प्रेरितान कामे 13

बरनाबस एने पौलुसाह मोकलणेन

1अन्ताकियान कलीसियान माय कूण भविष्यवक्ता एने शिक्षक एतो; जोहलो: बरनाबस एने शिमोन नीगर आहने केयेल जाथी; एने लुक कुरनेकर, एने कलीसिया देशान राजा हेरोदेसान दुय बाहाक मोनाएल, एने शाऊल. 2ताहे-या ते उपास केरतीन प्रभुह उपासना केरतीन एता, तेवी पवित्र आत्मा माय केदा, “मारबाराम बरनाबस एने शाऊल ता कामान केरता आलेग केरू ज्यानकेरता मी ताह हादाड्या हि.” 3“तेवी तास उपास एने प्रार्थना केरीन तां पोर आथ मेलीन आपील.”

पौलुससान पेलली पोरचार-यात्रा

4सेवट: तो पवित्र आत्मा मोकलील सलुकीयामाय गीया; एने तारीन नावेपोर चेडिन साइप्रस गीया; 5एने साल्मिनामाय पोचीन, बोगवानान वचन यहूदीयान प्रार्थना आराधनालय माय केयेल. यूहन्ना ता दास इतो. 6ते ता आखा बेटामायरीन चालीन पाफुस ताहवोर पोचना ताह ताहारी बर्येषु नावान यहूदी जादूटोणा एने जुठा भविष्यवक्ता एतो. 7तो तान हाकीम सिरगियुस पौलुसाहे-यो इतो, जो बुद्धिमान माणह इतो तास बरनाबस एने शाऊल आपणे हेऱ्यो हादाडळीन बोगवानान वचन होमलाण्यु इतू. 8पुण अलीम जादुगार तान नावान अर्थ जोस हि ज्यासे तानकेरीन विरोध केरीन सुभेदारान विश्वासाह थोबाडणेन काम केरतीन एतो. 9तेवी शाऊल ज्यान नाव पौलुस पुण एता पवित्र आत्मा माय परिपूर्ण एय ताफाय एक एक लागाडील देखील, एने कियील. 10“हे आखा देगुकेरिन एने हुशार पणाने भोराईल शैतानान सोरा, अवघ्या धार्मिकता वैरी, काय तू प्रभुन हेल्लीच मार्गाला विपरीत केरणेन सोडहु नाहं का? 11ऐवी देखू, प्रभुन आथ तारपोर लागिल हि; एने तू काही टाइम ताहवोर आंधलू रेहू एने दिहान देखणार नाहं.” तेवी लागीच थूप्या पोडीलेनेगेत एने तान डोलापूर आन्दारी आवी, एने तो याहारू तोथा होदणे केरूह लागिल कारण कि कुणीन तेभी आथ देरावीन चालती ओहलो तान परिस्थिती एती. 12तेवी सुभेदाराने जे एय गीयो एता ताह देखीन एने प्रभुन शिक्षणापुरेन चक्कित एयन विश्वास किरील.

पिसिदियान अन्ताकिया माय

13पौलुस एने तान हेरी पाफुसरीन नावीम बोहीन पंफुलीयाम पिर्गा न्या आवा; एने यूहन्ना ताह सोडीन यरूशलेम ला निकलीन गीयो. 14पिर्गारीन ओगाण जाइन ते पिसिदियामाय अन्ताकियाम पोचेल एने शब्बाथान एक दिह आराधनालय माय जाइन बोह्ना. 15व्यवस्था एने भविष्यवक्तान पुस्तकामाय वाचणे बादमाय आराधनालय माय अधिका-यान केयीन मुकलेल, “हे बायहो, केध्दीह माणहान हिकणेन केरता तुमरो मोनाम काही रेंय तर केवो.” 16तेवी पौलुस उब रेणो एने आथा केरीन इशारू केरीन केयील, “हे इस्राएल माणहा, एने बोगवानाह बिणारा, होम्लू: 17ता इस्राएल माणहान बोगवानान आमरा पूर्वजान निवाडीन लिईलअने, ताहे-या ते माणहे मिस्र देशामाय बाहेर देशान एय रेथे एतो तेवी तान प्रगती केरील; एने पराक्रमी आथा केरीन काडीन लीईल. 18तो काही चाळीस वर्षा पोर जेंगलामाय तान सहन केरतीन रेणू. 19एने कनान देशामाय दिहरी जातीन सात नाश केरीन तानकेरीन देश साडे चारहोव वर्षामाय तानकेरीन कनान देशामाय केरीन लियेल. 20ज्ञान ओवतो तान शमुवेल भविष्यवक्ता ताहवोर ताह न्यायी ठेराव्यू. 21तान ओवतो तान एक राजा मांगील: तेवी बोगवानान चाळीस वर्षानकेरता बिन्यामीन वंशजातील एक माणुह; म्हणजे किशान सोरो पौलुसला तां पोर राज्य केराईल. 22ओवतो ताह आलेग केरीन दाविदाह तानकेरीन राजा बोनाईल ज्यान विषय माय तान गवाही आपील माहु एक माणुह ईशायान सोरो दाविद, मारो मनाहोच माहु जुडना हि तोच मारी आखीच ईच्छा पुरो केरूह. 23तान वंशामाय रीन बोगवानान आपणो प्रतिज्ञान नुसार इस्राएल आहने एक उद्धार केरथू म्हणजे यीशुह मोकलील. 24तान आवणारा पेलूच यूहन्नान इस्राएल माय मोन फिरावीन बाप्तिस्मा चा पोरचार किरील. 25एने यूहन्ना आपणी सेवा पुरी केरणेपूर इतो, तेवी तो ताह कियील, तुमूह माहु काय होमजणू? मी तो नाहं सोतो, देखू मार बादमाय एकजाण आविह तान पायान खाहडान बोंदे सोडणेन भी मी लायकीन नाह सोतो.”

26“हे बायहो, तुमूह जे अब्राहामान सोरा हि; एने बोगवानान ओगांण रेडनु, तुमरीफाय ज्योच उद्धारान वचन मोकलील हि. 27काहाकाय का यरूशलेम ने रेणारान एने तान सरदारे ताह ओलखिल नाहं एने भविष्यवक्तान वातू होमजील नाहं जे प्रत्येक शब्बाथान एक दिह वोचील जातेह ज्यानकेरता ताह दोषी ठेरिनीन ता वातुहू पुरो किरील. 28तास मारीन टाकणे केरता योग्य दोष तामाय सापडेल नाहं तेभी पिलातुसाफायरेन विनंती केरील कि ताह मारीन टाकील जाणे. 29ताहे-या तास तान विषयाम लिखील आखा वातू पुरो केरील कि ताह क्रुसापूर उपेरीन उतारीन कबरेमाय मिलील. 30पुण बोगवानान ताह मोरील मायरीन जीवतालू किरील, 31एने ते ताह जे ताहे-यो गलील रीन यरूशलेमा माय आवा एता, जादा दिहावोर देखाती रेणू; माणहान सुमोर ऐवी तोज गवाही रेणा हेते.” 32एने आमु तुमूह ता प्रतिज्ञान विषयामाय जी पूर्वजाहे-यो केरील, एती, तीस सुवार्ता होमलाडतेह, 33का बोगवान यीशुह जीवतालू केरीन तीस प्रतिज्ञा आमरा सनातनान केरता पुरो केरील जोहलो का दिहरा स्तोत्रसंहितामाय भी लेखील हि,

“तू मारो सोरो हि”

“आज मीच तुवाह जेल्मो आपील हि.”

34एने तान ज्योच रीतीमाय मोरील मायरीन जीवतालू केरणेन बरामाय माय पुण कि तो केधीच साधारण नाहं तान ओहलाच कियील,

“मी दाविदान पवित्र एणेन निवरणारी कृपा तुमरे पोर पुण केरूह.”

35ज्यानकेरता तान उंजू एक स्तोत्रसहीतामाय कियील हि,

“तू आपणा पवित्र जाणाहा सेडणे नाय देय.”

36काहा दाविद तर बोगवानान ईच्छा नुसार आपणो खुदमाय सेवा केरीन हुवीन गीयो एने आपणो पुर्वाजामाय जाइन जुडना एने सोडीन पुण गीयो. 37पुण बोगवानान ज्याह जीवतालू किरील तो सूड शकील नाहं. 38ज्ञान केरता, हे बायहो, तुमूह पुण होमजाडीन ली कि याणूच द्वारे पाप्यान क्षमान घोषणा तुमूह आपील जात हि; 39एने ज्या वातीमाय तुमूह मुसान व्यवस्था द्वारे निर्दोष ठेरहू शकत नाहं तान आखामाय प्रत्येक जन विश्वास केरणार तान द्वारे निर्दोष ठेरहू. 40जानकेरता होमंबालीन रीवू इही एहू नाहा कि भविष्यवक्तान पुस्तकामाय आवा हेते ते तुमरे पोर आवु:

41हे निंदा केरणा, देखू, एने आश्चर्य केरू एने निवरीन जा;

“काहाकाय तुमरो दिहामाय एक काम करने इही, काम कि केध्दीह कूण तुमरीफाय तान चर्चा केरहेतू केध्दीह तुमूह विश्वास केरुहू नाहं.”

42तान बाहेर निकलने टाइम माणहे ताह विनंती केरूह लागिल कि ओंगाल्यो शब्बाथान एक दिह आमूह हि वात पोशा होमलावीन जाऊ. 43एने जेवी आराधनालय मायवाली सभा निवरी गीयी यहूदी माणहे एने यहूदी मत माय आईल भक्ता मायरीन पौलुस एने बरनाबस न्यान पासाण गीया; एने तां ताहेऱ्या वातू केरीन होमजाडील, का बोगवानान कृपा माय बोणीन रीवू.

पौलुस द्वारा अन्ताकिया माय पोरचारान सुरुवात

44शब्बाथान ओगांल्या दिह नगरामाय बहुतेक माणहे बोगवानान वचन होमलनेकेरता एक्ठा एय गीया. 45पुण यहूदी गर्दीह देखीन हेवो केरीन बोह गीया एने निंदा केरताच पौलुसुसान वातून भी विरोधामाय बोलणे लागिल. 46तेवी पौलुस एने बरनाबस नाह बिन केणे लागिल, “आवश्यक एतो, का बोगवानान वचन पेल तुमूह होमलावणे माय ओवतो; पुण तुमूह ताहेऱ्या रीन सेटा रेतेह, एने आपुहू अनंत कालिक जीवनाम योग्य नाह ठेरावतेह, ते देखू आमु दिहरी जातीन वुगे फिरतेह.” 47काहाकाय का प्रभु हि आज्ञा आपील हि का, “मी तुवाह दिहरी जातीन केरीन प्रकाश इही ठेराव्यू हि, काहाकाय तू पृथ्वीन शेवेट ताहवोर उद्धारान बायणो हि.” 48जो एतो दिहरी जाती आनंदित एय गीयो एने बोगवानान वचनान महिमा वर्णवू लागलएने जोला अनंत जीवनान केरीन ठेराव्यू गीया आथे तास विश्वास किरील. 49तेवी प्रभुन ता आखा देशामाय पासारू लागिल. 50पुण यहूदी माणहे ते भक्त एने धार्मिक बायकूह एने नगर ने प्रमुख माणहाह बोडकावीन, एने पौलुस एने बरनाबस न्याह मोक्तो हाजो बाक्तो केयीन ताहेर्या गेंज बाक्तो केरीन ताह हेयरान बाहेर काड दियील. 51तेवी ता तान ओगांण आपणा पायान मातड्यो झेटकीन इकुनियुम निकली गीया. 52एने चेला आनंदमाय एने पवित्र आत्मा माय परिपूर्ण एता गीया.

Currently Selected:

प्रेरितान कामे 13: NLXNT

Highlight

Copy

Compare