Istir 2
2
At Fun at Nafili fag Mangena Istir
1Ay fun Aswerus nu nalyam wa nu kadotama, kanya namatang Basti at nafagbulun sa anya ay at nafariruk fag suguwan sanya baliwa. 2Nu katanya, at ngay fanuguwan tagtarabang fiya fiya anya nalong te, “Em fun, taw ro am fagyudun gsarap at masine fag ngay baguyna at yud batang e mangama? 3Filii sik ngay fun sirut sas fagayu fagmagurangan laman gsarap at masine fag baguyna at yud batang e mangama, ay tumaban ste Susa, at maaladan fag fulan,#2:3 Susa, at maaladan fag fulan: katanya yangay sis tapan 5 ay 8. sas mangena fagtiyugan. Ay Igay, taglabi tiba am fun sirut ay tagtanud at ngay baguyna sam bale daul, kanya wan tagfon sanya fag ngay baguyna at ngay famasine. 4Ay nus nga sinu am fakaumsigun fag baguyna kanyai wan at fantubus Basti laman am mangena. Ay at fun inkumsig ka fag longan ay nafaning wa fiya katanya.”
5Ginanya fag lungud, e sik taw Udyu gbanwan sis Susa. At ngayan Mardukyu. Mardukyu tama Yair, ay at fufuwama Simi, ay at fufuwama tud Kis. Kanya siginans Benamin at kadagdagan. 6Mardukyu wan at sadi Nabukudunusur at fun sis talun Babilunya at nataban sas talun Babilunya siginans Erusalem gfasfuwan Yuyakin, at fun sis talun Uda. 7Mardukyu e lagbe sik baguyna. Ay kanya wan at nafagut ay nafadaul kata nu at unga, teway we magurang. Ay nafangayan anya Adasa. Ay at sadi at ngayan Istir. Kanya sik masine fag baguyna ay masine yangay nu gbilugan.
8Ay gina nafoyung at fun suguwan, ngayu at nataban baguyna sas fun bale daul sas Susa. Ay at sadi Istir. Ay nafatanud sas Igay teway kanya wan at nafili tagtanud at nataban fag ngay baguyna. 9Igay guseganan dawdaw sas Istir, nu katanya, masine nu gfaudgufudan anya. Ay nafon wa mafali sas Istir at fakonun ay anggan at ngay nayudanan fag ngay famasine. Ay nafon yangay anya at masine dawdaw fag fagtiyugan ay fituk baguyna tagtarabang anya.
10Ay Istir wa gfoyung te, kanya sik taw Udyu, teway Mardukyu nalong anya te, lag gfoyung. 11Kayu menit Mardukyu gdalan makbang sanya fag ngay baguyna at fagbanwanan at faglanuwan laman nangasaful te, go mabayan tuwa Istir nu gbanwan.
12Sik baguyna nu nangakbang sas fun, sik banwa tuwa nu gfasine at bilug. Taguna fag unumk magdanun, grarus langis mira sat bilug ay at fadogan fag unumk magdanun, grarus yangay tibak famabebanglu ay tiba yak famasine. 13Ay ka fag baguyna bagu ban umsure sat fun, gfon anya nus nga setaw fag balukas ay sik ngay famasinean at fakaumsigun gsulun laman nanlag sat fun. 14Ay nu nyabi wan, kanya glo wa sat fun, ay balabag di gtaban wa sat fun ngay mangena at bale. Ay Saasgas, at fun at taglabi tibak fun sirut ay tagfatvngvdun at fun at ngay mangena, kanya wan tagfatvngvdun ka fag ngay baguyna. Nus nga sinu fag baguyna we maafoli sat fun, nu dway at fun fakaumsigun ay nagewan.
15-16Gina fasafuluk magdanun, at ngayan Tebet, ay gina fafituk banwa fun Aswerus nu gmagurang, indasug at menit Istir nu nangakbang sat fun sas bale daul. Ay Istir nafaning fagayu Igay at fangatulun anya. (Igay, at fun taglabi tibak fun sirut ay tagtanud at ngay baguyna sat fun bale daul.) Ay kanya nasulun Igay at nalong anya fag balukas. Ay fagayu at nalag anya nalong te, masine way ngap.
17Ay at fun kaumsig Istir glabi yay sa tibak baguyna. Ay guseganan dawdaw Istir ay nafe sangbo. Ay kanya wan fantubus Basti, at mangena. 18Ay at fun nafamasadan sik yafun daul laman gfauseganan Istir. Kanya nafatsanya at ngay fun sirut ay tiba yak tagfagbulun sa anya. Ginanya fag menit nasugu yangay sas fagdaul at fagmagurangan te, lag am gfagbulun. Teway at fun sik takamon nafon sik ngay famanyun sas fagayu taw.
Mardukyu Nafalangfe at Fun
19Gina at ngay baguyna at faduwa ginan kaful, Mardukyu sik fun sirut wan ay kanya tagtanud sis fun bale daul at sakbawan. 20Ay Istir ya batang gfoyung te, kanya sik taw Udyu kata Mardukyu at longan sa anya. Istir gfaning tuwa gugat kata ebi gina maful si at ayi.
21Gina Mardukyu sik fun sirut tagtanud sis fun bale daul at sakbawan, e duwak fun sirut at ngayan Bigtana#2:21 Bigtana: ay ate, Bigtan. ay Teres. Kanya fag duwama tagtanud fun at sakbawan fagtiyugan. Ay kadotama sat fun Aswerus ay nafasadanan te, gfate wata anya. 22Ay Mardukyu nu nasaful ka fag fasadanan, kanya nafoyung sas Istir. Ay Istir nafoyung sat fun, ay nafoyung yangay te, Mardukyu at nasaful ka fag fasadanan. 23Ay at fun nanangatuyan fiya fiya, ay nu nasaful te, matuyan wa fiya, kanya nasugu te, ruguti fabaringbingi Bigtana ay Teres sa sik kayu. Ay fun nasugu te, riruki at kin-gurungan sas fafil at nafangayan te, Fakamansulitun sa baliwa Tam Fagmagurangan.
Copyright © 2023 by OMF International, Philippines