Jeremías 2
2
La yihquitayic sch'uhunel Jehová te Israel
1Tal te sc'op Jehová ta jtojol, hich la yal: 2Bahan, halbeya te Jerusalén te hich ya yal te Jehová:
Ya jna' te c'alal ach'ixat to a
jun awo'tan ta jtojol,
te c'uxon ta awo'tan te c'alal jmacojat a,
te la at'unon bahel ta jochol taquin q'uinal,
ta q'uinal te mayuc bin ts'umbil tey a.
3Ch'ultesbil a te Israel ta stojol Jehová,
ha sba sit sts'unubil.
Spisil te mach'atic la slajinic
la sta smulic yu'un;
chopol bin c'oht ta stojolic, xchi te Jehová.
4A'iybeya awa'iyic sc'op te Jehová, pueblohex yu'un Jacob, soc spisil ta chahp yu'un Israel. 5Hich ya yal te Jehová:
¿Bin ma lecuc la stahbonic te ame'atatic,
te q'uejel bahtic ta jtojol,
te la st'unic bahel te bin ma xtuhun,
te hich mayuc sc'oblal c'ohtic?
6Ma ba la yalic: ¿Banti ay te Jehová
te la sloq'uesotic tal ta Egipto,
te la yic'otic bahel ta jochol taquin q'uinal,
ta taquin q'uinal soc hemeltic,
ta taquin lum soc yaxinal lajel,
ta lumq'uinal te mayuc mach'a c'axem tey a
soc mayuc mach'a ya xnahinic tey a? ma xchihuquic.
7Ho'on la jquiq'uex tal ta lequil q'uinal
scuenta yu'un yac awe'beyic sit te awal ts'unubic
soc te bintic lec tey a.
Pero tal abohlobtesbonic sc'oblal te q'uinal cu'un
soc la awaq'uic te ilobtic sba c'oht te bin quich'oje.
8Te sacerdotehetic ma hichuc la yalic:
¿Banti ay te Jehová? ma xchihuquic;
soc te mach'atic yich'ojic te Ley
ma ba la sna'bonic jba;
te jcananetic la stoy sbahic ta jtojol,
te jalwanejetic c'opojic ta scuenta te sbihil Baal
soc la st'unic bahel te bintic ma xtuhunique.
9Ha yu'un ya jtijex ta c'op
yu'un ya jcontrahinex, xchi te Jehová,
ya jchahpan yu'un scontrahinel
te yal-snich'nab te awal-anich'nabique.
10C'axanic bahel ta ti'mar yu'un Quitim#2.10 Quitim: ay ta stojol smahlib c'ahc'al.
soc ila awilic,
ticonahic bahel ta Cedar#2.10 Cedar: Ay ta stojol banti ya xloc' tal c'ahc'al.
soc tsahtaya awilic ta lec;
ilawil teme ay hich c'ohem ta pasele.
11¿Ay bal nación te syanijtesej te diosetic yu'un,
aunque ma ha'uc diosetic?
Pero te pueblo cu'un
la sjeltay te yutsilal ta bin jc'axel ma xtuhun.
12¡Xchamuc awo'tan yu'un, ch'ulchan!
¡Nihcan yu'un tulan xiwel! xchi te Jehová.
13Cha'chahp mulil la spas te pueblo cu'une:
ha te la yihquitayon,
ho'on te cuxul sloq'uib-ha'on,
soc la shotic yawil ha' yu'unic,
ha yawil ha'etic te lohmenic
te ma xhil ha' tey a.
14¿Ha bal a'bat te Israel?
¿Ayin bal ta mosohil?
¿Bin yu'un hiche te pojbil biluc c'ohem?
15Te chojetic awonic ta scontrahinel,
tulan awonic soc la sjinic hilel te sq'uinale;
chic'bilic te pueblohetic yu'un,
mayuc mach'a ya xnahin tey a.
16Te winiquetic yu'un Menfis soc Tafnes
la swuybat ajol.#2.16 O: la squits'bat stsotsel ajol.
17¿Ma bal ha'uc hich pasbotat yu'un
te la awihquitay hilel te Jehová te Dios awu'un
te c'alal la stojobtesat bahel ta be?
18Yo'tic, ¿bin yac ata a te ya xbahat ta Egipto
yu'un yac awuch'be ya'lel te muc'ul-ha' Nilo?
Soc ¿bin yac ata a te ya xbahat ta Asiria
yu'un yac awuch'be ya'lel te muc'ul-ha' Éufrates?
19Ya ya'bat castigo te amule,
ya yalbat amul te ma junuc awo'tan.
Nopa awa'iy hiche soc na'a me
te ha chopol soc ch'a
te yac awihquitay hilel te Jehová te Dios awu'un,
soc te ma ba ya xiw awo'tan ta jtojol,
xchi te Jehová te scuentahinej spisil.
20Como nameyix la awuy
te yugo awu'un soc te bin chuculat a,
hich la awal:
Ma ba ya cac' jba ta a'batinel, xchihat.
Ta spisil ini, la awac' aba ta antsinel
ta spisil toyol tsehletic
soc ta ye'tal spisil pimil ya'binal te'etic.
21La jts'unat hichuc tsahbil ts'usub,
ta spisil lequil sbac' ts'unubil.
¿Bin ut'il ay a te c'atp'ujat ta jtojol
ta yan ts'usubil?
22Aunque yac apoc aba ta lejía
soc yac atuhun bayel xapon,
stalel ay ta jtojol te yabaquil te amule,
xchi te Cajwaltic Jehová.
23¿Bin ut'il ay a te hich yac awal:
Ma ba bohloben jc'oblal,
mayuc bin ora la jt'un bahel te baaletic, te xchihate?
Ilawil bin ut'il ayat ta spamlej,
na'a me te bin apasoj,
yantsilel camellohat
te bayuc nax ya x'ahnimajat,
24yantsilel ha'mal burrohat
te c'ahyem ta jochol taq'uin q'uinal,
te ya yich' ta ic' te c'alal chijuben,
¿mach'a ya xhu' yu'un scomel?
Mach'ayuc ya xlehot yu'un, ma ba ya xluhb,
como ya sta ta yorahil te schijubel.
25Ma me xbehenat te mayuc atep
soc ma me xawac' ya xtaquij anuc'.
Pero hich la awal: Mayuc bin ya xhu' ta pasel,
como ha c'ux ta co'tan te yan diosetic,
ya me jt'un bahel, xchihat.
26Hich te bin ut'il ya xq'uexaw j'elec'
te c'alal ya xchicnaj,
hich ya xq'uexawic te sna Israel,
ha'ic soc te ajwaliletic, príncipaletic
sacerdotehetic soc te jalwanejetic yu'unic,
27te hich ya yalbeyic te te':
Ha'at jtatat, xchihic,
soc hich ya yalbeyic te ton:
Ha'at la awalatayon, xchihic.
La ya'bon quil te spatic,
ma ha'uc te sit yelawic.
Pero te c'alal ay swocolic hich ya yalic:
¡Hahchan, coltayawotcotic! xchihic.
28¿Banti ay te diosetic awu'unic
te la apasique?
¡Ac'a hahchuquic,
ya quiltic teme ya xhu' ya scoltayex
ta yorahil awocol!
como hich yipal diosetic awu'un
te bin ut'il pueblohetic awu'une, Judá.
29¿Bin yu'un yac ahachic c'op ta jtojol?
Apisilic la atoy abahic ta jtojol, xchi te Jehová.
30Tojol la jca'be castigo te anich'nabic,
ma ba la yich'ic ta cuenta te tojobtesele.
Te espada awu'unic la slajinlan te jalwanejetic
hich te bin ut'il choj ya xbutsticlanwan.
31Jcaj ts'umbalilex ini,
a'iybeya awa'iyic sc'op te Jehová.
¿Yu'un bal jochol taquin q'uinalon ta stojol Israel,
o q'uinalon te ay ta yihc'al q'uinal?
¿Bin yu'un hich ya yal te pueblo cu'un:
Ayotcotic ta libre;
ma ba ya xtalotcotiquix ta atojol, te xchihe?
32¿Ya bal xch'ay ta yo'tan te ach'ix te sch'ahlele?
o te ach'ix te ya xnuhpun,
¿ya bal xch'ay ta yo'tan te sch'ahlel sc'u'e?
Pero te pueblo cu'un
bayelix c'ahc'al te ch'ayon ta yo'tane.
33¡Mero yac ana'be sbehlal slehel
te mach'a yac amon aba soque!
¡Te chopol antsetic
ay bin ya xhu' ya snopic ta acuenta!
34Ta ac'u' apac' ya xchicnaj sch'ich'el
te pobrehetic te mayuc smulic,
aunque mayuc bin chopol la atahbe.
Aunque hich ay, hich yac awal:
35Mayuc jmul;
ma ba ilinem Dios ta jtojol, xchihat.
Ya xhahch jchahpanat, como la awal:
Mayuc jmul, te xchihate.
36¿Bin yu'un te ora nax
yac ayanijtes te behetic awu'une?
Ya me xq'uexawat ta scuenta Egipto,
hich te bin ut'il q'uexawat yu'un Asiria.
37Ha nix hich, atsacoj ajol a
ya xloc'at tey a,
como te Jehová la sp'ajticlan
te mach'atic smuc'ulinejic awo'tane;
ma ba lec ya xc'ohat ta scuentahic.
Currently Selected:
Jeremías 2: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.