मत्ती 23

शास्त्री एने फरीसी

(मरकुस 12:38,39; लूका 11:43,46; 20:45,46)

1तेवी यीशु गर्दीह एने आपणो चेलाह कियील, 2“शास्त्री फरीसी स्वताह मुसाहा गादिपोर बोहीन गीया हि, 3तामुळे जे काही ते तुमूह केनार एने ते तुमूह केरुहू, एने कियील पुण तानहोस काम केरुहू नाहं कारण ते केणु पुण केरतीन नाहं. 4ता ओहालो बार जाह विसणेन कठीण हि, माणहान खांद्यापूर मेलणु ता बारह स्वताह ते आपणी आंगली केरीन भी नाह हेरकावने होदते. 5ते आपणा आखा काम माणहा देखणे केरता केरणू, एने ते आपणो मंत्र प्रत्रे आत्या केरणू एने आपणो फाडकान झालर लांबी केरणू. 6एने खाणेन विशेष मानान हाजो जागी, एने आराधनालय माय रेणू. 7एने बाजारामारीन मुख्य मिलवीन, एने माणहापोर गुरु केरीन, लेणेन ताह प्रिय लागीह. 8पुण तुमूह गुरुजी केहू मा कारण तुमरो एकुच गुरु हि एने तुमूह आखा बाहाक हेते. 9पृथ्वीपोर कोणीही आपणो आबुक केहू मा कारण तुमरो एकुच आबुक हि तो स्वर्गाम हि. 10तुमूह गुरुजी केहू मा कारण तुमरो एकुच गुरु हि म्हणजे मसीह. 11पुण जो तुमरो आखान मोठू हि तो तुमरो दास एय. 12जो कूण जीवाह मोठू बोनाडी ताह आत्यो केरणे आवी, एने जो जीवाह आत्यो, बोनाडी मोठू केरणेन आवी.”

शास्त्री एने फरीसीन ढोंग

(मरकुस 12:40; लूका 11:39-42,44,52; 20:47)

13“हे कोपटी शास्त्री एने फरीसी, तुमु पुर हाय! तुमु माणहान विरुद्ध माय स्वर्गान राज्यान दरिनाजा बोंद केर्तेह, नाह ते तुमु तामाय जातेह एने नाह ते तामाय प्रवेश केरणारा जाणे देतेह 14हे कपटी शास्त्री एने फारीसियो तुमु पुर हाय तुमु विधवान घेरा खाय जातेह एने देखाडणे केरीन जुलुम वार उबरीन प्रार्थना केरते रेणू ज्यान केरीन तुमूह अधिक दण्ड जुळी.” 15हे कोपटी शास्त्री एने फरीसी तुमु पुर हाय तुमु एक जाणाह आपणे मताह माय लावणे केरीन समुद्र एने पृथ्वीपोर फिरनू, एने जेवी तो मत माय आव जाणे, ते ताह आपणेह रीन भी दुप्पट नरकान सोरान होस बोणाव देणु

16हे आधलो वाट देखाड्णारा तुमरो हाय ओहलो जे केणु जर कूण मंदिरान शपथ लीईल तर ते कायीच नाहं पुण जर मंदिरान होना शपथ लीईल तर तो तान कर्जदार एईल जाहू. 17हे मुर्खा एने आंधला काय महत्वान हि होना केव्ही ते मंदिर जे होनाह पवित्र करने? 18ओवतो केणु जर कूण वेदी शपथ लेहु तर ते कायीच नाहं पुण जे ज्यापूर चढविले भेट ची शपथ लेहु तर तो कर्जदार एईल जाहू. 19हे आंधला काय महत्वन हि भेट केव्ही ती वेदी जी मिलुहूं पवित्र करने? 20तामुळे जो शपथ खाहोव तो ती वेदी एने तीपुर सोडावील शपथ वोनापोर शपथ खाहोव. 21जो मंदिरान शपथ खाहोव तो ता मंदिरामाय रेणार बोगवानान पुण शपथ खाहोव. 22एने जो स्वर्गाची शपथ खाहोव तो बोगवानान सिहांसनाची एने तापोर बोहील दुयुन शपथ खाहोव.

23“हे कोपटी शास्त्री, एने फरीसी, तुमु पुर हाय, तुमु पुदिना एने सोपने एने जीरान दाहवू भाग आपणु, पुण तुमु व्यवस्था महत्वान वातू म्हणजे न्याय, एने दया विश्वासाह ज्यू वातू तुमु सोड दियील हेत्यू पुण तुमूह ज्यू वातू केरणू एतो एने त्यू सोडनु नाह एतो 24हे आधलो, वाट देखाडनारा, तुमूह मच्छर मारीन ताक्णु पुण उंटळाह गीतीते ताक्णु.” 25“हे कोपटी शास्त्री, एने फरीसी, तुमु पुर हाय तुमु तेल्यू एने वाटक्यू बाहेररीन साफ करतेह पुण मायरीन आंन्दारो एने असंयम माय बोरायेल हेते” 26“हे फरीसी तुमु आंधला हेते पेल तुमरी वाटकी मारीन गेहडू एने दोवू म्हणजे बाहेरीन खेरीच साफ एय” 27“हे कोपटी शास्त्री, एने फरीसी, तुमु पुर हाय तुमु चुनान रेंग लागाडील माहांणान होस हेते जां उपेररीन ते हाजा देखाणे, पुण माय मुरील मुर्दान आडे एने आखा प्रकार ने मलीनता माय बोराएल 28ता प्रमाणे तुमु भी उपेररीन माणहाह धर्मी देखाणु, पुण मायरीन कपट से एने अधर्मामाय बोरील हेते”

शास्त्री एने फरीसी पोर दाण्डन भविष्यवाणी

(लूका 11:47-51)

29“हे कोपटी शास्त्री, एने फरीसी तुमु पुर हाय तुमु भविष्यवाणी केरणारा भविष्यवक्तान माहणे हुदारनू एने धार्मिक माणहान माहांण बांधणु 30एने केणु जर आमु आपणो पूर्वजान वेलाम रेणा हि तर भविष्यवक्तान खुनाहा भागदार रेणा नसतू. 31ज्यापरीन तुमूह स्वताह विरुद्ध गवाही आपणु कि भविष्यवक्तान घात केरनारण सोरा हेते. 32केरीन तुमूह आपणो पूर्वजान पापाहा कर्ज बोरीन दया. 33हे गेयळेकान पिलानो, तुमूह नरकान दण्डम केवी वाचणेन? 34तावाजेसे देखू मी तुमरीकेरता भविष्यवक्ता एने शास्त्रान मोकलीन रेणा हि तुमूह तामायरीन केरताज घात केरुहू एने कोल्लाकतेबी क्रुस पोर चढविणारो ओवतो कोल्लाकतेबी आपणो आराधनालय माय का मारणार एने शहरा गावामाय सोनावाही केरतीन फिरणार? 35कि ताहेरया खोरामानहा रक्त पृथ्वीपोर वोईल हि तो तुमरो मुंडीपोर हिकाडणे म्हणजे खेरो हाबेलापोररीन बर्खेए सोरो जख-या ताहवोर ज्याह तुमूह एने मंदिरामाय एने वेदी हीन मारीन टाकील एता. 36मी तुमूह खेरीच किथु आवो आखा वातू आवो पिडीन मुंडीपोर पोळी.”

यरूशलेमान केरता दुख

(लूका 13:34,35)

37“हे यरूशलेमा, हे यरूशलेमा! तू भविष्यवक्तान मारीन टाकतोलो एने जो तार केरता मोकलनेमाय आवा हि तापोर दिगुड जगारील केरणू मी कोलाक वेळा ईच्छा केरील कि जीही कुकडी आपणो पिलाह एक्ठाच केरूह तोहोलोच मी पुण तारो सोराह एक्ठाच केरूह पुण तारी ईच्छा नाहां एती. 38देखू, तारो घेर तार केरता उजाड सुळील जातेह.” 39काहाकाय मी तुमूह किथु कि एविरीन तुमूह माहु ताहउर देखूह नाहं जेवीवोर तुमूह जो केनार नाहं, “धन्य हि तो जो प्रभुन नावान आविह हि.”

Currently Selected:

मत्ती 23: NLXNT

Highlight

Copy