Matiyu 13
13
Isus At Fafaskudanan sa sik Tagfangukasan Fare
(Mar. 4:1-9; Lukas 8:4-8)
1Ginanya fag menit, Isus nalo wan sanya ginan fag bale ay namalunggung sis tigyangan lino. 2Ay sik ngay taw ayuwayu maful anya. Ay nu katanya, Isus nasakbo yay sasad balutu ay malunggung sanya. Ay ngay taw malindug way sis tigyangan lino. 3Ay Isus gfoyung sanya fag ngay taw ngayuk fafaskudanan. Kanya nalong te,
“Ebi e sik taw nu gtanum fare gfangukasan. 4Ay nu gfangukasan wan, at tiba ntong sa sangaba day dalan, ay sik ngay manuk tungud indasug ay nasinduk wan. 5Ay at tiba ntong sas wa batu at yud bangan e daga, ay mafali tuwa nu natugbung, teway mayangfis wayay at daga sanya. 6Ay menit nu nkabat wan, inlangke ay nyango wan, teway wa ngabasad at lalid. 7Ay at tiba ntong sas wa makmak madugi. Ay at makmak indaul yangay ay nafaut at ngay fare. 8Ay at tiba ntong sat masine fag daga. Ay at tibak buwadan kasakan tuwa, ay at tiba ngayu bangan, ay at tiba ngayu tuwa dawdaw. 9Nu nadungug tuwam amatangani tuwa!”
Taw ro Isus At Fagfafaskudanun nu Gfoyung?
(Mar. 4:10-12; Lukas 8:9-10)
10Ay Isus at ngay tagadal inkakbang anya ay glong te, “Taw ro faggugat am fagfafaskudanun nu gfoyung o sa sangay taw?”
11Ay Isus nabalus te, “Sa ayu, nafasaful ayu laman sumaful am at masuksukan sa baliwas Diyus nu gmagurang taw. Ay yaya, wa katanya sanya fag ngay taw. 12Ay sik taw nu e fagsafulun tuwa, e famut yay ban at fagsafulun. Ay sik taw nu dway e fagsafulun, dewa sirut e natogdungug, e mul wa ban siginan anya. 13Fakatanyaun, ku fagfafaskudanun nu gfoyung aw sanya fag ngay taw, laman kanya dewa glinggat, wa glag. Ay dewa gdungug, wa natogdungug ay wa nasaful. 14Nu katanya, in-gurungan sanya fag ngay taw ebi Diyus at taglong Isayas at foyungan te,
‘Dewa am gugat gdungungan, wam e natogdungug.
Ay dewa am gugat glinggat, wam glag.
15Fakatanyaun, kanya fag ngay taw igfaning way gugat at fasadan.
Ay at talinga kata way yud gtogdungug.
Ay at mata mafutsik way, laman wa glag ay wa gsaful.
Ay wa gtogdungug ay wa namatang.
Ay at amatanganan wa nasaful at masine.
Ay wa nbiling sa angku, laman nanfafiya aw anya.’#13:15 Isayas 6:9-10.
16Ay roro am long, guseganan tuwam, anway am glag tuwam, ay gdungug tuwam. 17At matuyan iglong aw ayu te, ebi fag ngay taglong ay at matuyan fag ngay taw galagun yama ay nalag katsi, ay wa nalag. Ay kanya kaumsig yama gdungug ay nadungug katsi, ay yaya, wa nadungug.”
Isus Nafoyung at Fafaskudanan at Masuwad
(Mar. 4:13-20; Lukas 8:11-15)
18“Dungugani at masuwad ku fafaskudanan sa baliwa sik tagfangukasan fare. 19Sik taw dewa nadungug at foyungan sa baliwas Diyus nu gmagurang taw, ay nu dway nasaful at masuwad, Satanas nu ndasug mul wan ka fag foyungan sas taw at amatanganan, kata aro fag fare at kintong sasad dalan. 20Ay at kintong sas wa daga at mabatu, kanya kata Diyus at longan sa sik taw at nadungug. Ay kanya mafali tuwa nu gafanud ay guseganan. 21Ay roro dewa katanya ya ntvngvd sat amatanganan at fagafanudun. Ay nu ndasug wa sik mataka ay nu e gfauri anway gafanud sas Diyus at longan, rodi nalyam wan at nadungug. 22Ay at kintong sas wa makmak madugi kata sik ngay taw gdungugan Diyus at longan. Ay roro matvngvd wayay ka fag taw at fagafanawaun ste swa daga, ay at fagamatanganun sa way at fagmabalanun. Nu katanya, kata wa nu nafautan at nadungug at longan sat amatanganan. Ay wa nabuwadan. 23Ay at kintong sat masine fag daga kata sik ngay taw at nadungug Diyus at longan, ay natogdungug tuwa ay matvngvd nu gafanud. Ay nu katanya, e ngay buwadan tuwa. At tibak buwadan kasakan tuwa, ay at tiba ngayu bangan, ay at tiba ngayu tuwa dawdaw.”
Isus At Fafaskudanan sa sik Gamasun at ke Makmak
24Ay Isus nafoyung yangay sik fafaskudanan te, “Diyus nu gmagurang taw kata yangay sik taw nu gfangukasan at masine fag bini sa at ngaba gamasun. 25Ay kaduge ngay taw gtiyug, at fabarangyan indasug sat gamasun ay natanum yangay si at ngaba gamasun sik ngay makmak. Ay rodi tv, ka fag taw nalo wan. 26Ay at nafangukasan fag bini natugbung ay nabuwadan, ay anggan at ngay makmak natugbung yangay. 27Ay at tagbilug gamasun at ngay fanuguwan nananlag ay nainto sa at fun te, ‘Em magurang, namasine wa fag ngay bini tam nafangukasan ebi si am gamasun. Taw ro manga fagamakmakun ayuwayu?’ 28Ay ka fag tagbilug gamasun nabalus te, ‘Sik fabarangyan at nafagbulun katanya.’ Ay at ngay fanuguwan ginto yangay te, ‘Go gumulad wami ka fag ngay makmak?’ 29Ay tagbilug gamasun nabalus te, ‘Lagi, magulad am tam tanum gina am ggulad ngay makmak. 30Fabayani wa ka fag duwa nu kadaul. Ay nu gani wan glong kyay ban sa sangay tagani te: Fafuli yap taguna ngay makmak ay futusi, ay rodi ukasi wa sasad afuy. Ay tam tanum long fafuli sa ku fagfafulan fag bale.’ ”
Isus At Fafaskudanan sa sik Butul Mustasa
(Mar. 4:30-32; Lukas 13:18-19)
31Ay Isus nafoyung yangay sik fafaskudanan te, “Diyus nu gmagurang taw kata yangay sik taw nu gfangukasan butul mustasa#13:31 Tuy fag mustasa ngabat way ngap. sa at gamasun. 32Ay ka fag butul, kanya wan at alay sas fagayu butul. Ay roro nu natugbung wan ay nu ndaul wan, nalabi yay kabat tibak tanum sanya sad gamasun; kata sik kayu at kaabatan. Ay at ngay manuk gsubuk tuwa sat ngay sanga.”
Isus At Fafaskudanan sa sik Famadaul Tinafay
(Lukas 13:20-21)
33Ay Isus nafoyung yay fiya sadi yak fafaskudanan te, “Diyus nu gmagurang taw kata yangay sik mangena at nabul at famadaul tinafay, ay nafasagbatan sas wa arina, at fagsuwadan sik tagbiya fag fagsuwadan. Ay rodi fagayu at naawat indaul wan.”
34Isus kayu ginan igfoyung sa sangay taw, igfafaskudanan way. Ay wa gfoyung nu dway e fafaskudanan. 35Fakatanyaun laman umgurungan ebi Diyus at longan sat taglong te,
“Nanfoyung ban aw sik ngay fafaskudanan.
Ay nanfoyung kyangay ban anggan ebi at masuksukan siginan ngay ebi sfagsigadan tam fagdaul daga.”
Isus At Fafaskudanan at Masuwad sa baliwas Makmak
36Ay rodi Isus nalo wan siginan aro at fagmafulan fag ngay taw, ay nasakbo sit bale. Ay at ngay tagadal inkakbang sas Isus ay ginto te, “Fayamagi emi at masuwad am fafaskudanan aro fag makmak sis gamasun.” 37Ay Isus igbalus te, “At nafangukasan ka fag bini masine, aw wan, Taw at Baguwama. 38Ka fag gamasun, fagdaul daga wan. Ay ka fag bini masine, kanya wan Diyus at fagmagurangun. Ay at ngay makmak, kayu tagfaning sat mauri. 39Ay ka fag fabarangyan at natanum ka fag ngay makmak, kanya Satanas wan. Ay nu gani gina wa ban at fakatabuwan tam fagdaul daga. Ay at tagani at buwadan, Diyus wa at ngay tagfabarita. 40Nus nga setaw nu gulad ka fag ngay makmak ay nu mukas sasad afuy, katanya yangay ban sas fakatabuwan fag ngay menit. 41Ay aw, Taw at Baguwama, sumugu akban ku ngay tagfabarita laman nanfasaman kayu tagfe asalanan tiba ay kayu at mauri at fagbulun siginan ku fagmagurangan. 42Ay ngay tagfabarita mukas ban ka fag ngay taw sasad afuy tagigang daul. Ay sanya guyway wa ban dawdaw ay gfaringgitan at bagang. 43Ay ginanya ban fag menit, at masine fag ngay taw masulo ban katvngvd tam menit sa tam Tama at fagmagurangan. Nu nadungug tuwam amatangani tuwa.”
Isus At Fafaskudanan sa sik Mafanud dawdaw fag Nanuranan
44“Diyus nu gmagurang taw kata yangay sik mafanud dawdaw fag nanuranan at malubguban sa sik gamasun. Ay bandi sik taw nalag ka fag nanuranan, ay nafafalyu yay, ay wa gfoyung sa tiba. Ay guseganan dawdaw te, anya wa long ban kanya fag nanuranan. Ay nafabili wan fagayu at fagagbilugun, laman nanbili ka fag gamasun laman anya wa ban anggan at mafanud dawdaw fag nanuranan sanya.”
Isus At Fafaskudanan sa sik Batu at Mafanud
45“Ay sadi ya fiya at nafafaskudanan. Diyus nu gmagurang taw kata yangay sa sik tagfabili nu gsarap ngay batu at mafanud. 46Ay nu nalag wan, nafabili wan fagayu at nanuranan, ay nabili wan ka fag ngay batu at mafanud.”
Isus At Fafaskudanan sa sik Fanggamat Uyang
47“Ay sadi ya fiya at nafafaskudanan. Diyus nu gmagurang taw kata yangay sa sik fanggamat uyang. Ay ngay taw naukas sasad lino at fanggamat uyang ay nagamat sik ngay uyang. 48Ay nu nkapnu wa uyang sat fanggamat, ka fag ngay taw naguyud at fanggamat uyang sas tigyangan lino. Ay malunggung yay sanya laman gfaful at masine fag ngay uyang sa at fagsuwadan. Ay naukas wan kayu at yud masine. 49Katanya yangay ban sas fakatabuwan fag ngay menit. Diyus at ngay tagfabarita gina mdasug nanfasaman wa at mauri fag ngay taw siginan at ngay masine fag taw. 50Ay mukas wa ban at mauri fag ngay taw sasad afuy tagigang daul. Ay sanya guyway wa ban dawdaw ay gfaringgitan at bagang.”
51Ay Isus ginto yangay te, “Go nasaful tuwam fagayu ku longan at masuwad?” Ay at ngay tagadal nabalus te, “Kin wan. Nasaful wami katsi.” 52Ay Isus nalong yangay fiya te, “Fagayu tagfoyung Muisis at Suguwan at naadal sa baliwas Diyus nu gmagurang taw, kanya kata sik tagbilug bale. Kanya nafasure siginan at fagsandigan at bagu ay at taglugo fag fagnuwan.”
Taw Nasaret Kalimata way Isus
(Mar. 6:1-6; Lukas 4:16-30)
53Ay Isus nu ntabu wa nu gfoyung ka fag ngay fafaskudanan, nalo wan sanya ginan. 54Ay nu ndasug wa sat fulan fiya fiya, nafoyung sanya fag ngay taw sat bale fakafulan. Ay at ngay tagdungugan nadulawan dawdaw. Ay gidgintoan sa tiba te, “Daginan manga kanya fag taw at fagnasafulun gfoyung takatanya? Ay daginan manga anggan at fagmadaragangun gfagbulun at madulawan? 55Sadaw kanya sik takamale way at baguwama? Ay sadaw at tina Maria way, ay at ngay fadugsay anway Use, ay Simun, ay Udas way? 56Ay sadaw anggan at ngay fadugsay fag ngay mangena ste ginan way? Daginan manga nu kasaful kanya fag taw takatanya fag foyungan?” 57Ay ka fag ngay taw wa nafanud Isus at foyungan. Ay Isus nalong sanya fag ngay taw te, “E gseg tuwa sas Diyus at taglong dewa nus nganday, dasday si at fulan mandi ay si at kalongan.” 58Nu katanya, Isus wa nafagbulun ngayuk madulawan sanya fag fulan, teway sanya fag ngay taw wa gafanud anya.
Currently Selected:
Matiyu 13: TAWEAST
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines
Matiyu 13
13
Isus At Fafaskudanan sa sik Tagfangukasan Fare
(Mar. 4:1-9; Lukas 8:4-8)
1Ginanya fag menit, Isus nalo wan sanya ginan fag bale ay namalunggung sis tigyangan lino. 2Ay sik ngay taw ayuwayu maful anya. Ay nu katanya, Isus nasakbo yay sasad balutu ay malunggung sanya. Ay ngay taw malindug way sis tigyangan lino. 3Ay Isus gfoyung sanya fag ngay taw ngayuk fafaskudanan. Kanya nalong te,
“Ebi e sik taw nu gtanum fare gfangukasan. 4Ay nu gfangukasan wan, at tiba ntong sa sangaba day dalan, ay sik ngay manuk tungud indasug ay nasinduk wan. 5Ay at tiba ntong sas wa batu at yud bangan e daga, ay mafali tuwa nu natugbung, teway mayangfis wayay at daga sanya. 6Ay menit nu nkabat wan, inlangke ay nyango wan, teway wa ngabasad at lalid. 7Ay at tiba ntong sas wa makmak madugi. Ay at makmak indaul yangay ay nafaut at ngay fare. 8Ay at tiba ntong sat masine fag daga. Ay at tibak buwadan kasakan tuwa, ay at tiba ngayu bangan, ay at tiba ngayu tuwa dawdaw. 9Nu nadungug tuwam amatangani tuwa!”
Taw ro Isus At Fagfafaskudanun nu Gfoyung?
(Mar. 4:10-12; Lukas 8:9-10)
10Ay Isus at ngay tagadal inkakbang anya ay glong te, “Taw ro faggugat am fagfafaskudanun nu gfoyung o sa sangay taw?”
11Ay Isus nabalus te, “Sa ayu, nafasaful ayu laman sumaful am at masuksukan sa baliwas Diyus nu gmagurang taw. Ay yaya, wa katanya sanya fag ngay taw. 12Ay sik taw nu e fagsafulun tuwa, e famut yay ban at fagsafulun. Ay sik taw nu dway e fagsafulun, dewa sirut e natogdungug, e mul wa ban siginan anya. 13Fakatanyaun, ku fagfafaskudanun nu gfoyung aw sanya fag ngay taw, laman kanya dewa glinggat, wa glag. Ay dewa gdungug, wa natogdungug ay wa nasaful. 14Nu katanya, in-gurungan sanya fag ngay taw ebi Diyus at taglong Isayas at foyungan te,
‘Dewa am gugat gdungungan, wam e natogdungug.
Ay dewa am gugat glinggat, wam glag.
15Fakatanyaun, kanya fag ngay taw igfaning way gugat at fasadan.
Ay at talinga kata way yud gtogdungug.
Ay at mata mafutsik way, laman wa glag ay wa gsaful.
Ay wa gtogdungug ay wa namatang.
Ay at amatanganan wa nasaful at masine.
Ay wa nbiling sa angku, laman nanfafiya aw anya.’#13:15 Isayas 6:9-10.
16Ay roro am long, guseganan tuwam, anway am glag tuwam, ay gdungug tuwam. 17At matuyan iglong aw ayu te, ebi fag ngay taglong ay at matuyan fag ngay taw galagun yama ay nalag katsi, ay wa nalag. Ay kanya kaumsig yama gdungug ay nadungug katsi, ay yaya, wa nadungug.”
Isus Nafoyung at Fafaskudanan at Masuwad
(Mar. 4:13-20; Lukas 8:11-15)
18“Dungugani at masuwad ku fafaskudanan sa baliwa sik tagfangukasan fare. 19Sik taw dewa nadungug at foyungan sa baliwas Diyus nu gmagurang taw, ay nu dway nasaful at masuwad, Satanas nu ndasug mul wan ka fag foyungan sas taw at amatanganan, kata aro fag fare at kintong sasad dalan. 20Ay at kintong sas wa daga at mabatu, kanya kata Diyus at longan sa sik taw at nadungug. Ay kanya mafali tuwa nu gafanud ay guseganan. 21Ay roro dewa katanya ya ntvngvd sat amatanganan at fagafanudun. Ay nu ndasug wa sik mataka ay nu e gfauri anway gafanud sas Diyus at longan, rodi nalyam wan at nadungug. 22Ay at kintong sas wa makmak madugi kata sik ngay taw gdungugan Diyus at longan. Ay roro matvngvd wayay ka fag taw at fagafanawaun ste swa daga, ay at fagamatanganun sa way at fagmabalanun. Nu katanya, kata wa nu nafautan at nadungug at longan sat amatanganan. Ay wa nabuwadan. 23Ay at kintong sat masine fag daga kata sik ngay taw at nadungug Diyus at longan, ay natogdungug tuwa ay matvngvd nu gafanud. Ay nu katanya, e ngay buwadan tuwa. At tibak buwadan kasakan tuwa, ay at tiba ngayu bangan, ay at tiba ngayu tuwa dawdaw.”
Isus At Fafaskudanan sa sik Gamasun at ke Makmak
24Ay Isus nafoyung yangay sik fafaskudanan te, “Diyus nu gmagurang taw kata yangay sik taw nu gfangukasan at masine fag bini sa at ngaba gamasun. 25Ay kaduge ngay taw gtiyug, at fabarangyan indasug sat gamasun ay natanum yangay si at ngaba gamasun sik ngay makmak. Ay rodi tv, ka fag taw nalo wan. 26Ay at nafangukasan fag bini natugbung ay nabuwadan, ay anggan at ngay makmak natugbung yangay. 27Ay at tagbilug gamasun at ngay fanuguwan nananlag ay nainto sa at fun te, ‘Em magurang, namasine wa fag ngay bini tam nafangukasan ebi si am gamasun. Taw ro manga fagamakmakun ayuwayu?’ 28Ay ka fag tagbilug gamasun nabalus te, ‘Sik fabarangyan at nafagbulun katanya.’ Ay at ngay fanuguwan ginto yangay te, ‘Go gumulad wami ka fag ngay makmak?’ 29Ay tagbilug gamasun nabalus te, ‘Lagi, magulad am tam tanum gina am ggulad ngay makmak. 30Fabayani wa ka fag duwa nu kadaul. Ay nu gani wan glong kyay ban sa sangay tagani te: Fafuli yap taguna ngay makmak ay futusi, ay rodi ukasi wa sasad afuy. Ay tam tanum long fafuli sa ku fagfafulan fag bale.’ ”
Isus At Fafaskudanan sa sik Butul Mustasa
(Mar. 4:30-32; Lukas 13:18-19)
31Ay Isus nafoyung yangay sik fafaskudanan te, “Diyus nu gmagurang taw kata yangay sik taw nu gfangukasan butul mustasa#13:31 Tuy fag mustasa ngabat way ngap. sa at gamasun. 32Ay ka fag butul, kanya wan at alay sas fagayu butul. Ay roro nu natugbung wan ay nu ndaul wan, nalabi yay kabat tibak tanum sanya sad gamasun; kata sik kayu at kaabatan. Ay at ngay manuk gsubuk tuwa sat ngay sanga.”
Isus At Fafaskudanan sa sik Famadaul Tinafay
(Lukas 13:20-21)
33Ay Isus nafoyung yay fiya sadi yak fafaskudanan te, “Diyus nu gmagurang taw kata yangay sik mangena at nabul at famadaul tinafay, ay nafasagbatan sas wa arina, at fagsuwadan sik tagbiya fag fagsuwadan. Ay rodi fagayu at naawat indaul wan.”
34Isus kayu ginan igfoyung sa sangay taw, igfafaskudanan way. Ay wa gfoyung nu dway e fafaskudanan. 35Fakatanyaun laman umgurungan ebi Diyus at longan sat taglong te,
“Nanfoyung ban aw sik ngay fafaskudanan.
Ay nanfoyung kyangay ban anggan ebi at masuksukan siginan ngay ebi sfagsigadan tam fagdaul daga.”
Isus At Fafaskudanan at Masuwad sa baliwas Makmak
36Ay rodi Isus nalo wan siginan aro at fagmafulan fag ngay taw, ay nasakbo sit bale. Ay at ngay tagadal inkakbang sas Isus ay ginto te, “Fayamagi emi at masuwad am fafaskudanan aro fag makmak sis gamasun.” 37Ay Isus igbalus te, “At nafangukasan ka fag bini masine, aw wan, Taw at Baguwama. 38Ka fag gamasun, fagdaul daga wan. Ay ka fag bini masine, kanya wan Diyus at fagmagurangun. Ay at ngay makmak, kayu tagfaning sat mauri. 39Ay ka fag fabarangyan at natanum ka fag ngay makmak, kanya Satanas wan. Ay nu gani gina wa ban at fakatabuwan tam fagdaul daga. Ay at tagani at buwadan, Diyus wa at ngay tagfabarita. 40Nus nga setaw nu gulad ka fag ngay makmak ay nu mukas sasad afuy, katanya yangay ban sas fakatabuwan fag ngay menit. 41Ay aw, Taw at Baguwama, sumugu akban ku ngay tagfabarita laman nanfasaman kayu tagfe asalanan tiba ay kayu at mauri at fagbulun siginan ku fagmagurangan. 42Ay ngay tagfabarita mukas ban ka fag ngay taw sasad afuy tagigang daul. Ay sanya guyway wa ban dawdaw ay gfaringgitan at bagang. 43Ay ginanya ban fag menit, at masine fag ngay taw masulo ban katvngvd tam menit sa tam Tama at fagmagurangan. Nu nadungug tuwam amatangani tuwa.”
Isus At Fafaskudanan sa sik Mafanud dawdaw fag Nanuranan
44“Diyus nu gmagurang taw kata yangay sik mafanud dawdaw fag nanuranan at malubguban sa sik gamasun. Ay bandi sik taw nalag ka fag nanuranan, ay nafafalyu yay, ay wa gfoyung sa tiba. Ay guseganan dawdaw te, anya wa long ban kanya fag nanuranan. Ay nafabili wan fagayu at fagagbilugun, laman nanbili ka fag gamasun laman anya wa ban anggan at mafanud dawdaw fag nanuranan sanya.”
Isus At Fafaskudanan sa sik Batu at Mafanud
45“Ay sadi ya fiya at nafafaskudanan. Diyus nu gmagurang taw kata yangay sa sik tagfabili nu gsarap ngay batu at mafanud. 46Ay nu nalag wan, nafabili wan fagayu at nanuranan, ay nabili wan ka fag ngay batu at mafanud.”
Isus At Fafaskudanan sa sik Fanggamat Uyang
47“Ay sadi ya fiya at nafafaskudanan. Diyus nu gmagurang taw kata yangay sa sik fanggamat uyang. Ay ngay taw naukas sasad lino at fanggamat uyang ay nagamat sik ngay uyang. 48Ay nu nkapnu wa uyang sat fanggamat, ka fag ngay taw naguyud at fanggamat uyang sas tigyangan lino. Ay malunggung yay sanya laman gfaful at masine fag ngay uyang sa at fagsuwadan. Ay naukas wan kayu at yud masine. 49Katanya yangay ban sas fakatabuwan fag ngay menit. Diyus at ngay tagfabarita gina mdasug nanfasaman wa at mauri fag ngay taw siginan at ngay masine fag taw. 50Ay mukas wa ban at mauri fag ngay taw sasad afuy tagigang daul. Ay sanya guyway wa ban dawdaw ay gfaringgitan at bagang.”
51Ay Isus ginto yangay te, “Go nasaful tuwam fagayu ku longan at masuwad?” Ay at ngay tagadal nabalus te, “Kin wan. Nasaful wami katsi.” 52Ay Isus nalong yangay fiya te, “Fagayu tagfoyung Muisis at Suguwan at naadal sa baliwas Diyus nu gmagurang taw, kanya kata sik tagbilug bale. Kanya nafasure siginan at fagsandigan at bagu ay at taglugo fag fagnuwan.”
Taw Nasaret Kalimata way Isus
(Mar. 6:1-6; Lukas 4:16-30)
53Ay Isus nu ntabu wa nu gfoyung ka fag ngay fafaskudanan, nalo wan sanya ginan. 54Ay nu ndasug wa sat fulan fiya fiya, nafoyung sanya fag ngay taw sat bale fakafulan. Ay at ngay tagdungugan nadulawan dawdaw. Ay gidgintoan sa tiba te, “Daginan manga kanya fag taw at fagnasafulun gfoyung takatanya? Ay daginan manga anggan at fagmadaragangun gfagbulun at madulawan? 55Sadaw kanya sik takamale way at baguwama? Ay sadaw at tina Maria way, ay at ngay fadugsay anway Use, ay Simun, ay Udas way? 56Ay sadaw anggan at ngay fadugsay fag ngay mangena ste ginan way? Daginan manga nu kasaful kanya fag taw takatanya fag foyungan?” 57Ay ka fag ngay taw wa nafanud Isus at foyungan. Ay Isus nalong sanya fag ngay taw te, “E gseg tuwa sas Diyus at taglong dewa nus nganday, dasday si at fulan mandi ay si at kalongan.” 58Nu katanya, Isus wa nafagbulun ngayuk madulawan sanya fag fulan, teway sanya fag ngay taw wa gafanud anya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Copyright © 2023 by OMF International, Philippines