Sofonías 1
1
Sc'ahc'alel yilimba Jehová
1Ha te sc'op Jehová te tal ta stojol Sofonías snich'an Cusi, snich'an Gedalías, snich'an Amarías, snich'an Ezequías, ta yorahil Josías snich'an Amón, ajwalil yu'un Judá.
2Jc'axel ya jlajin spisil bintic ay
ta sba te bahlumilal, xchi te Jehová.
3Ya jlajin ants-winiquetic soc chambahlametic,
ya jlajin te mutetic ya xwihlic ta toyol
soc te chayetic ta mar,
ya cac' ch'ayuc bahel te mach'atic chopol yo'tanic,
soc ya jlajin ta sba bahlumilal
te ants-winiquetic, xchi te Jehová.
4Ya jach jc'ab ta scontrahinel te Judá
soc ta scontrahinel
spisil te mach'atic nahinemic ta Jerusalén.
Jc'axel ya jlajin ta lugar ini
jayeb xan hilem yu'un Baal
soc te sbihilic te mach'atic
ya x'a'tejic ta stojol te loc'ombahetic
soc te sacerdotehetic yu'unique.
5Ya jlajin te mach'atic ya squejan sbahic ta sba sna
ta sch'uhuntayel te bayel eq'uetic ta ch'ulchan,
te mach'atic ya squejan sbahic
yu'un ay bin ya yalic ta jamal ta scuenta Jehová
soc yu'un ay bin ya yalic ta scuenta Milcom;
6te mach'atic ya yihquitayic st'unel te Jehová,
te mach'atic ma ba ya slehic te Jehová
o te ya sjoc'oyic.
7Ch'aban ta stojol te Jehová, te Ajwalil,
como nopolix te sc'ahc'alel yu'un Jehová;
te Jehová schahpanej milbil mahtanil
soc sch'ultesej te ic'abiletic yu'une.
8Ta sc'ahc'alel te milbil mahtanil yu'un Jehová
ya ca'be castigo te príncipaletic,
te snich'nab te ajwalil,
soc spisil mach'atic ya slapbeic sc'u' jyanlumetic.
9Soc ha nix ta sc'ahc'alel ya ca'be castigo
spisil mach'atic ya swihluntayic ochel
ta smarcohil ti'nahil,
soc te mach'atic ya snojesic te sna yajwalic
ta uts'inwanej soc lo'loywanej.
10Ta hich ora, xchi te Jehová,
ya xchicnaj awetic c'alal ta ochibal yu'un Chay,
ya xchicnaj ahcan c'alal ta Schebal Barrio
soc tulan xnilet c'alal ta tsehletic.
11Ahcanajanic ha'ex te nahinemex ta Mactes,
como lajic spisil te jchombajeletique;
lajic spisil te mach'atic
ya ya'iyic mambajel chombajel ta plata.
12Ta hich ora ya jtsahtay quil ta tsumbil c'ahc' te Jerusalén,
soc ya ca'be castigo te mach'atic slahmanej sbahic
hich te bin ut'il vino te slahmoj sba,
te hich ya yal ta yo'tanic:
Te Jehová ma ba ya spas
te bin lec o te bin ma lecuc, te xchihique.
13Ha yu'un ya me yich' pojel te sc'ulejalic,
soc ya me yich'ic jinel te snahique.
Ya spas snahic,
pero ma ba ya xnahinic tey a,
ya sts'unic ts'usubiletic,
pero ma ba ya yuch'beyic te ya'lele.
14¡Nopolix te smuc'ul c'ahc'alel yu'un Jehová!
¡Nopolix yorahil!
Ch'a ya xc'oht te aw ta sc'ahc'alel te Jehová,
asta ya x'awon tey a te mach'a ay yip.
15Ha sc'ahc'alel ilimba,
ha sc'ahc'alel mel-o'tan soc pich'il-o'tanil,
ha sc'ahc'alel jinel soc lajinel,
ha sc'ahc'alel yihc'al q'uinal soc ahc'abal,
ha sc'ahc'alel macal ta tocal soc pimil ihc'al tocal,
16ha sc'ahc'alel yoq'uesinel corneta soc aw
ta scontrahinel te pueblohetic te joybilic ta ts'ahc
soc ta scontrahinel te toyol bahlal ts'ahquetique.
17Ya ca'be swocol te ants-winiquetic,
hich ya xbehenic te bin ut'il ts'o'sitetic,
como la sta smulic ta stojol Jehová.
Ya xmalbot sch'ich'elic hich te bin ut'il ts'u'lum,
soc te sbaq'uetalic hich te bin ut'il tsa'.
18Ta sc'ahc'alel yilimba te Jehová
ma ba ya xcoltayotic yu'un te plata o te oro yu'unique;
ya xlaj spisil te q'uinal ta sc'ahc'al te xut'et yo'tan,
como ora nax jc'axel ya slajin
spisil te mach'atic nahinemic ta q'uinal.
Currently Selected:
Sofonías 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.