Sofonías 3
3
Smul Jerusalén soc te colel yu'une
1¡Obol sba te toyba pueblo,
te bohloben sc'oblal soc te ha j'uts'inwanej!
2Ma ba la ya'iy c'op
soc ma ba la yich' tojobtesel;
ma ba la smuc'ulin yo'tan te Jehová,
ma ba nohpoj ta stojol te Dios yu'une.
3Te príncipaletic te ayic ta yohlil
ha xhihet chojetic;
te jchahpanwanejetic yu'unic
ha ha'mal ts'i'etic te ya xbehenic ta ahc'abal
te ma ba ya yihquitayic hilel
jch'ixuc bac yu'un sacubel q'uinal.
4Te jalwanejetic yu'un xyal xmo yo'tanic,
ha winiquetic te ya x'ac'awanic ta c'abal;
te sacerdotehetic yu'un la sbohlobtesic te ch'ul awilal,
soc la sjimbe sc'oblal te Ley.
5Ha toj stuquel te Jehová te ay ta yohlil,
mayuc bin chopol ya spas;
ta jujun sab ya yac' chicnajuc te stojil ya'tel,
ma ba ya spas falta;
yan te mach'a chopol,
ma sna'be sba te q'uexlale.
6La jcac' jihnuc nacionetic,
jimbilic te toyol bahlal ts'ahquetic yu'unique;
jochol hil cu'un te callehetic yu'unic,
mayuquix mach'atic ya xc'axic tey a,
jimbiliquix te pueblohetic yu'unic,
mayuquix jtuhluc te ya xnahin tey a.
7Hich la jcal: Ya me xi'on,
ya me yich' tojobtesel, xchihon,
hich ma ba ya yich' jinel te banti nahinem
te bin ora ya xtalon ta stojol.
Pero la suj sbahic ta sjinel
spisil te ya'telique.
8Ha yu'un mahliyawonic, xchi te Jehová,
te bin c'ahc'alil ya xhahch jchahpanex,
como jnopoj te ya jtsob te nacionetic,
te ya jtsobticlan ban c'alal cuentahimbilic
yu'un ya jmal cohel ta stojolic te quilimba,
spisil te sc'ahc'al te quilimbahe;
te sc'ahc'al te xut'et co'tan
ya slajin spisil te q'uinale.
9Ta hich ora ya cac' te ya xlecub
te sc'op te pueblohetic,
scuenta yu'un spisilic ya sc'opombeyic te sbihil te Jehová,
yu'un pajal ya yac' sbahic ta a'batinel ta stojol.
10Ta q'uinal ta jehch muc'ul-ha'etic yu'un Etiopía,
te mach'atic ya yalbonic wocol,
te mach'atic cu'un te puhquemic bahel,
ya me yich'bonic tal te mahtaniletic cu'une.
11Ta hich ora ma ba ya xq'uexawatix
yu'un jchahpuc te a'teliletic
te la atoy aba ta jtojol yu'une,
como ya jloq'ues ta awohlil
te mach'atic tse'el yo'tanic yu'un te stoybahilic,
mayuquix bin ora yac atoy aba
ta ch'ul wits cu'un.
12Ya quihquitaybat hilel ta awohlil
jun pueblo te peq'uel yo'tan soc pobre,
te ya smuc'ulin yo'tan te sbihil Jehová.
13Te mach'atic cuxul hilic yu'un Israel
ma ba ya spasic te bin ma stojiluc ta pasel
soc ma ba ya ya'iyic lot,
ma ba ya xloc' ta yehic lo'loywanej,
como ya xwe'ic soc ya scux yo'tanic,
mayuc mach'a ya x'a'bot xiwel yu'un.
14¡C'ayojinan, yantsil-nich'anat Sión!
¡awonan yu'un yutsil q'uinal, Israel!
¡Tse'eluc awo'tan,
spisil awo'tan ayuc yutsil q'uinal yac awa'iy,
yantsil-nich'anat Jerusalén!
15Te Jehová la sloq'ues te castigo awu'un,
la sten loq'uel te acontratac.
Te Jehová, te Ajwalil yu'un Israel, ay ta awohlil;
ma ba yac axi'ix te bin wocol.
16Ta hich ora hich ya xhalbot te Jerusalén:
¡Ma xiwat, Sión,
ma me xlaj yip ac'ab! xchi.
17Te Jehová te Dios awu'un, ay ta awohlil;
¡ay yu'el, ya scoltayat!
Bayel yutsil yo'tan ta atojol;
ta scuenta sc'uxul yo'tan ya yach'ubtesbat acuxlejal,#3.17 Hich ya yal ta griego (LXX), ta hebreo ya yal: ta scuenta sc'uxul yo'tan mayuc bin ya yal,
soc stse'elil yo'tan ya xc'ayojin ta atojol.
18Hich te bin ut'il ta sc'ahc'alel q'uin
ya jloq'uesbat ta atojol te mel-o'tan;
ya cac'at ta libre yu'un te uts'inel
te al ta cuchel yac awa'iy.
19Ta hich ora ya ca'be stoj
spisil te mach'atic ya stenat ta uts'inel;
ya jcoltay te coxo' tuminchij,
soc ya quic' tal te howiyemic.
Ya jc'atp'un ta halbeyel yutsil sc'oblal te q'uexlal yu'unic,
soc ya xpuhc sc'oblalic ta spisil q'uinal.
20Ta hich ora ya quiq'uex talel,
ya jtsobex tal ta hich ora;
ya cac' te ya xpuhc ac'oblalic soc ya x'ich'otex ta muc'
ta stojol spisil te pueblohetic ta bahlumilal,
te c'alal ya jcha'a'beyex ac'ulejalic#3.20 O: te c'alal ya cac' suhtuquex tal te ayex ta chuquel
ta atojol te yac awilique, xchi te Jehová.
Currently Selected:
Sofonías 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.