Números 26
26
La yich' ahtayel Israel ta Moab
1Te c'alal c'axix a te jmilawal-chamel, te Jehová hich la yalbe te Moisés soc Eleazar te snich'an sacerdote Aarón: 2Ahtayahic spisil te pueblo Israel te ayix jtahb ya'bilal, ta jujuchahp sna te sme'static, spisilic ta Israel te ya xhu' yu'unic ya xbahtic ta guerra, xchi.
3Hich te Moisés soc te sacerdote Eleazar la sc'oponic te snich'nab Israel ta spamlejtic ta Moab, nopol ta muc'ul-ha' Jordán, te snuhp'usitayej sba soc Jericó, hich la yalbeyic: 4Ahtayahic te mach'atic ayix jtahb ya'bilal, hich te bin ut'il halbot yu'un Jehová te Moisés, xchihic.
Ha'ic ini te snich'nab Israel te loq'uic tal ta sq'uinal Egipto:
5Te snich'nab Rubén, te sba-nich'an Israel: ta scuenta Enoc, ha te enoquetic; ta scuenta Falú, ha te faluhetic; 6ta scuenta Hezrón, ha te hezronetic; ta scuenta Carmi, ha te carmihetic. 7Ha ini te jujutsohb snich'nab Rubén; ay ho'pic soc lajuneb shucwinic slajunbahc' (43,730) ta tuhl.
8Te snich'an Falú, ha te Eliab. 9Te snich'nab Eliab, ha te Nemuel, Datán soc Abiram. Ha nix te Datán soc Abiram, te jtsobawetic yu'un te pueblo te la stoy sbahic soc te smohloltac Coré ta stojol Moisés soc Aarón c'alal la stoy sbahic ta stojol Jehová. 10La sjam sba te lum, la sbic'ticlan cohel ta spisilic soc Coré, te c'alal lajic ta c'ahc' lajuneb yoxlajunwinic (250) ta tuhl winiquetic, scuenta yu'un hich ya yilic a te yantique. 11Pero te snich'nab Coré ma ba lajic stuquel.
12Te jujutsohb snich'nab Simeón: ta scuenta Nemuel, ha te nemueletic; ta scuenta Jamín, ha te jaminetic; ta scuenta Jaquín, ha te jaquinetic; 13ta scuenta Zera, ha te zerahetic; ta scuenta Saúl, ha te sauletic. 14Ha ini te jujutsohb snich'nab Simeón, ay cha'pic soc lajunwinic swaclujunbahc' (22,200) ta tuhl.
15Te jujutsohb snich'nab Gad: ta scuenta Zefón, ha te zefonetic; ta scuenta Hagui, ha te haguihetic; ta scuenta Suni, ha te sunihetic; 16ta scuenta Ozni, ha te oznihetic; ta scuenta Eri, ha te erihetic; 17ta scuenta Arod, ha te arodetic; ta scuenta Areli, ha te arelihetic. 18Ha ini te jujutsohb snich'nab Gad, ay ho'pic soc ho'winic scha'bahc' (40,500) ta tuhl.
19Te snich'nab Judá: ha te Er soc Onán, ha te chamic ta sq'uinal Canaán. 20Te jujutsohb snich'nab Judá: ta scuenta Sela, ha te selahetic; ta scuenta Fares, ha te faresetic; ta scuenta Zera, ha te zerahetic. 21Te snich'nab Fares: ta scuenta Hezrón, ha te hezronetic; ta scuenta Hamul, ha te hamuletic. 22Ha ini te jujutsohb snich'nab Judá, ay balunpic soc ho'winic slahchaybahc' (76,500) ta tuhl.
23Te jujutsohb snich'nab Isacar: ta scuenta Tola, ha te tolahetic; ta scuenta Fúa, ha te fuahetic; 24ta scuenta Jasub, ha te jasubetic; ta scuenta Simrón, ha te simronetic. 25Ha ini te jujutsohb snich'nab Isacar, ay waxacpic soc ho'lajunwinic (64,300) ta tuhl.
26Te jujutsohb snich'nab Zabulón: ta scuenta Sered, ha te seredetic; ta scuenta Elón, ha te elonetic; ta scuenta Jahleel, ha te jahleeletic. 27Ha ini te jujutsohb snich'nab Zabulón, ay hucpic soc ho'winic slahchaybahc' (60,500) ta tuhl.
28Te jujutsohb snich'nab José: ha te Manasés soc Efraín. 29Te snich'nab Manasés: ta scuenta Maquir, ha te maquiretic. Te Maquir la snich'antay te Galaad; ta scuenta Galaad, ha te galaadetic. 30Te snich'nab Galaad: ta scuenta Jezer, ha te jezeretic; ta scuenta Helec, ha te helequetic; 31ta scuenta Asriel, ha te asrieletic; ta scuenta Siquem, ha te siquemetic; 32ta scuenta Semida, ha te semidahetic; ta scuenta Hefer, ha te heferetic. 33Te Zelofehad snich'an te Hefer, mayuc queremetic, ha nax ay yantsil-nich'nab, ha te Maala, Noa, Hogla, Milca soc Tirsa. 34Ha ini te jujutsohb snich'nab Manasés, ay wacpic soc ho'lajunwinic slahchaybahc' (52,700) ta tuhl.
35Te jujutsohb snich'nab Efraín: ta scuenta Sutela, ha te sutelahetic; ta scuenta Bequer, ha te bequeretic; ta scuenta Tahán, ha te tahanetic. 36Te snich'nab Sutela: ta scuenta Erán, ha te eranetic. 37Ha ini te jujutsohb snich'nab Efraín, ay chanpic soc ho'winic scha'bahc' (32,500) ta tuhl. Ha ini te jujutsohb snich'nab José.
38Te jujutsohb snich'nab Benjamín: ta scuenta Bela, ha te belahetic; ta scuenta Asbel, ha te asbeletic; ta scuenta Ahiram, ha te ahirametic; 39ta scuenta Sufam, ha te sufametic; ta scuenta Hufam, ha te hufametic. 40Te snich'nab Bela ha te Ard soc Naamán: ta scuenta Ard, ha te ardetic; ta scuenta Naamán, ha te naamanetic. 41Ha ini te jujutsohb snich'nab Benjamín, ay ho'pic soc chanlajunbahc' (45,600) ta tuhl.
42Te jujutsohb snich'nab Dan: ta scuenta Súham, ha te suhametic. Ha ini te jujutsohb snich'nab Dan. 43Te jujutsohb snich'nab Súham, ay waxacpic soc jbahc' (64,400) ta tuhl.
44Te jujutsohb snich'nab Aser: ta scuenta Imna, ha te imnahetic; ta scuenta Isúi, ha te isuihetic; ta scuenta Bería, ha te beriahetic. 45Te snich'nab Bería: ta scuenta Heber, ha te heberetic; ta scuenta Malquiel, ha te malquieletic. 46Te sbihil te yantsil-nich'an te Aser, ha Sera sbihil. 47Ha ini te jujutsohb snich'nab Aser, ay wacpic soc lajunwinic schanlajunbahc' (53,400) ta tuhl.
48Te jujutsohb snich'nab Neftalí: ta scuenta Jahzeel, ha te jahzeeletic; ta scuenta Guni, ha te gunihetic; 49ta scuenta Jezer, ha te jezeretic; ta scuenta Silem, ha te silemetic. 50Ha ini te jujutsohb snich'nab Neftalí, ay ho'pic soc j'ohlil chanlajunbahc' (45,400) ta tuhl.
51Ha ini te snich'nab Israel te la yich'ic ahtayel, ay ho'lajuneb schanwinic ta pic soc ho'winic yo'bahc' (601,700) ta tuhl ta spisil.
Mandar yu'un spuquel q'uinal
52Te Jehová la yalbe te Moisés: 53Ha'ic te ya yich'ic pucbeyel te q'uinal, chican jaytuhlic te ahtaybilique. 54Ta banti bayelic, a'beya muc' q'uinal, yan te banti mayuc bayelic, ma ba muc' ya yich'ic. Ta jujuchahp ya yich' sq'uinalic hich nix te bin ut'il te ahtaybilique. 55Ya yich' puhquel te q'uinal ta scuenta spasel seña ta na'el. Jujutuhl ya yich' sq'uinalic ta scuenta sbihil te jchahp sna te sme'state. 56Ta scuenta seña ta na'el ya yich' puhquel te q'uinal, teme bayelic o teme mayuc bayelic, xchi.
Ahtayel yu'un jchahp Leví
57Hich ay te snich'nab Leví te la yich'ic ahtayel ta jujuchahp snahic: ta scuenta Gersón, chicnaj te gersonetic; ta scuenta Coat, te coatetic; ta scuenta Merari, te merarihetic. 58Ha ini te jujuchahp snich'nab te Leví: ha te libnahetic, hebronetic, mahletic, musetic, soc corehetic. Te Coat ha stat te Amram. 59Te yihnam Amram ha te Jocabed, yantsil-nich'an Leví te ayin c'alal ay ta Egipto a te Leví. Te Jocabed la yalatay te Aarón, Moisés soc María te swixe. 60Te snich'nab Aarón ha te Nadab, Abiú, Eleazar soc Itamar. 61Pero te Nadab soc Abiú lajic te c'alal la yaq'uic yan c'ahc' ta stojol Jehová.
62Ta spisil te queremetic yu'un Leví te jun to nax u yayinel, ay cha'pic soc j'ohlil swaxaclajunbahc' (23,000) ta tuhl; como ma ba la yich'ic ahtayel soc te yan snich'nab Israel, yu'un ma ba pajal ya yich'ic q'uinal soc.
Cuxul hil Caleb soc Josué
63Ha'ic ini te la yich'ic ahtayel yu'un Moisés soc te sacerdote Eleazar, te c'alal la yahtayic te snich'nab Israel ta spamlej Moab, nopol ta muc'ul-ha' Jordán, te snuhp'usitayej sba soc Jericó. 64Ta spisilic ini mayuc jtuhluc te ma ba la yich'ic ahtayel yu'un Moisés soc te sacerdote Aarón te c'alal la yahtayic te snich'nab Israel ta jochol taquin q'uinal Sinaí, 65como te Jehová hich la yalbe sc'oblal: Ya me xchamic hilel ta jochol taquin q'uinal, xchi. Mayuc jtuhluc hil yu'unic, ha nax te Caleb snich'an Jefone, soc te Josué snich'an Nun.
Biblia Tzeltal Bachajon © Sociedad Bíblica de México, A.C., 2006.