Zacarías 1
1
Tsitsel te yacuc suhtic tal ta stojol Jehová
1Ta swaxaquebal u ta schebal ha'bil yochel ta ajwalil a te Darío, tal te sc'op Jehová ta stojol Zacarías snich'an Berequías, snich'an Ido, hich la yal:
2Bayel ilinem Jehová ta stojol ame'atatic. 3Ha yu'un hich me xawalbe: Hich yaloj Jehová te scuentahinej spisil:
Suhtanic tal ta jtojol,
xchi te Jehová te scuentahinej spisil,
ha nix hichon ya suhton ta atojolic,
xchi te Jehová te scuentahinej spisil.
4Ma me hichuquex te bin ut'il ame'atatic te hich halbotic yu'un te nahil jalwanejetic: Hich yaloj te Jehová te scuentahinej spisil: Ihquitayahic hilel te chopol behetic awu'unic soc te chopol awa'telic, te xchihique, pero ma ba la ya'iyic soc ma ba la yich'onic ta cuenta, xchi te Jehová.
5Pero yo'tic, ¿banti ayic te ame'atatique?
soc te jalwanejetic ¿ya bal xcuxajic spisil ora?
6Pero te c'opetic soc te mandariletic cu'un
te la jcalbe ta mandar te jalwanejetic te a'batetic cu'un,
¿ma bal la stahic te ame'atatique?
Ha yu'un la suhtes yo'tanic te ame'atatic, hich la yalic: Te Jehová te scuentahinej spisil hich la spasbotic te bin ut'il la sc'an te behetic soc te a'teliletic cu'untique, xchihic.
Nahalsitil sc'oblal te cawuhetic
7Ta chaneb scha'winic (24) c'ahc'al ta sbuluchebal (11) u, ha te u Sebat, ta schebal ha'bil yochel ta ajwalil a te Darío, tal te sc'op Jehová ini ta stojol te jalwanej Zacarías snich'an Berequías, snich'an Iddo: 8La jquil nahalsitil ta ahc'abal: la jquil jtuhl winic cajal ta tsajal cawu, ay ta yohlil bic'tal te'etic ta jun sjuclej, ta spat ay cawuhetic te tsaj, ihc' ta tsaj, soc sac. 9Hich la joc'oy: Tatil, ¿bintic a ini? xchihon.
Hich la yalbon te ch'ul a'bat yacon ta c'op soc: Ya ca'bat ana' mach'atic a ini, xchi.
10Te winic te ay ta yohlil te bic'tal te'etic, hich la yal: Ha'ic ini te ticombilic yu'un Jehová te ya sbehentayic spahmal te q'uinale, xchi.
11Te mach'atic cajajtic ta cawu hich la yalbeyic te ch'ul a'bat yu'un Jehová te ay ta yohlil te bic'tal te'etic: La jbehentaycotiquix te q'uinal, la jquilcotic te lec ay soc lamal q'uinal ta spisil te q'uinale, xchihic.
12Te ch'ul a'bat yu'un Jehová hich la yal: Jehová te scuentahinej spisil, ¿jayeb xan ora te ma ba yac ac'uxultay te Jerusalén soc te pueblohetic yu'un Judá, te ayix lajuneb schanwinic (70) ha'bil te ilinemat ta stojolique? xchi.
13Te Jehová lec la sjac' soc scuenta smuc'ubtesojibal q'uinal la sc'opon te ch'ul a'bat te yac sc'opombelon. 14Ha yu'un te ch'ul a'bat te yac sc'opombelon, hich la yalbon: Puca ta halel: Hich yaloj Jehová te scuentahinej spisil:
Bayel xut'et co'tan
ta stojol Jerusalén soc Sión.
15Pero bayel ilinemon
ta stojol te nacionetic te jun yo'tan ayique;
como te c'alal jteb nax ilinon,
muc' c'oht yu'unic te bin chopole.
16Ha yu'un hich yaloj te Jehová:
Soc sc'uxul co'tan ya suhton ta stojol te Jerusalén;
tey ya yich' pasel a te Jna,
xchi te Jehová te scuentahinej spisil,
soc ya yich' t'imel te sp'isojibal
ta stojol Jerusalén, xchi.
17Soc puca ta halel ini:
Hich yaloj te Jehová te scuentahinej spisil:
Te pueblohetic cu'un ya xnoj yan buelta
ta bayel biluquetic,
soc te Jehová ya smuc'ubtesbe q'uinal ya'iy te Sión
soc ya scha'tsa xan te Jerusalén, xchi.
Nahalsitil sc'oblal xulubiletic soc jten-taq'uinetic
18Patil la jquil mohel, la jquil chaneb xulubiletic. 19La joc'obe te ch'ul a'bat yac sc'opombelon: ¿Bintic a ini? xchihon.
Hich la sjac'bon: Ha te xulubiletic te la spucticlan bahel ta bayuc te Judá, Israel soc Jerusalén, xchi.
20Patil te Jehová la ya'bon quil chantuhl jten-taq'uinetic.
21La joc'obe: ¿Bin tal spasic ini? xchihon.
Hich la sjac'bon: Ha te xulubiletic te la spucticlanic ta bayuc te Judá scuenta yu'un mayuc mach'a hu' la shach sjol. Pero te chantuhlic ini talemic yu'un ya yaq'uic te ya xnihc te nacionetic, soc yu'un ya sjinic cohel te xulubiletic yu'un te nacionetic te la scujticlanic a te sq'uinal Judá yu'un ya spucticlan ta bayuc, xchi.
Currently Selected:
Zacarías 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.