Números 4
4
Ya'tel levitahetic
1Te Jehová la yalbe te Moisés soc Aarón: 2Ahtayahic te snich'nab Coat, te ha snich'nab Leví, ta scuenta jujuchahp na soc ta scuenta sna sme'static, 3te stahojic lajuneb scha'winic (30) ya'bilal c'alal ta lajuneb yoxwinic (50) ya'bilal, spisil mach'atic te ya xhu' ya x'ochic ta a'tel ta Nahilpac' Templo yu'un tahojibal.
4Hich ay te ya'tel te snich'nab Coat ta Nahilpac' Templo yu'un tahojibal, ha ay ta scuentahic te bintic mero ch'uhltesbilic: 5Te c'alal ya xhahchic ta behel te pueblo, te Aarón soc snich'nab ya xtal scolticlan te tsalul pac', ya smuquic a te scaxahul te chapbil-c'op; 6ta sba ya smuquic ta nuhculetic,#4.6 Ma jna'tic bin chambahlamil ya yal ta hebreo. Ay ya yalic tejón, ay ya yalic marsopa, ha muc'ul chay ta mar te t'ujbil te snuhculele. ta sba xan ya slimbeyic yaxal pac'; soc ya yotseslambeyic te sq'uechojibale.
7Ya smuquic ta yaxal pac' te mesa yu'un te pan ac'bil ta stojol Dios, ta sba ya spahchan te platohetic, cucharahetic, tazahetic, soc te yawilic te mahtanil ya yich' malel; soc tey ya xhil a ta pan ta spisil ora. 8Ta sba ya slimbeyic ta tsajal pac', soc ya smuquic xan bahel ta nuhculetic, patil ya yotseslambeyic te sq'uechojibale. 9Ya yich'ic tal jlihc yaxal pac', ya smuquic bahel a te scajtajib c'ahc', stut yawil c'ahq'uetic, tenazahetic, tut platohetic, soc spisil te yawil aceite te ya xtuhun yu'une. 10Ya spotsticlanic ta nuhculetic soc spisil te bintic ya xtuhun tey a, soc ya yotseslambeyic te sq'uechojibale.
11Ya slimbeyic yaxal pac' ta sba te scajtajib pasbil ta oro; ya spotsic bahel ta nuhculetic, soc ya yotseslambeyic te sq'uechojibale. 12Ya stsobic spisil te biluquetic ya xtuhunic ta ch'ul awilal, ya yaq'uic ta yaxal pac', ya spotsic bahel ta nuhculetic, soc ya yaq'uic ta sq'uechojibal. 13Ya sloq'uesic te stanul te scajtajib ta chiq'uel mahtanil, ya smuquic ta chi'in-yaxal pac'. 14Ya yaq'uic ta sba spisil te bintic ya xtuhun tey a: ha te yawil ac'al, trinchehetic, palahetic, muc'ul tazahetic, spisil bintic ay yu'un te scajtajib ta chiq'uel mahtanil; ya smuquic ta nuhculetic soc ya yotseslambeyic te sq'uechojibale.
15Te c'alal ya xlaj yo'tan te Aarón soc snich'nab ta spotsel te ch'ul awilal soc spisil te biluquetic yu'une, te c'alal chapalix a te ya xhahch bahel te campamento, ya xtalic te snich'nab Coat ta sq'uechel bahel, pero ma me spiquic te bintic ch'ultesbil, scuenta yu'un ma xchamic a. Ha'ic te biluquetic yu'un te Nahilpac' Templo yu'un tahojibal te ya sq'uechic bahel te snich'nab Coat. 16Pero ay ta scuenta Eleazar snich'an te sacerdote Aarón te aceite yu'un c'ahc' te ya sacubtes q'uinal, te pom te sumet yic', te mahtaniletic harina te ya yich'ic aq'uel spisil ora, soc te aceite yu'un ch'ultesel. Ay ta scuenta spisil te Nahilpac' Templo soc spisil bintic ay tey a, te ch'ul awilal soc te biluquetic yu'une, xchi.
17Te Jehová hich la yalbe te Moisés soc Aarón: 18Ma xawac' te ya xch'ay sts'umbal Coat ta yohlil te levitahetique. 19Hich me yac apasbeyic scuenta yu'un ma ba ya xchamic te c'alal ya xnohpoj ta stojol te bintic ch'ultesbil: Te Aarón soc te snich'nab ya me ya'beyic yich' ya'telic jujutuhl soc te bintic ya yich'ic bahele. 20Ma me x'och yilic te bintic ch'uhltesbilic, scuenta yu'un ma ba ya xchamic, xchi.
21Te Jehová la yalbe te Moisés: 22Ha nix hich ahtaya te snich'nab Gersón ta jujuchahp te mach'atic ay yu'un te sme'statique. 23Ya me awahtay te mach'atic stahojic lajuneb scha'winic (30) ya'bilal c'alal lajuneb yoxwinic (50) ya'bilal, spisil te mach'atic ya xhu' ya spasic te a'tel ta Nahilpac' Templo yu'un tahojibal.
24Hich ay te ya'telic te sts'umbal Gersón te ya spasic soc te ya yich'ic bahele: 25Ya yich'ic bahel te paq'uetic yu'un te Nahilpac' Templo, te smahquil te Nahilpac' Templo yu'un tahojibal, te nuhculetic ay ta sba, te smahquil pac' ta yochibal te Nahilpac' Templo yu'un tahojibal, 26te paq'uetic yu'un te amac', te smahquil pac' ta yochibal te amac' ay ta sjoyobal te Nahilpac' Templo soc te scajtajib ta chiq'uel mahtanil, te schuhquil soc spisil te biluquetic te ya xtuhun yu'un ya'telic; ya me spasic spisil te bin ay ta pasel tey a. 27Ta scuenta smandar te Aarón soc te snich'nab ya spasic spisil ya'telic te snich'nab Gersón, spisil te bintic ya sq'uechic bahel soc te bintic ay ta scuentahic spasel. Ay ta acuentahic yalbeyel te bintic ya spasique. 28Ha te ya'telic te jujuchahp sts'umbal Gersón te ya spasic ta Nahilpac' Templo yu'un tahojibal. Te ya'telic ay ta scuenta yilel te Itamar te snich'an sacerdote Aarón.
29Ahtaya te snich'nab Merari ta jujuchahp mach'atic ay yu'un te sme'statique. 30Ya me awahtay mach'atic stahojic lajuneb scha'winic (30) ya'bilal c'alal lajuneb yoxwinic (50) ya'bilal, spisil mach'atic te ya xhu' ya spasic te a'tel ta Nahilpac' Templo yu'un tahojibal. 31Te bin ay ta scuentahic spasel ta Nahilpac' Templo yu'un tahojibal, ha te ya sq'uechic bahel te tablahetic yu'un te Nahilpac' Templo, te sc'atal-te'eletic, oyetic soc scajtajibic, 32te oyetic yu'un te amac' ta sjoyobal soc scajtajibic, te ts'apbil yich'o-ip, schuquilic soc spisil sbiluc soc spisil bintic ya xtuhun tey a. Ya me awa'be sna' jujutuhl bintic a te ya yich'ic bahele. 33Ha te ya'telic te jujuchahp sts'umbal Merari, spisil te bintic ya spasic ta Nahilpac' Templo yu'un tahojibal, te ay ta scuenta yilel te Itamar te snich'an sacerdote Aarón, xchi.
34Hich te Moisés, Aarón soc te jtsobawetic yu'un te pueblo, la yahtayic te snich'nab Coat ta jujuchahp te mach'atic ay yu'un te sme'static, 35te stahojix lajuneb scha'winic (30) ya'bilal c'alal lajuneb yoxwinic (50) ya'bilal, spisil mach'atic te ya xhu' ya spasic te a'tel ta Nahilpac' Templo yu'un tahojibal. 36Ha lajuneb swaxacwinic shucbahc' (2,750) ta tuhl te la yich'ic ahtayel. 37Ha'ic te la yich'ic ahtayel te sts'umbal Coat, spisilic te ya spasic a'tel ta Nahilpac' Templo yu'un tahojibal te la yahtayic te Moisés soc Aarón, hich te bin ut'il pasotic ta mandar yu'un Jehová ta scuenta Moisés.
38La yich'ic ahtayel te snich'nab Gersón ta jujuchahp soc te mach'atic ay yu'un te sme'static, 39te stahojic lajuneb scha'winic (30) ya'bilal c'alal lajuneb yoxwinic (50) ya'bilal, spisil mach'atic te ya xhu' ya spasic te a'tel ta Nahilpac' Templo yu'un tahojibal. 40Ha lajuneb slahchaywinic shucbahc' (2,630) ta tuhl te la yich'ic ahtayel. 41Ha'ic te la yich'ic ahtayel te sts'umbal Gersón, spisilic te ya x'a'tejic ta Nahilpac' Templo yu'un tahojibal te la yahtayic te Moisés soc Aarón, hich te bin ut'il pasotic ta mandar yu'un Jehová.
42La yich'ic ahtayel te snich'nab Merari ta jujuchahp soc te mach'atic yu'un te sme'static 43te stahojic lajuneb scha'winic (30) ya'bilal c'alal lajuneb yoxwinic (50) ya'bilal, spisil mach'atic te ya xhu' ya spasic te a'tel ta Nahilpac' Templo yu'un tahojibal. 44Ha waxacbahc' (3,200) ta tuhl te la yich'ic ahtayel. 45Ha'ic te la yich'ic ahtayel te sts'umbal Merari te la yahtayic te Moisés soc Aarón, hich te bin ut'il pasotic ta mandar yu'un Jehová ta scuenta Moisés.
46Ta spisil te levitahetic te la yich'ic ahtayel yu'un Moisés, Aarón soc te jtsobawetic yu'un Israel, ta jujuchahp soc te mach'atic ay yu'un te sme'static 47te stahojic lajuneb scha'winic (30) ya'bilal c'alal lajuneb yoxwinic (50) ya'bilal, spisil te mach'atic ya xhu' ya spasic te a'tel ta Nahilpac' Templo yu'un tahojibal soc ya sq'uechic bahele, 48ha jpic soc balunwinic scha'bahc' (8,580) ta tuhl te ahtaybilique. 49La yich'ic ahtayel hich te bin ut'il la yal ta mandar te Jehová ta scuenta Moisés, jujutuhl ta scuenta te ya'tel yich'ojic soc te bin ya yich'ic bahele. La yich'ic ahtayel hich te bin ut'il pasot ta mandar.
Biblia Tzeltal Bachajon © Sociedad Bíblica de México, A.C., 2006.