Éxodo 30
30
Scajtajib ta chiq'uel pom
1Ya me apas ta acacia-te' jun scajtajib banti ya yich' chiq'uel pom. 2Pajal ta chanxuhc, jun xuhc'ubil#30.2 45 centímetros snahtil soc jun xuhc'ubil sjamalil, cheb xuhc'ubil#30.2 90 centímetros stoyolil. Te xulubiletic junax ya yich' pasel soc. 3Ya me apots ta puro oro te sba, te spat, soc te xulubiletic; soc ya me apasbe sch'ahlel ta oro ta sjoyobal. 4Soc pasbeya cheb ch'ocowil ta oro ta ye'tal te sch'ahlel, ta scha'bunjehchel, te banti ya x'och te sq'uechojibal te ya yich' q'uechel bahel a. 5Pasbeya sq'uechojibal ta acacia-te' soc ya me apots ta oro. 6Ya me awac' te scajtajib ta chiq'uel pom ta stojol te tsalul pac' macal a te scaxahul Testigo-c'op, ta stojol te yawil stahel perdón te ay ta sba te Testigo-c'op, te banti ya jta jbahtic ta c'op.
7Te Aarón tey me ya schic' pom a te sumet yic' ta jujun sab c'alal ya schahpan te tsumbil c'ahq'ue. 8Te c'alal ya stsun te c'ahc' ta yihc'ubel q'uinal te Aarón ha nix hich ya me schic' te pom. Spisil ora ya me yich' pasel ta stojol Jehová yu'un te patil al-nich'anetique. 9Ma me ayuc yan pom yac achic' tey a, o scohtol chic'bil mahtanil, o mahtanil harina, soc ma me xamal tey a te malbil mahtanile. 10Jun buelta ta jujun ha'bil te Aarón ya me yac' ta sba te xulubetic te sch'ich'el te milbil mahtanil scuenta stojel mulil. Ya me spas te stojel mulil tey a jun buelta ta jujun ha'bil ta cajalcaj ats'umbalic. Ha mero ch'ultesbil yu'un Jehová, xchi.
Stojol sjelol scuxlejal
11Te Jehová la yalbe te Moisés: 12Te c'alal yac awahtay te snich'nab Israel, jujutuhl me ya ya'be Jehová te stojol sjelol scuxlejal te c'alal ya yich' ahtayel, scuenta yu'un ma ba ya xtal tulan chamel ta stojolic te c'alal yac awahtay. 13Spisil mach'a ahtaybilix ya me yaq'uic j'ohlil siclo,#30.13 5.5 gramos hich te bin ut'il te siclo yu'un te ch'ul awilal. Te jun siclo ha jtahb gera yalal. Te j'ohlil siclo ha smahtan te Jehová. 14Spisil te mach'atic ahtaybil te jtahb ya'bilalic bahel, ya me ya'beyic te smahtan te Jehová. 15Ma ha'uc toyol xan ya yac' te jc'ulejetic, soc ma ha'uc peq'uel xan ya yac' te pobrehetic te bin ut'il te j'ohlil siclo te c'alal yac awa'beyic smahtan te Jehová scuenta stojol sjelol te acuxlejalique. 16Ya me awich'be te snich'nab Israel te taq'uin ya yaq'uic scuenta stojol sjelol scuxlejalic, ya me awac' yu'un te a'tel ya yich' pasel ta Nahilpac' Templo yu'un tahojibal. Ha sna'ojibal te snich'nab Israel ta stojol Jehová, scuenta stojol sjelol te acuxlejalique, xchi.
Yawil ha' pasbil ta bronce
17Te Jehová hich la yalbe xan te Moisés: 18Soc ya me apas yawil ha' ta bronce soc scajtajib ta bronce te ya xtuhun yu'un te bin ya yich' poquel. Tey yac awac' ta ohlil yu'un te Nahilpac' Templo yu'un tahojibal soc te scajtajib ta chiq'uel mahtanil, soc ya me anojes ta ha'. 19Tey ya spoc yoc sc'abic a te Aarón soc te snich'nabe. 20Te c'alal ya x'ochic ta Nahilpac' Templo yu'un tahojibal ya me x'atinic, scuenta yu'un ma xchamic a. Soc te c'alal ya xnohpojic tal ta scajtajib ta chiq'uel mahtanil ta spasel ya'tel ta schiq'uel milbil mahtanil ta stojol Jehová, 21ya me spoc yoc sc'abic scuenta yu'un ma xchamic a. Ha mandaril te stalel ya xhil yu'un Aarón soc sts'umbal ta cajalcaj bahel, xchi.
Ch'ul aceite yu'un yich'el ya'tel
22Te Jehová la yalbe xan te Moisés: 23Ya me awich' te bin mero sumet yic': ho'winic scha'bahc' (500) siclo#30.23 6 kilos mero lequil mirra, lajuneb yoxlajunwinic (250) siclo#30.23 3 kilos canela te sumet yic', lajuneb yoxlajunwinic (250) siclo jalal te sumet yic', 24ho'winic scha'bahc' (500) siclo casia ha'mal, soc jun hin#30.24 4 litros aceite yu'un oliva. 25Ya me apas a te aceite yu'un ch'ultesel, buen lequil aceite, hich te bin ut'il ya spas te mach'a ya sna' spasel perfume. Ha me te aceite yu'un ch'ultesel. 26Ya me amal ta Nahilpac' Templo yu'un tahojibal, ta scaxahul Testigo-c'op, 27ta mesa soc spisil te bintic ya xtuhun tey a, ta scajtajib c'ahc' soc spisil bintic ya xtuhun tey a, ta scajtajib ta chiq'uel pom, 28ta scajtajib scohtol chic'bil mahtanil soc spisil te bintic ya xtuhun tey a, soc ta yawil ha' soc te scajtajibe. 29Ya me ach'ultes, hich mero ch'ultesbil ya xc'ohtic. Biluc a te ya xtahot yu'un ch'ultesbil ya xc'oht.
30Ya me amal ta aceite te Aarón soc te snich'nab, a'beya yich' ya'telic scuenta yu'un sacerdotehetic cu'un ya xc'ohtic. 31Hich me xawalbe te snich'nab Israel: Ha te ch'ul aceite cu'un scuenta ch'ultesel te ya xtuhun yu'un spisil ta cajalcaj bahel ats'umbalic. 32Ma me ayuc nax mach'a ya yich' malbeyel ta sbaq'uetal, soc ma me xapas yan aceite te pajal soc. Ha me ch'ul aceite stuquel, ac'a c'ohtuc ta awo'tanic te ha ch'ultesbil. 33Mach'ayuc a te ya spas yan aceite te pajal soc, o teme ya smal mach'ayuc a, ya me yich' loq'uesel ta yohlil te pueblo yu'un, xchi.
Sc'oblal pom
34Te Jehová la yalbe xan te Moisés: Ich'a te bintic sumet yic', ha xuch'il te', ha'mal te sumet yic' soc gálbano, soc lequil pom, pajal yalal spisil; 35ya me apas ta pom te sumet yic', capbil ta lec,#30.35 O: capbil soc ats'am hich te bin ut'il mach'a ya sna' spasel perfume, mayuc ya'baquil, soc ch'ultesbil. 36Ya me ajuch' ta lec j'ohliluc, ya me awac' ta stojol te yawil Testigo-c'op te ay ta Nahilpac' Templo yu'un tahojibal, ta banti ya jta jbahtic. Mero ch'ultesbil me ya xc'oht awu'unic. 37Ma me xapasic yan pom awu'unic te hich pasbile; ha ch'ultesbil ya xc'oht awu'un ta stojol Jehová. 38Mach'ayuc a te ya spas yan te pajal soc yu'un ya smulambe yic', ya me yich' loq'uesel ta yohlil te pueblo yu'un, xchi.
Currently Selected:
Éxodo 30: TZH
Highlight
Copy
Compare
Share
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.
