Matiyu 15

Taw Udyu at Ugali

(Mar. 7:1-13)

1Ay ginanya, tibak tagfoyung Muisis at Suguwan ay tibak taw Parisiyu ndasug siginans Erusalem ay inkakbang sas Isus ay ginto te, 2“Taw manga am ngay tagadal at fakamaboun tam aguyangan at ugali? Madyay wa gfaning sa baliwa nu gfegus at daluwap gina gananfangonun.” 3Ay Isus nabalus sa ka fag ngay taw te, “Ay taw anggan am ay fakamaboun Diyus at suguwan, anway ay fagfaningun sa ay aguyangan at ugali ebi? 4Anway ebi Diyus nalong wa te, ‘Esugi tuwa am mama ay am mina. Sik taw nu mauri way at longan sat tama ay ate sat tina, fatei wa anya.’ 5Ay roro ay foyungan nu anway te, at masine sik taw nu nafoyung sat tama ay sat tina te, ‘Ku fasad fantarabang ayu, nafon akwa sas Diyus.’ Nu katanya way ay longan, at masuwad glong way am te, ‘Lag kesug am mama ay am mina.’ 6Ay nu katanya way ay longan, gyud way am fe fanambagun Diyus at longan, anway ay fagfaningun sa ay aguyangan at ugali ebi. 7Am, sik ngay tagfanluk way am! Matuyan ka fag taglong, at ngayan Isayas, ebi ebi at foyungan sa ayu baliwa te,

8‘Katsi fag ngay taw nu gseg sa angku, si at bibig way fagtvngvd,

roro ngap sat amatanganan ngayayu way angku.

9Nu katanya way, we masuwad nu gseg angku,

anway ka fag ngay taw ngay foyungan siginan way ngay taw at longan.’#15:9 Isayas 29:13.”

Daginan Tagfafurat Taw?

(Mar. 7:14-23)

10Ay Isus nafaful ngay taw sanya ay nalong te, “Dungugani ay asafuli ku foyungan ro. 11Tagfafurat sik taw bunwa at nafat sat basad bibig baliwa, tagfafurat anya takalfas way siginan at bibig.”

12Ay Isus at ngay tagadal inkakbang ay nainto te, “Go gsaful wo te, taw Parisiyu kalimata nu nadungug am nalongan aro?” 13Ay Isus nafafaskudanan te, “Fagayu tagtugbung nu bunway ku Mama at natanum, e gumulad yay ban. 14Fabayani wa anya, anway ka fag ngay taw kata way sik ngay taw at yud glag nu gtadtabanan, ay kanya gsudan way ro katong sasad tabyu.” 15Ay Pedru ginto sas Isus te, “Foyungi emi aro am fafaskudanan at masuwad.” 16Ay Isus nabalus te, “Go anggan am yam natogdungug? 17Ay go sangay yam nasaful te, nus nge wain at nafat sat basad bibig, umdasug yangay sat ungdan ay gtunglus wa sas fagnanbapan. 18Ay roro at nalfas siginan at basad bibig, kanya tagsiginans taw at amatanganan. Ay kanya way tagfafurat taw. 19Anway siginan ways taw at amatanganan tagfasure at mauri fag fasadan. Tenday, nu gfate tiba. Ay nu kamayun sa tibama mangena. Ay nu kamayun sa at yud batang e mangama. Ay nu kamul. Ay nu kamuwag. Ay nu mauri at longan sa tibak taw baliwa. 20Kayunya tagfafurat sik taw. Ay roro sik taw dewa gyud nafegus at daluwap gina gananfangonun, kanya wa mafafurat anya.”

Sik Mangena Gafanud tuwa Isus

(Mar. 7:24-30)

21Ay Isus nalo wan sanya ginan ay indasug sa sangay fulan makbang fulan Tiru ay fulan Sidun. 22Ay e sik mangena siginans Kanaan tagbanwan sanya. Ka fag mangena nafababaun inkakbang sas Isus, ay glong te, “Ku Fun, fun Dabid at kadagdagan, afanyui angku. Ku baguyna e daylan dawdaw siginan sik mafurat fag falad.” 23Ay Isus wa gbalus anya, nus di sadik elongan. Ay at ngay tagadal inkakbang sas Isus ay matvngvd nu glong ste, “Sek. Fayayui wan ka fag mangena, anway galo way gugat antam ay garingang ayuwayu.” 24Ay Isus gbalus te, “Ku fagindasugun laman nantarabang aw taw Israel, anway kata way sik ngay tupa at nalyam.” 25Ay rodi tv ka fag mangena nkakbang yay sas Isus ay inlub ay glong te, “Ku Fun, tarabangi angku!” 26Ay Isus igfafaskudanan yay sa ka fag mangena te, “Wa masine nu gbul sisiyan at fafa ay kukas sa sangay idu.” 27Ay ka fag mangena nabalus Isus te, “Ku Fun, matuyan am longan. Dewa katanya, idu kon yay at ngay nagdakdakan at kintong siginan at tagbilug fagfangonan.” 28Ay Isus nalong te, “Matvngvd wa fiya am fagafanudun! Umgurungan wa ro fiya am fagetun.” Ay ginanya ka fag mangena at baguyna infiya wan.

Isus Nafafiya sik ngay Tagadaylan

(Mar. 7:31-37)

29Ay Isus nalo wan sanya ginan fag fulan, ay at dalan sa sangaba tigyangan Lino Galiliya, ay anggan nalo sa sik muyud ay malunggung yay sanya. 30Ay sik ngay taw ayuwayu nkakbang sa anya. Ay nataban sanya at yud malo, ay at yud glag, ay at yud mafaelongan, ay e tiba yay. Ay at tiba nafatagilid at ke ngay daylan sas Isus day darafa. Ay Isus nafafiya fagayu. 31Ay at ngay taw nadulawan dawdaw nu nalag te, at yud gdungug, gdungug wan. Ay at yud malo, malo wan. Ay at yud mafaelongan, mafaelongan wan. Ay ka fag ngay taw naseg taw Israel at Diyus.

Isus Nafafangon 4,000k Mangama

(Mar. 8:1-10)

32Ay Isus nafaful sa anya at ngay tagadal ay nalong te, “Kafanyu aw nin fag ngay taw. Anway katsi tulu wak menit nu maful ste si angku ay we fakonun. Ay aw, kwa kaumsig gfalo anya nu kalunus way ro, manranug sa sangaba dalan.” 33Ay at ngay tagadal nainto te, “Daginan ro nu mul ami takayunya fag fafa, laman sak ro ka fag ngay taw mapsug? Ay nu ste way ngap daw swa bilug talun at yud e taw.” 34Ay Isus nainto sat ngay tagadal te, “Seyu ay ba tinafay ste?” Ay kanya nabalus te, “Fitu way ay wa ngayu at uyang ay alay way ayu sirut.” 35Ay Isus nafalunggung wa at ngay taw sanya sa ngaba daga. 36Ay Isus nagalumutan wa ka fag fituk tinafay ay anggan at uyang, ay nafauseganan sas Diyus, ay nafanramyukan wan, ay nafon wa sat ngay tagadal. Ay at ngay tagadal nafon yangay sa sangay taw. 37Ay fagayu taw naon wan ay napsug wan. Ay at ngay tagadal nafaful yay at nagsawadan at nakaramyukan, ay inkapnu yay fituk sabi. 38Ay at naon undain 4,000k mangama. Ay saman yay at ngay mangena ay at ngay sisiyan. 39Ay Isus nafalo wan ka fag ngay taw. Ay rodi nasakay wa sa sik balutu ay nalo wan sas fulan Magadan.

Currently Selected:

Matiyu 15: TAWEAST

Highlight

Copy