Nehemías 4
4
Tsahtayel sbahic ta stojol scontratac
1C'alal la ya'iy te Sanbalat te ayotcotic ta scha'pasel xan te ts'ahc, ilin soc mero c'ahc'ub yu'un, soc hahch slaban te judiohetique. 2Hich la yal ta stojol te smohloltac soc te soldadohetic yu'un Samaria: ¿Bin yac spasbelic te judiohetic te mayuc yipique? ¿Ya bal x'a'botic permiso te ya scha'aq'uic xan milbil mahtaniletic? ¿Ya bal xhu' yu'unic spasel ta junax c'ahc'al? ¿Ya bal yach'ubtesic te tonetic te busul stanul ta c'ahq'uel? xchi.
3Tey ay ta sts'ehl a te Tobías te talem ta Amón, hich la yal: Te ts'ahc yac spasbelic ta ton, te yacuc xmo jcohtuc wax tey a ya xhemts'uj cohel yu'un te hichuque, xchi.
4Dios cu'untic, a'iya awa'iy bin ya yalic ta jlabanwanej ta jtojolcotic. Sutbeya ta sjolic te slabanwanejic soc ac'a ochuquic ta pojel ta q'uinal banti ya xbahtic ta chuquel. 5Ma me xamucbe sbohlilic soc ma me xatup'be smulic ta atojol, como la slabanic te mach'atic yaquic ta scha'pasel, xchihon ta sc'oponel Dios.
6La jcha'pastic te ts'ahc, hu' ta pasel c'alal ta ohlil, como te pueblo spisil yo'tan a'tejic. 7Pero te c'alal la ya'iyic te Sanbalat, Tobías, te árabehetic, te amonetic soc te mach'atic ayic ta Asdod te xquechet ta cha'pasel xan te sts'ahcul te Jerusalén, te xquechet ta maquel banti jamajtic, bayel ilinic yu'un. 8Spisilic junax la schap sc'opic ta yuts'inel soc ta ya'beyel guerra te Jerusalén. 9Ha yu'un la jc'opontic te Dios cu'untic, soc ha ta scajic te la jcac'tic jcananetic ta c'ahc'al soc ta ahc'abal. 10Te winiquetic yu'un Judá hich la yalic: Yaquix ta lajel yipic te jcuch-ihcatsiletic; soc bayel te busajtic, ma xhu' ya jcha'pastic xan te ts'ahque, xchihic.
11Soc hich la yalic te jcontratic: Ma to sna'ic soc ma to xyilic a ya cochintaytic soc ya jmiltic, hich ya cac'tic quehchajuc te a'tele, xchihic. 12Pero te c'alal talic te judiohetic te nahinemic ta yohlilic, bayel buelta la yalbotic: Bayuc ya xbahex ya me ya'beyex guerra, xchihic. 13Ha yu'un ta spat te ts'ahc banti peq'uel soc te banti jamajtic la jcac' te ants-winiquetic ta scuenta jujuchahp snahic, chapalic soc espada, lanza soc t'ihmalte' yu'unic. 14C'alal laj co'tan ta yilel, hahchon, soc la jcalbe te mach'atic ich'bilic ta muc', te mach'atic ay ya'telic soc spisil te pueblo: Ma xiwex ta stojolic; na'ahic me te Cajwaltic ha muc' soc ay ta xi'el, ac'ahic guerra ta scuenta awermanotac, te querem ach'ixetic awu'unic, te antsetic awu'unic soc te anahique, xchihon.
15Te c'alal la ya'iyic te jcontratic te la jna'tiquix te bin chapal yu'unic soc te Dios jimbotix yu'un te bintic chapal yu'unique, jpisiltic suhtotic xan bahel ta ts'ahc, jujutuhl ta ya'tel. 16Ta hich ora bahel j'ohlil te a'batetic cu'un la spasic te a'tel, te j'ohlil xan yich'oj slanzahic, smahquilic, st'ihmalte'ic soc smahquil stahnic. Ta spatic tey ayic a te jtsobawetic yu'un spisil te mach'atic yu'un Judá. 17Te mach'atic yacalic ta scha'pasel te ts'ahc, te mach'atic ya scuchic ihcatsil, ta jun sc'ab ya x'a'tejic a, ta yan sc'ab stsacoj ya'tejibic yu'un guerra. 18Spisil te mach'atic a'tejic, jujutuhl schucoj ta sch'uht te espada yu'un, hich a'tejic. Te mach'a ya yoq'uesin te xulubil, ay ta jts'ehl, 19yu'un hich calbeyejix te mach'atic ich'bilic ta muc', te mach'atic ay ya'telic soc spisil te pueblo: Muc' soc naht bahel te a'tele, jpucoj jbahtic ta ts'ahc, namal quiloj jbahtic ta tuhlultuhl. 20Te banti yac awa'iyic te ya x'oc' te xulubil, tey ya jtsob jbahtic a; te Dios cu'untic ya me yac' guerra ta jcuentatic, xchihon.
21Hich la jpastic te a'tel ta sab ha to c'alal ya xchicnaj eq'uetic, j'ohlil stsacojic slanza ta sc'abic. 22Soc hich la jcalbe te pueblo: Jujutuhl soc te ya'bat ya me xhilic ta yutil te Jerusalén; ha jcananetic ya xhilic ta ahc'abal, soc ya x'a'tejic ta c'ahc'alel, xchihon. 23Te ho'on soc te quermanotac, te a'batetic cu'un soc te jcananetic te sjoquinejonic, ma ba la jchol te jc'u' jpac'tic; jujutuhl ha nax la schol sc'u' spaq'uic te c'alal la ya'iyic atimal.#4.23 O: jujutuhl yich'oj ya'tejibic a te bahtic ta atimal.
Currently Selected:
Nehemías 4: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.