Éxodo 9
9
Laj chambahlametic
1Ha yu'un te Jehová la yalbe te Moisés: Ochan bahel ta stojol faraón, hich me xawalbe: Hich ya yal te Jehová te Dios yu'un te hebreohetic: Ac'a loq'uel te pueblo cu'un scuenta yu'un ya sch'uhuntayonic. 2Yu'un teme ma xawac' loq'uel, teme ya to acomilan, 3te sc'ab Jehová ya yac' tulan jmilawal-chamel ta stojol te chambahlametic awu'unic te ay ta aquiltic: ha te cawuhetic, burrohetic, camellohetic, wacaxetic, tuminchijetic soc tentsunetic. 4Te Jehová parte ya xc'oht yu'un te chambahlametic yu'un te snich'nab Israel soc yu'un Egipto, ma ba ya xcham stuquel te bintic ay yu'un te snich'nab Israel, xchi.
5Te Jehová la ya'be yorahil, hich la yal: Pajel hich ya xc'oht ta pasel yu'un Jehová li' ta q'uinal ini, xchi.
6Ta yan c'ahc'al hich la spas te Jehová; cham spisil te chambahlametic yu'un Egipto. Yan te schansbahlamic te snich'nab Israel ni jcohtuc cham stuquel. 7Te faraón la sticon ta ilel, pero ma ba cham ni jcohtuc chambahlam yu'un te snich'nab Israel. Pero tulanub yo'tan te faraón, ma ba la yac' loq'uel te pueblo.
Chacaletic
8Ha yu'un te Jehová la yalbe te Moisés soc Aarón: Jopahic bahel te stanul horno, te Moisés ya me stuhquiy mohel ta toyol ta stojol faraón. 9Ha ts'u'lum ya xc'oht ta spahmal sq'uinal Egipto, ya yac' chacaletic te ya x'uhl sbaq'uetalic te ants-winiquetic soc chambahlametic ta spahmal sq'uinal Egipto, xchi.
10Hich la sjohpic bahel stanul horno, bahtic ta stojol faraón. Te Moisés la stuhquiy mohel ta toyol te tane, hich chicnaj chacaletic te uhl sbaq'uetalic te ants-winiquetic soc te chambahlametique. 11Te j'ilojeletic ma ba hu' yu'unic ya xhilic xan ta stojol Moisés ta scaj te tsacotic ta chacaletic soc spisil te egipciohetique. 12Pero te Jehová la stulanubtesbe yo'tan te faraón, hich ma ba la ya'iybe sc'opic te Moisés soc Aarón, hich te bin ut'il halbot yu'un Jehová te Moisés.
Bat
13Patil te Jehová la yalbe te Moisés: Hahchan ta sab, tehc'ana aba ta stojol faraón, halbeya: Hich ya yal te Jehová te Dios yu'un te hebreohetic: Ac'a loq'uel te pueblo cu'un yu'un ya xbaht sch'uhuntayonic. 14Yu'un ya jticonix tal spisil te castigohetic ta atojol, ta stojol te a'batetic soc te pueblo awu'un scuenta yu'un hich yac ana' a te mayuc yan mach'a pajalon soc ta spahmal q'uinal. 15Yu'un te lajuc cac' tal jc'ab yu'un ya ca'bat jmilawal-chamel soc te pueblo awu'un, ma ba cuxulatix ta q'uinal te hichuque. 16Pero ta smelelil la jcac' cuxajucat scuenta yu'un ya xchicnaj cu'el ta acuenta, soc scuenta yu'un ya yich' puquel bahel ta spahmal q'uinal te jbihile. 17Pero ya to atoy xan aba ta scontrahinel te pueblo cu'un te ma xawac' loq'uele. 18Ta hich ora pajel ya cac' tal bat te mero al te mayuc hich c'axem ta Egipto c'alal shahchibal c'alal ora. 19Ha yu'un ticona ta tsobel ta na te achanabahlam soc spisil bintic ay awu'un ta aquiltic, yu'un spisil ants-winiquetic soc chambahlametic te ayic ta yohl q'uinal, te ma ba ayic ta yutil na, ya xco tal bat ta stojol, ya xlajic yu'un, xchi.
20Te a'batetic yu'un faraón te la xi'ic te sc'op Jehová la yotsesic ta na te a'batetic soc te chambahlametic yu'unique. 21Pero te mach'a ma ba la yich'ic ta cuenta te sc'op Jehová, la yac' hiluc ta aquiltic te a'batetic soc te chambahlametic yu'unique.
22Te Jehová hich la yalbe te Moisés: Toya mohel ac'ab scuenta yu'un ya xtal bat ta spahmal sq'uinal Egipto, ta stojol ants-winiquetic, chambahlametic soc spisil bintic ya xcol ta sq'uinal Egipto, xchi.
23Hich te Moisés la stoy mohel te snahbate'; te Jehová la yac' tal chahwuc soc bat, soc co tal c'ahc' ta lumq'uinal. Te Jehová la yac' tal bat ta spahmal sq'uinal Egipto. 24Tal bat, soc ay c'ahc' capal soc te bat, mero niwac, mayuc hich c'axem ta spahmal sq'uinal Egipto ta shahchibal talel. 25Te bat la slajinlan spisil bintic ay ta aquiltic ta spahmal sq'uinal Egipto, ants-winiquetic soc chambahlametic; la slajin spisil te ha'maletic soc la sjepticlan spisil te te'etic ta q'uinal. 26Yan ta sq'uinal Gosén, ta banti ayic te snich'nab Israel, ma ba co bat tey a stuquel.
27Ha yu'un te faraón la sticon ta iq'uel te Moisés soc Aarón, hich la yalbe: Yo'tic la jtahix jmul. Te Jehová ha toj stuquel, yan te ho'on soc te jlumale chopolon soc. 28C'opona te Jehová, yu'un tic' a te chahwuc yu'un Dios soc te bat. Ya caq'uex bahel, ma ba ya jcomexix, xchi.
29Hich la sjac' te Moisés: Teme loc'on bahel ta pueblo, ya jtoy jc'ab ta stojol Jehová, ya xquehchaj te chahwuc soc ma ba ya xtal xan bat, scuenta yu'un hich yac ana' a te ha yu'un Jehová te q'uinale. 30Pero ya jna' te ha'at soc te a'batetic awu'un ma to ba axi'ojic te Jehová Dios, xchi.
31Laj te lino soc te cebada, como ayix sit a te cebada soc ayix snich a te lino. 32Yan te trigo soc te centeno ma ba lajic stuquel, como ma to xcolic loq'uel tal a.
33C'alal loc' bahel Moisés ta stojol faraón, ta sti'il te pueblo, la stoy sc'ab ta stojol Jehová, hich quehchaj te chahwuc soc te bat, soc ma ba tal xan ha'al ta lumq'uinal. 34Pero te c'alal la yil te faraón te quehchaj te ha'al, te bat soc te chahwuc, la sta xan smul, la stulanubtes yo'tan soc te a'batetic yu'une. 35Tulanub yo'tan te faraón, ma ba la yac' loq'uel te snich'nab Israel, hich te bin ut'il la yal Jehová ta scuenta Moisés.
Currently Selected:
Éxodo 9: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
