Josué 2
2
Josué ya sticon ta tsahtayel Jericó
1Te Josué snich'an Nun muquen la sticon hahchel ta Sitim cheb jtsahtaywanejetic, hich la yalbe: Bahan ilawilic te q'uinal soc te Jericó, xchi. Hich bahtic, ochic ta sna jtuhl j'antsinel-ants Rahab sbihil, tey c'ax ahc'abal yu'unic a.
2Hich halbot ya'iy te ajwalil yu'un Jericó: Ay winiquetic yu'un te snich'nab Israel te talemic ha ahc'abal ini ta stsahtayel te q'uinale, xchi. 3Ha yu'un te ajwalil yu'un Jericó hich la sticon bahel ta halbeyel te Rahab: Loq'uesa tal te winiquetic te tal yilat, te ochic ta ana, yu'un ha talemic ta stsahtayel spisil te q'uinale, xchi.
4Pero te ants nac'bilix yu'un a te cheb winiquetic, hich la yal: Melel ay winiquetic te hulic tal ta jna, pero ma ba la jna' banti talemic. 5Ta yihc'ubel q'uinal, te c'alal ya xmahquix a te yochibal te ts'ahc, loq'uic bahel te winiquetic, pero ma jna' banti bahtic. Nutsahic bahel ta ora, ya me atahic, xchi. 6Pero yic'ojix mohel ta sba sna a, snac'ojix ta banti tomajtic ta q'uihyel lino ta sba sna.
7Hich te winiquetic yu'un te ajwalil baht slehic te jtsahtaywanejetic ta sbehlal Jordán c'alal ta tec'o-ha'etic. C'alal loq'uiquix bahel a te jnutsawetic, la yich' maquel te yochibal te pueblo.
8Ma to xwayic a te jtsahtaywanejetic, te ants mo bahel ta sba sna, hich c'oht yalbe: 9Ya jna' te Jehová la ya'beyex te q'uinal ini, como tal bayel xiwel ta jtojolcotic awu'unic, soc spisil te yajwal te q'uinal lajemiquix ya ya'iyic yu'un xiwel ta acuentahic. 10Yu'un ca'iyejcotic te Jehová la staquijtes slumil te Mar Rojo ta atojolic te c'alal loq'uex tal ta Egipto, soc te bin la apasbeyic te cheb ajwaliletic yu'un te amorreohetic te ayic ta jehch Jordán, ha te Sehón soc Og, te jc'axel la alajinic. 11Te c'alal hich la jca'iycotic, laj yip co'tancotic yu'un; mayuc jtuhl winic te ay yip yo'tan yu'un ya scomex, como te Jehová te Dios awu'unic, ha Dios ta ch'ulchan ta toyol soc ta bahlumilal ta ye'tal. 12Ha yu'un ya calbeyex wocol yo'tic te yacuc awalbonic ta jamal ta stojol Jehová te hich te bin ut'il la awich'ic c'uxultayel cu'un te ha'exe, ha'uc ni me hich yac ac'uxultaybon te mach'atic ay yu'un te jtate. A'bon quil señahil te hichuc ya xc'oht ta pasel awu'unic, 13te yac awaq'uic cuxajuc te jtat, te jnan, jbanquil, jwix, quihts'nab, soc spisil mach'atic ay yu'unic, te yac awac' ya xcolotcotic ta lajel, xchi.
14La sjaq'uic te winiquetic: Ya jelcotic ta jcuxlejalcotic te acuxlejalic teme ma ba yac awal te bin scuentahil te talemotcotique. Te c'alal ya'beyejotcotiquix a te q'uinal te Jehová, ya me jc'uxultayatcotic soc hich ya jpasbatcotic te bin ut'il la jcalbatcotiquix, xchihic.
15Ha yu'un te ants la scohteslan ta lazo ta ventana, yu'un te sna banti nahinem ay ta yutil te sts'ahcul te pueblo. 16Hich la yalbe bahel: Bahanic ta witsiltic scuenta yu'un hich ma ba ya stahex a te mach'atic yac slehbelex. Nac'a abahic oxebuc c'ahc'al tey a, ha to c'alal ya suhtic tal te mach'atic yac slehbelex, patil ya xhu' ya xbahex, xchi.
17Hich la sjaq'uic: Te ho'otcotic ya xhilotcotic ta libre yu'un te bin la awac'otcotic ta yalel ta jamal teme ma ba yac apas te bin ya calbate. 18C'alal ya x'ochotcotic tal ta q'uinal ya me ajohc'an te tsajal lazo ini ta ventana te banti yac acohtesotcotic, soc ya me atsob ta ana te atat, anan, abanquil, awix, awihts'nab, soc spisil mach'atic ay yu'un te atate. 19Mach'ayuc a te ya xloc' bahel ta sti'il ana, ay ta scuenta stuquel te sch'ich'ele, ma jmulcoticuc ya xc'oht. Pero mach'ayuc a te sjoquinejat ta ana, ay ta jcuentacotic te sch'ich'el teme ay bin ya xpasbote. 20Soc teme yac awal te bin la jchaptic, ya xhilotcotic ta libre yu'un te bin la awac'otcotic ta yalel ta jamal, xchihic.
21Hichuc me te bin la awalic, xchi te antse. Hich la sticonlan bahel, hich bahtic. Ha la schuc te tsajal lazo ta ventana te antse.
22Behenic bahel, c'ohtic ta witsiltic te banti halajic oxeb c'ahc'al, ha to c'alal suhtic bahel te mach'atic yac slehbelic bahel ta sch'ixil te be, pero ma ba la stahic. 23Hich suhtic cohel ta wits te cheb winiquetic, sohlic bahel ta ha', c'ohtic ta banti ay te Josué snich'an Nun, la yalbeyic spisil te bin c'oht ta pasel ta stojolique. 24Hich la yalbeyic te Josué: Te Jehová ya'beyejotiquix ta jc'abtic spisil te q'uinale; soc spisil te mach'a nahinemic tey a lajemiquix ya ya'iyic yu'un xi'belotic, xchihic.
Biblia Tzeltal Bachajon © Sociedad Bíblica de México, A.C., 2006.