Judas 1
1
Spatil-o'tanil
1Judas, a'bat yu'un Jesucristo soc yihts'in te Jacobo, ta stojol te mach'atic ic'bilic, te c'uxultaybilic yu'un te Jtatic Dios soc te canantaybilic yu'un te Jesucristo: 2Ac'a p'ohluc ta atojolic c'uxultaywanej, lamal q'uinal soc c'uxul-o'tanil.
Lotil nohptesel soc lotil maestrohetic
3Ha'ex te c'uxex ta co'tan, aunque tulan sc'oblal ta co'tan te ya jts'ihbabeyex sc'oblal te jcoleltique, hich la jc'an te ya jts'ihbabeyex yu'un ya ca'beyex yip awo'tanic yu'un yacuc xc'opojex yu'un te bintic jch'uhunejtic, te jc'axel a'bibil te mach'atic ch'ultesbilique. 4Como ay winiquetic te muquen ochemic, te chapalix sc'oblalic te ch'ayel ya xbahtique. Ha chopol winiquetic te ya sjelic ta chijil-o'tanil te yutsil yo'tan Dios soc smucoj ta yo'tanic te Dios te stuquel ay ta ch'uhumbeyel smandar, soc te Cajwaltic Jesucristo.
5Ya jc'an ya ca'beyex xan ana'ic, aunque ana'ojic nix a, te Cajwaltic te c'alal la scoltayix loq'uel ta Egipto a te pueblo yu'un, patil la slajin te mach'atic ma ba ch'uhunot yu'une. 6Ha nix hich te ch'ul a'batetic te ma ba la scanantayic te ya'tel yich'ojic, la yihquitayic hilel te yawilic, ha q'uejbilic yu'un Dios ta yihc'al q'uinal, stalel chuculic ha to ta yorahil ich'el ta c'op ta smuc'ul c'ahc'alel. 7Hich te bin ut'il te Sodoma soc Gomorra soc te pueblohetic ta sjoyobal, ha nix hich la ya'iyic chijil-o'tanil soc la spasic te bin ya scontrahin te stalel te baq'uete. Yich'oq'uehlic c'oht te bin ut'il c'ax swocolic yu'un castigo ta c'ahc' sbahtel q'uinal.
8Ha nix hich ya sbohlobtes sbaq'uetalic te jwaychijeletic ini, ya sp'ajic te mach'atic ay ya'telic, soc ya sbohlc'optayic mach'atic ay yu'elic. 9Pero te Miguel, te jtsobaw yu'un te ch'ul a'batetic, te c'alal la stij sba ta c'op soc te pucuj yu'un te sbaq'uetal te Moisés, la xi' te la yalbe chopol sc'oblal, hich la yal: Ha me ac'a yutat ta c'op te Cajwal, xchi. 10Pero te winiquetic ini ya yixta'c'optayic te bintic ma sna'beyic scuentahil; soc te bintic stalel ay ta na'el yu'unic, ya sbohlobtes sbahic a, hich te bin ut'il chambahlametic te ma sna'ic q'uinal.
11¡Ay me swocolic! como st'unojic te be yu'un Caín, howiyemic hich te bin ut'il Balaam ta slehel taq'uin te ma stojiluc; pajal lajic soc te toybahil yu'un Coré. 12Ha awabaquilic ta q'uin yu'un c'uxul-o'tanil awu'unic, mayuc sq'uexlalic a ya sjoquinex ta we'el, ha nax ya scanantay sbahic stuquel. Ha tocaletic te mayuc ya'lel, bayuc ya xtenotic yu'un te iq'ue; ha te'etic ta yorahil shahchel scomil c'ahc'al te mayuc sit soc bulbilic, cheb buelta lajemic. 13Ha tulan stselajan mar te capal soc sbuhl ya scuch tal te sq'uexlalic; ha howiyem eq'uetic te chapal sc'oblalic te ha yawilic sbahtel q'uinal ya xc'oht te mero yihc'al q'uinale.
14Te Enoc, te shuc-cajal patil al-nich'an yu'un te Adán, hich nix la yalbe sc'oblalic ta sc'op-jalwanej: Ilawil, talix te Cajwaltic soc tsobol ta mil ta mil te mach'atic yu'un te ch'uhltesbilic, 15yu'un ya yich' ta c'op spisilic, yu'un ya yalbe smul spisil mach'atic chopol yo'tanic yu'un spisil bintic c'ax chopol la spasic, soc yu'un spisil te bintic ma lecuc la yalbeyic sc'oblal Dios te chopol jmulawiletique, xchi.
16Ha'ic jmuquen jlabanwanejetic, jle-muliletic, ya st'unic spasel te bintic ya smulanic stuquel, ya stoy sbahic ta scuenta sc'opic soc ya x'ajwalc'opojic ta stojol yantic yu'un ay bin ya stahic a.
Tsitsel soc tojobtesel
17Yan te ha'ex te c'uxex ta co'tan, na'ahic me te bintic la yalic ta nahil to te jpuc-c'opetic yu'un te Cajwaltic Jesucristo, 18te hich la yalbeyex: Ta slajibal c'ahc'al ya me xtal jlabanwanejetic te ya spasic te bintic chopol ya smulanic spasel, xchihic. 19Ha'ic te ya yaq'uic jatamba, ya spasic te bintic ya smulan sbaq'uetalic soc mayuc ta yo'tanic te Espíritu.
20Yan te ha'ex te c'uxex ta co'tan, ac'a yipin awo'tanic te sch'uhunel awo'tanic te mero ch'ultesbil; c'oponahic Dios ta scuenta te Ch'ul Espíritu, 21junuc me awo'tanic x'ayinex ta stojol te sc'uxul yo'tan Dios te c'alal yaquex ta smahliyel te Cajwaltic Jesucristo te ha ta scuenta te sc'uxul yo'tan ya ya'beyex acuxlejalic sbahtel q'uinal.
22Na'beyahic yo'bolil sbahic#22 O: A'beya sna'ic te mach'atic ay xchebet yo'tanic. 23Coltayahic yantic, tsacahic loq'uel ta c'ahc'; soc c'uxultayahic yantic soc xiwel, pero ihlaybeyahic te sc'u' spaq'uic te bohloben sc'oblalic ta scuenta slehel smulic soc sbaq'uetalic.
Slajibal sc'ayojtayel Dios
24Te Dios te ya xhu' ya scanantayex yu'un ma ba xyahlex soc te ya xhu' yu'un te mayuc awabaquil a ya stehc'anex ta stojol te yutsilal soc bayel yutsil-o'tanil, 25te hip jtuhl Dios, te Jcoltaywanej cu'untic, ayuc me yutsilal, muc' yutsil ya'tel, cuentahinwanej soc yu'el, yo'tic soc ta sbahtel q'uinal. Hichuc.
Currently Selected:
Judas 1: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.