Habacuc 3
3
Bin la yal Habacuc ta stojol Dios
1Te bin la yal ta sc'oponel Dios te Habacuc, ta scuenta Sigionot:#3.1 Ha wan sc'oblal bin ut'il ya yich' c'ayojtayel.
2¡La jca'iybat ac'oblal, Jehová,
xcham co'tan yu'un!
Pasa xan awa'tel, Jehová,
ta yorahil ayotcotic;
ta yorahil ayotcotic
ac'a ta na'el te awa'tele;
aunque ilinemat, na'a me c'uxultayel.
3Ya xloc' tal Dios ta Temán,
ya xloc' tal te Ch'ul Dios ta wits Parán.
Te yutsilal la snojes te ch'ulchan,
noj te bahlumilal ta halbeyel yutsil sc'oblal.
4Te sts'anabul hich ay te bin ut'il sacal q'uinal;
ya xloc' tal sjahts' sc'ahc'al ta sc'ab,
tey snac'oj sba a te yu'ele.
5Te jmilawal-chamel ya xnahilij bahel ta stojol,
soc ta spat te yoc ya xloc' c'ahc'.
6Ya stehc'an sba, ya yac' nihcuc te q'uinale;
ya yil, nihc te nacionetic yu'un.
Te namey witsiltic ya xhemts'uj cohel,
te namey tsehletic ya xch'ayic cohel;
pero stalel ay te behetic yu'une.
7Quiloj te ay swocolic te nahilpaq'uetic yu'un Cusán,
te nahilpaq'uetic yu'un te sq'uinal Madián ya xnihquic.
8¿Ilinemat bal, Jehová, ta stojol te muc'ul-ha'etic?
¿Acontrahinej bal te muc'ul-ha'etic ta awilimba?
¿Tihlem bal sc'ahc'al awo'tan ta stojol te mar
c'alal mohat ta cawuhetic awu'un,
ta carretahetic awu'un te ya xtsalwanic?
9La achahpan te t'ihmalte' awu'un,
la anojes te yawil ta ya'tejibalul at'ihmalte'e.
Ta scuenta te muc'ul-ha'etic
la ajaticlan te q'uinale.
10La yilat te witsetic, nihquic yu'un;
c'ax bahel te snojel ha'etic;
c'opoj te xahab
soc la stoy sc'ab ta toyol.
11Tehc'aj te c'ahc'al soc te u ta banti ayic,
yu'un te sjahts' te ya'tejibalul t'ihmalte' te t'im bahel,
yu'un te sts'anabul te lanza te xlipet sjahts'.
12Soc awilimba la abehentay te q'uinal,
soc sc'ahc'al awo'tan
la ats'o' ta teq'uel te nacionetique.
13Loc'at tal ta scoltayel te pueblo awu'un,
ta scoltayel te mach'a tsahbil awu'une.
La ajimbe te jolal yu'un te sna te mach'a chopol,
la achicnajtesbe te yich'o-ip c'alal ta ton.
14Ha nix ta slanzahic la alowbe
te jtsobawetic yu'un te soldadohetic yu'unic,
te talic hich te bin ut'il yic'al-ha'al
yu'un ya spucotcotic bahel,
te tse'el yo'tanic hich te bin ut'il
muquen ya slajin te pobrehe.
15Behenat ta mar soc te cawuhetic awu'un,
ta ha'etic te yaquic ta buhl.
16La jca'iy, la syuc' sba jch'uht yu'un;
nihc que yu'un te sc'ope.
Och sc'a'el ta jbaquel,
jcohtol nihcon yu'un.
Lamal co'tan ya jmahliy te sc'ahc'alel wocol
te ya xc'oht ta stojol te pueblo te ya ya'botic guerra.
17Aunque ma xnichin te higuera,
soc mayuc sit te ts'usubiletic,
aunque ma xyac' sit te olivo,
soc mayuc bin ya yac' te chahpambil q'uinal,
aunque mayuquix tuminchijetic ta stsobojibal yu'unic,
soc mayuc wacaxetic ta corral,
18tse'el co'tan ta stojol Jehová,
yutsil co'tan ta stojol te Dios yu'un te jcolele.
19Ha quip te Jehová te Ajwalil;
ya yac' te hich ya xc'oht te coc te bin ut'il yoc chij,
soc ya yac' te ya xbehenon ta toyol q'uinal.
Yu'un te jtsobaw yu'un te c'ayojetique. Ya xtuhun ta a'tejibaletic yu'un c'ayoj te ya yich' tijel ta c'abal.
Currently Selected:
Habacuc 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.