Génesis 18
18
Halbot Abraham te ya x'ayin snich'an
1Te Jehová la yac' sba ta ilel ta stojol Abraham ta jihte' yu'un Mamre te c'alal hucul ta sti'il snahilpac' ta yorahil sc'uxul c'ahc'al. 2Te Abraham la shach sit, la yil oxtuhl winiquetic te tec'ajtic ta stojol. C'alal la yil, ahnimal loc' bahel ta sti'il snahilpac', baht sta tal, la spahcan sba ta lum, 3hich la yal: Tatic, teme ay yutsil awo'tan ta jtojol, awocoluc, ma xc'axat bahel ta stojol te awa'bate. 4Ya jc'an tal jtebuc ha' yu'un yac apoc awoquic a, patil yac acux awo'tanic ta ye'tal te'. 5Ya quich' tal jtebuc we'elil yu'un yac ata xan awipic a, patil ya xbahex; yu'un ha scuentahil te talex ta stojol te awa'bate, xchi.
La sjaq'uic: Hichuc, pasa te bin la awale, xchihic.
6Hich te Abraham ora baht ta nahilpac' te banti ay te Sara, hich la yalbe: Ich'a ta ora oxp'is lequil harina, wots'a, pasa ta pan, xchi. 7Te Abraham ahnimal baht ta banti ay te wacaxetic, la stsac jcoht alal wacax te tut soc lec, la ya'be te ya'bat te la schahpan ta ora. 8Patil la yich' tal queso soc leche soc te alal wacax te pasbilix, la spahchambe swe'ic. La sjoquin ta we'el ta ye'tal te'.
9La sjoc'oyic: ¿Banti ay te awihnam Sara? xchihic.
Ay ta nahilpac', xchi.
10Hich halbot yu'un: Jamal ya calbat, ya xcha'talon ta hich ora ta yan ha'bil, te awihnam Sara ya me x'ayin squerem-al, xchi.
Te Sara yac ta ya'iyel te c'op ta sti'il te nahilpac' te ay ta spat. 11Mamalix a te Abraham soc me'elix a te Sara, soc ma ba yaquix ta yilel schamel te Sara hich te bin ut'il ya xpasbot te antsetique. 12Ha yu'un tse'ejin ta yo'tan te Sara, hich la yal: C'alal me'elonix a soc mamalix a te cajwal ¿ya to bal ca'iybe xan yutsil? xchi. 13Te Jehová hich la yalbe te Abraham: ¿Bin yu'un tse'ejin te Sara, te hich la yal: ¿Ya to bal x'alajon te bin ut'il me'elonix? te xchihe? 14¿Ay bal bin wocol ta pasel ya ya'iy te Diose? Ya suhton tal ta atojol ta yorahil te la jcalbate, ha yorahil a te ya x'ayin squerem-al te Sara, xchi.
15Xiw te Sara, la smuc ta yo'tan: Ma ba tse'ejinon, xchi.
Pero halbot yu'un: Ma hichuc, tse'ejinat, xchi.
Abraham la sc'ambe scoltayel Sodoma
16Hahchic te winiquetic, la yilic bahel ta stojol Sodoma; joquinotic bahel yu'un te Abraham. 17La yal te Jehová: ¿Ya bal jmuc ta stojol Abraham te bin ya xbaht jpas, 18te bin ut'il muc'ul nación ya xc'oht te ay bayel yip, soc te bin ut'il spisil te nacionetic ta bahlumilal ya x'a'bot bendición ta scuenta? 19Como ya jna' te ya me spas ta mandar te yal-snich'nab soc te mach'atic ay yu'un ta patil te ya me st'unic te be yu'un Jehová, ha te ya spasic te bintic toj soc te bintic lec ta pasel, scuenta yu'un te Jehová ya yac' c'ohtuc ta pasel ta stojol Abraham te bin yalbeyej ta jamal. 20Ha yu'un te Jehová la yalbe te Abraham: Te bin ut'il yac ta behbe tohyel c'opetic ta stojol te Sodoma soc Gomorra, soc te c'ax bayel te smulique, 21ya xcohon bahel, ya quil teme hich nix spasojic te bin ut'il la yich' halel ta jtojol. Teme ma hichuque, ya me jna', xchi.
22Loq'uic bahel tey a te winiquetic, bahtic ta stojol Sodoma: pero te Abraham teq'uel hil ta stojol Jehová stuquel. 23Nohpoj xan bahel te Abraham, hich la yal: ¿Pajal bal yac awac' lajuc soc mach'a chopol yo'tan te mach'a toj yo'tan? 24¿Ha xan teme ay lajuneb yoxwinic (50) ta tuhl tey a te toj yo'tanic, ya bal alajin, ma bal yacuc apasbe perdón te pueblo ta scuenta te lajuneb yoxwinic (50) ta tuhl tey a te toj yo'tanic? 25Ma hichuc ay ta pasel awu'un te pajal yac awac' lajuc soc te mach'a chopol yo'tan te mach'a toj yo'tan, te pajal bin ya xc'oht ta stojol te mach'a toj yo'tan soc te mach'a chopol yo'tan. ¡Mayuc bin ora te hich yac apas! Te Jchahpanwanej yu'un swohlol te bahlumilal ¿ma bal ha'uc ya spas te bin toj ta pasele? xchi.
26Ha yu'un la sjac' te Jehová: Teme ya jta lajuneb yoxwinic (50) ta tuhl ta Sodoma te toj yo'tanic, ma ba ya jlajin te pueblo ta scuentahic, xchi.
27La sjac' xan te Abraham: Hahchemonix ta c'op soc te Cajwal, aunque ts'ubilumon soc tanon. 28Teme ay ho'tuhl ma sta lajuneb yoxwinic (50) ta tuhl te toj yo'tanic, ¿ya bal awac' lajuc spisil te pueblo ta scuenta te ho'tuhlique?
Halbot yu'un: Ma ba ya jlajin teme ya jta ho'eb yoxwinic (45) ta tuhl tey a, xchi.
29Te Abraham la sc'opon xan: ¿Ha xan teme ay cha'winic (40) ta tuhl? xchi.
Ma ba ya jpas ta scuenta te cha'winic (40) ta tuhl, xchi te Jehová.
30Te Abraham la yalbe xan: Ma me x'ilinat, Cajwal, teme ya jc'oponat xane. ¿Ha xan teme ay lajuneb scha'winic (30) ta tuhl tey a? xchi.
Ma ba ya jpas teme ay lajuneb scha'winic (30) ta tuhl ya jta tey a, xchi te Jehová.
31Te Abraham la yalbe xan: Mero hahchemonix ta c'op soc te Cajwal: ¿Ha xan teme ay jtahb (20) ta tuhl tey a? xchi.
Ma ba ya jlajin ta scuenta te jtahb (20) ta tuhl, xchi te Jehová.
32La yalbe xan: Ma me x'ilinat, Cajwal, teme ya jc'oponat jun xan buelta: ¿Ha xan teme ay lajuntuhl (10) tey a? xchi.
Halbot yu'un: Ma ba ya jlajin ta scaj te lajuntuhl (10), xchi te Jehová.
33C'alal laj yo'tan ta c'op soc Abraham baht te Jehová; yan te Abraham suht bahel ta sna.
Currently Selected:
Génesis 18: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.