadugsay, katsi e fagananfoyungun kyangay ayu, laman di am igfalabi si ay amatanganan, te, “Katsi ami wan tagtubus taw Udyu.” Tuy ngaro fag foyungan, ebi ginan masuksukan yay sas taw. Ay katsi tam Diyus nafasure wan. Katatuy kanya fag foyungan. Tam Diyus mangaro, nadingding yay sik ngay taw Udyu ayuwayu at amatanganan, laman ya kaumsig gafanud sa anya. Fakatanyaun at fagbulun, igfaguna yay taw yud Udyu, laman kanya yap at sumaful gafanud. Ay gina ban insak at kaayuwan tagafanud siginan taw yud Udyu, fagayu ban taw Udyu gafanud yangay. 26Ay umlangfe wa ban taw Udyu fagayu. Katanya tam Diyus foyungan ebi ataw at masuksuk.
Ay nu nlangfe wa ban taw Udyu ayuwayu, umgurungan wan tam natap sa sik afud tam Diyus fanlongan, taglong te, “Siginan bans fulan Erusalem e kadasug sik taw, laman nanfalangfe at ngay taw Udyu, ay nanfasadi yangay sas Diyus.”#11:26 Isayas 59:20 27Ay umgurungan yangay ban tam Diyus fatuyanan sas taw Udyu, taglong te, “Igfalyam kwa ban ay ngay asalanan.”#11:27 Isayas 59:21; Eremyas 31:33-34
28Katsi ngayuk taw Udyu, kata yay tam Diyus fabarangyan, teway wa gafanud sat Masine fag Barita. Ay katanya wayay, tam Diyus fakafanyuun inrabing tuwa sa ayu fag ngay taw yud Udyu. Ay dewa katanya, tam Diyus kesug tuwa gugat emi fag ngay taw Udyu, teway siginan ngay ebi ebi em aguyangan, Diyus kesug wa gugat taw Udyu. 29Ay ebi ebi, tam Diyus inke fatuyanan tuwa sa em aguyangan. Nalong wa te, “Tumarabang kwa ban dawdaw ayu,” ay “Am wa ban ku ngay taw.” Ay katanya tam Diyus longan wa mkalyam. Igfagurungan wa fiya.
30Ay am fag ngay taw yud Udyu, ebi, kamabo way am tam Diyus. Ay dewa katanya, tam Diyus inkumsig tuwa gtarabang ayu. Teway fakatanyaun, nalag te, ku ngay iba, taw Udyu, kamabo yangay anya. 31Ay bandi ban, tam Diyus tumarabang yangay ku ngay iba. Anway te, katsi sik kadugayun, igfabayanan yay nu kamabo anya. Teway roro tam Diyus fasadan, laman at ngay nafagbulun at masine dawdaw kaduge gugat gtarabang ayu, umke fanambagun yangay ban anggan sa ku ngay iba.
32Ku ngay fadugsay, ebi tam Diyus igfabayan yay nu kamabo anya at ngay taw yud Udyu. Ay katsi igfabayan yangay sik ngay taw Udyu ayuwayu nu kamabo anya. Fakatanyaun tam Diyus fagbulun, teway kanya roro e fasadan tuwa, te nangafanyu fagayu fulan taw, ay nantarabang tuwa.
Tam Diyus wan Tagsaful Fagayu
33Tam Diyus at fagmasineun, we fagmangaugatan.
Tam Diyus at fagsafulun, we fakafusan.
Tam Diyus nu maamatanganan, we fakatabuwan.
We taw sumaful tam Diyus at amatanganan.
Mafalyu way sa antam tam Diyus at ngay fasadan.
34Sinu sangay tagsaful tam Diyus amatanganan?
Ay sinu sangay at mafafoyung sas Diyus te, “Katatuyi tuwa am fagbulun?”#11:34 Isayas 40:13
35Tam nafamanyun sas Diyus dewa ngayu dawdaw,
tam Diyus wa long umke bedan sat ngay taw.
Teway fagayu tam nafon siginan yay anya aro taw.#11:35 Ub 41:11
36Fagayu nus nge wain, tam Diyus yay takawat.
Ay fagayu fagayu, tam Diyus yangay tagfatvngvdun.
Ay fagayu fagayu, tam Diyus way tagagbilug.
Nu katanya, itam taw, fauseganani anya, faggugat faggugat ban.
Kin, katanya wa fiya, fauseganani anya.
Currently Selected:
Ruma 11: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
