Matiyu 12

Sinu Tagmagurang sis Fakamatoun fag Menit?

(Mar. 2:23-28; Lukas 6:1-5)

1Ay gina sik Fakamatoun fag Menit Isus ay at ngay tagadal nalo wa sa sik ngabak tanuman. Ay ginanya, at ngay tagadal kalunus, ay nabul sirut tibak buwadan ay naon wan. 2Ay ngay taw Parisiyu nalag ay nalong sas Isus te, “Linggati am ngay tagadal at fagbulun; igbul way buwadan. Nu katanya, kanya wa gfaning tam suguwan sis Fakamatoun fag Menit baliwa.” 3Ay Isus nabalus sanya fag ngay taw te, “Go sangay yam natap sa baliwas fun Dabid at fagbulun ebi gina kalunus, ay anggan at ngay ufud sigon gina kalunus? 4Ay fun Dabid ay at ngay ufud nasakbo sas Diyus bale ay naon sanya fag ngay anyun sas Diyus fag ngay tinafay, dewa marirukan sis Diyus at longan te, ‘Wa masine tibak taw nu kon ka fag ngay tinafay. Takon at ngay taganyun wadi.’ 5Ay go yam batang natap sis Muisis at Suguwan te, at ngay taganyun sis Diyus bale wa gfaning Fakamatoun fag Menit at ugali, madyay anggan kanya gfagbulunan way ginanya. Ay dewa katanya we asalanan. 6Ay glong akyangay sa ayu te, ste wan taglabi Diyus bale nu mafanud. 7Amatangani Diyus at longan te, ‘Ku fakaumsigun afanyui tuwa ay iba, anway fakafanyuun amasine yap nu gfon am ay anyun sa angku.’#12:7 Usea 6:6. Ay nasaful di am ka fag longan at masuwad, di am nangus glong sa baliwa sangay taw at yud e asalanan te, e asalanan. 8Aw, Taw at Baguwama, aw wan tagmagurang sis Fakamatoun fag Menit.”

Isus Nafafiya sik Ama at yud Mafalelegan at Take

(Mar. 3:1-6; Lukas 6:6-11)

9Ay rodi, Isus nalo wa sanya ginan ay nasakbo sa sangay taw Udyu at bale fakafulan. 10Ay sanya e sik ama at yud mafalelegan at take. Ay ngay taw Parisiyu ginto Isus te, “Go masine nu gfafiya o dewa sis Fakamatoun fag Menit?” Fakatanyaun, anway kaumsig nu e foyungan sa tibak taw te, Isus long e asalanan. 11Ay Isus nabalus sanya fag ngay taw te, “Go manga ay tupa at sadi fagalay intong sasad lusung sis Fakamatoun fag Menit, go wa ro am nanbul sanya ginan sad lusung? Gurungan nanbul yay ro am, go kin? 12Nu katanya, sik taw at kamesugan glabi yay fiya fiya sa sik balan, go kin? Nu katanya tuwa, masine way sik taw dewa e fagbulun nu masine tuwa dewa sis Fakamatoun fag Menit.” 13Ay rodi Isus nalong sa ka fag ama yud mafalelegan at take te, “Falugdei am take.” Ay kanya nafalugde at take, ay infiya wan. 14Ay ka fag ngay taw Parisiyu nalo wan, laman nansulitanan te, “Tain tam fagbulun laman gfafate ban tam ka fag Isus?”

Diyus At Fanuguwan

15Ay Isus nu nasaful ka fag ngay taw Parisiyu at fasadan, kanya nalo sanya ginan. Ay ngayuk taw naalo anya. Ay Isus nafafiya fagayu at ke daylan. 16Ay Isus nasalag sanya fag ngay taw te, “Lag gfoyung sa ay iba sa baliwa angku.” 17Fakatanyaun, in-gurungan ebi ebi Diyus at taglong Isayas at foyungan te:

18“Iste wan ku filian, ku fanuguwan.

Kesug aw ay guseganan aw dawdaw anya.

Nanfatsi aw anya ku Falad,

laman ban kanya moyung sa sangay talun at taw te,

‘Katsi Diyus matuyan nu gmagurang ayu.’

19Kanya di ban gfabadbaboan.

Malukme tuwa nu gelongan; di kadungug sa sangaba dalan.

20Kanya di gfabayan at yud katvngvd tiba at fagafanudun ay anggan di gfabayan sa at yud e fagsegun.#12:20 Sis Grigu, Sik sigbo malukyukan, kanya di ban glifung, ay ate sik salung takalayungun, kanya di ban gfalayung.

Kanya di katuwas nu gfagbulun yap ngay fiya fiya fagmatuyanun tagmagurang.

21Ay at ngay taw sas fagayu talun at fagsegun sa wa anya.”

Isus ay Satanas

(Mar. 3:20-30; Lukas 11:14-23)

22Ay e nataban sas Isus sik taw ke mafurat fag falad ay wa glag ay wa mafaelongan. Ay Isus nafafiya anya. Ay mafaelongan tuwa, ay iglag tuwa. 23Ay sanya fag ngay taw nadulawan ay nalodlongan te, “Tuy wa manga fag taw, fun Dabid at kadagdagan.” 24Ay taw Parisiyu nu nadungug ka fag ngay taw at longan, nabalus te, “Kanya fag taw at fagmafaayanun at mafurat fag ngay falad, at fagmadaragangun siginan ways Satanas, kanya at mafurat fag falad at fun.” 25Isus nasaful ka fag ngay taw Parisiyu at amatanganan. Nu katanya nalong te, “Sa sik fagmagurangan at ngay taw nu dway e fagmasadiun ay garingangan way gugat, bandi ban ka fag fagmagurangan umrasras wan. Katanya yangay sik fulan ay ate sik talafuwan nu dway e fagmasadiun, ka fag fulan ay ate ka fag talafuwan umfanalo wan. 26Ay Satanas nu gayan at ngay ufud, kanya gfasaful te, we fagmasadiun ay garingangan way gugat, ay at fagmagurangan umfanalo wan. 27Ay nu siginan wa ro fiya Satanas ku fagmadaragangun gayan at mafurat fag falad, sinu ro tagfon at fagmadaragangun gayan at mafurat fag falad sa tagfaning ayu? Nu katanya, ay ngay tagfaning wan tagfatuyan te, wam matuyan. 28Ay aw, ku fagmafaayanun mafurat fag falad teway Diyus at Masine fag Falad gtarabang tuwa angku. At masuwad te, Diyus at fagmagurangan indasug wa sa ayu.

29“Go sik takamul maasakbo tuwa sa sik madaragang fag taw at bale dewa gyud nasalod taguna kanya fag taw? Yaya! Ay kin, nu nasalod tuwa, kanya mafafamul wa ro fiya at ngay nanuranan sanya.

30“Ay nus nga sinu at yud gfadiyuganan angku, kanya ku fabarangyan way. Ay at yud gtarabang angku gfaful ngay taw, kanya gfasaruwayan way. 31Ay nu katanya, glong aw ayu te, fagayu taw at asalanan, ay fagayu taw at mauri fag longan sas Diyus baliwa, mafafalyam tuwa. Ay roro nus nga setaw fag longan at mauri sa at Masine fag Falad baliwa, wa mafafalyam faggugat. 32Ay nus nga sinu at ke mauri fag longan sa angku baliwa, Taw at Baguwama, mafafalyam tuwa. Ay roro nus nga sinu at ke mauri fag longan sa at Masine fag Falad baliwa, wa mafafalyam, dewa nus nga ginain.

Isus At Fafaskudanan sa sik Kayu ay sat Buwadan

(Lukas 6:43-45)

33“At masine fag kayu, at buwadan masine tuwa. Ay at yud masine fag kayu, at buwadan wa masine. At buwadan way tagfasaful sas taw te, go tain ka fag kayu. 34Am, kata way am sik ngay kubra! Setain nu mafafaelongan am nus nga setaw at matuyan, nu mauri way am? Nus nga setaw ay amatanganan, kanya wa ro ay longan. 35At matuyan fag taw, matuyan yangay nu gelongan, anway matuyan tuwa tagsi at amatanganan. Ay at mauri fag taw, mauri way nu gelongan, anway mauri way tagsi at amatanganan. 36Ay igfoyung aw sa ayu te, gina ban sas fagfasurean asalanan fag ngay menit nus nga sinu fag taw at naelongan mauri, kanya mandi tagfayamag at naelongan mauri. 37Anway am ngay longan wan tagfasaful emu te, go masine tuwo fag taw ay go mauri way o fag taw.”

Tibak Taw Udyu Gyalagun sik Madulawan fag Fagbulun

(Mar. 8:11-12; Lukas 11:29-32)

38Ay rodi, tibak tagfoyung Muisis at Suguwan ay tibak taw Parisiyu nalong sas Isus te, “Em Takamoyung, kaumsig ami nu gfalag o emi sik madulawan fag fagbulun.” 39Ay Isus nabalus te, “Am, katsi fag ngay taw, mauri way am. Wam gfaning Diyus. Gyalagun am dawdaw at madulawan fag fagbulun, ay roro we fagfalagun ayu dasday at madulawan fag fagbulun at kin-gurungan sas Unas, sik taglong. 40Anway nus nga setaw at kin-gurungan ebi sis Unas nu tuluk menit ay tuluk yabi nu sisad basad uyang, katanya yangay ban, Taw at Baguwama, tuluk menit ay tuluk yabi yangay ban nut sisad luwib. 41Ay ebi fag ngay taw Ninibi gdog yangay ban umleleg gfasfuwan katsi fag ngay taw, gina ban fanfilian fag ngay menit. Ay ginanya, taw Ninibi nanfasure yay ban katsi fag ngay taw at asalanan. Anway taw Ninibi naubun tuwa at asalanan gina nadungug Unas at foyungan. Ay amatangani, katsi iste wa gfoyung ayu taglabi Unas, ay dewa iste wam gubun ay asalanan. 42Ay ginanya yangay ban fag menit, talun Sheba at tagmagurang fag mangena gdog yangay ban gleleg gfasfuwan katsi fag ngay taw. Ay ginanya, ka fag mangena nanfasure yay ban katsi fag ngay taw at asalanan. Anway ka fag mangena ndasug sas fun Sulumun siginans fungfung daga, laman nandungugan fun Sulumun at mamatanganan fag longan. Ay amatangani, ste wan taglabi fun Sulumun, ay dewa katanya wam gdungugan.”

Sik Mafurat fag Falad gdog yay Kafoli

(Lukas 11:24-26)

43“Sik mafurat fag falad fagalay naubun aro at fagbanwanan fag taw, ay nalo sa sangaba talun at yud e safa laman nansarap tibak fagbanwanan, kanya nu dway e nalag 44gamatangan te, ‘Guli kyay siring sa ebi ataw ku fagbanwanan.’ Ay nu ndasug sanya, manlag di malanu ay masine ay we iba sanya, 45ka fag mafurat fag falad nansarap yay fitu yak mafurat fag falad laman at ufud. Ay kanya fag fitu glabi yay anya nu mauri. Ay fagayu nu gbanwan, maful wadi. Ay ka fag taw inkugat yay siginan ebi ataw nu mauri. Katanya yangay ban at kumgurungan anggan sa ayu fag ngay taw at mauri.”

Isus At Tina ay at ngay Fadugsay

(Mar. 3:31-35; Lukas 8:19-21)

46Ay kaduge Isus igfoyung sanya fag ngay taw, Isus at tina ay at ngay fadugsay indasug, ay gfanya sis day bale kaumsig gafamatuwanun anya. 47Ay e sik taw nafoyung sas Isus te, “Snay day bale am mina ay am ngay fadugsay kaumsig gafamatuwanun emu.” 48Ay Isus gbalus sa tagfoyung anya te, “Sinu ku mina? Ay sinu ku ngay fadugsay?” 49Ay Isus natiyu sat ngay tagadal baliwa ay nalong te, “Nin wan ku mina ay ku ngay fadugsay. 50Nus nga sinu tagfaning sa ku Mama sas banwa at fakaumsigun, kanya wan ku ngay fadugsay ay ku mina.”

Currently Selected:

Matiyu 12: TAWEAST

Highlight

Copy