मरकुस 16

ठाललो माहणो

(मत्ती 28:1-8; लूका 24:1-12; यूहन्ना 20:1-10)

1जेवी शब्बाथान दिहान जाणेन बादमाय, तो मग्दालिया एने याकूबान आहाक मरियम, एने सलोमव ज्याच सुगंधीत तेल वेचातो लीईल आवीन तापोर लागाडील. 2हफ्तान पेल्ला दिह मोठला एने वेगोस ताहेरया सूर्य निकेलनोच एतो, तान कबर उपेर आवी, 3एने आपसामाय केणेन, “आमरे केरता कबरान बायणा पुर्रिन कूण दिगुड डेकलीन आपुह?” 4ताहेरया तास डोला उगाड ल, तेवी देखायील तर दिगुड ढ़ेकल्या गीयो हि तो जुलुम मोठू एतो. 5एने कबरने आहने जाइन, ता एक जुवान्याह दोवल्या फाडका पेरीन एने जेवड उगे बोहवदेखायील, एने जुलुम भोंग्लाना. 6तो ताह कियील, भोंगलावू मा, तुमूह यीशु नासरी ह, जाह क्रुस पोर चेढाविल एतो ताह होदतेह. तो मोरना मायरीन उठिल हि, न्या नाहं सोतो, देखू ज्यो तोच जागु हि, न्या ता ताह मिलवएता. 7पुण तुमूह जाऊ, एने तान चेला एने पतरसाह केवू का तो तुमरे पेल गलील लामाय जाय; जोहलो का ताह तुमूह कियील एतो, तुमूह ताच ताह देखहु 8एने त्यू निकलीन कबर मायरीन निकलीन गीया यव; काहाकाय थर थर एने भिनोसारखो तापोर एय गीया; तास ताह काहीच कियील नाहं, तान काहाकाय बियेल एती.

मरियम मगदलीनीन यीशुह देखणो

(मत्ती 28:9-10; यूहन्ना 20:11-18; लूका 24:13-35)

9हफ्तान पेल्ला दिह वेगास एताच तो जव एने ताला एनो पेल्ला हाजा हेकाले मरियम मग्दालिया ज्यान मायरीन तान सात दुष्ट आत्मा काडील एता, ताह यीशु देखानो. 10तिने जाइन यीशुन जोडव दाराह शोकात बुडना एता एने रेडतेन एता, वर्तमान आपील. 11ते हे कोलाक कि तो जीवताला हि एने तिने ताह देखायील, एने विश्वास नाहं केरील.

दुय चेलाह देखाणो

12तान उवतू तो तो दिहरान रुपाम तामायवाला दुईजानाह ताहेरया ते गावाउगे जात एता, देखाईल. 13तास पुण जाइन दिहराह समाचार आपील, पुण तास तां पोर पुण एने विश्वास केरील नाहं.

महान आदेश

(मत्ती 28:16-20; लूका 24:36-49; यूहन्ना 20:19-23; प्रेरितान कामे 1:6-8)

14पासाण ताह ता अकरा जनांना पुण, ताहेरया ते जेवण केरणे बोह्ना एता देखानो एतो, एने तान अविश्वासान एने मोनान वातडो उपेर दोष लागाडील, काहाकाय तान केरता तान मोरना मायरीन उठनेपोर ताह देखायील, तास तापोर एने विश्वास मेलील नाह एतो. 15एने तो ताह कियील, “तुमूह आखा जगाम जाइन आखा पृथ्वी एने माणहाह समाचारान सुवार्ता पोरचार केरू. 16जो विश्वास करने एने बाप्तिस्मा लेणे ताणुच उद्धार एय, पुण जो विश्वास नाहं केरुहू तो दोषव ठेरायवजाहो; 17एने विश्वास केरणारापोर हे चिन्ह रेंय कि ते मारो नावान दुष्ट आत्मा काड्तव, नोवालो भाषा बोलतव, 18गेयळेक एने विसीन लेतव, एने केध्दव ते जेनवाराननास वस्तु पुण पिईन लेतव तान भी तान हानव एय नाहं; दुखार्यापूर आथ मेलतव, एने ते हजो ऐतव.”

यीशुन स्वर्गाम जाणो

(लूका 24:50-53; प्रेरितान कामे 1:9-11)

19तेवी प्रभु यीशु तां हेऱ्यो वातू केरणेन बादमाय स्वर्गाम विसाय गीयो एने बोगवानन जेवडी उगे बोह गीयोह. 20एने ता निकलीन प्रत्येक जागापूर पोरचार केरील, एने प्रभु हेरी काम केरतीन रेणू, एने ता चिन्ह द्वारे जे आहने-आहने एता वाचनाह केरतीन गीयो. आमेन.

Currently Selected:

मरकुस 16: NLXNT

Highlight

Copy

Compare