Ester 6
6
Mardoqueo ich'ot ta muc' yu'un Amán
1Ha nix ta ahc'abal a, te ajwalil ma ba tal swayel. Ha yu'un la sticon ta ich'el tal te libro yu'un te sna'ojibal soc te ya'tel, yu'un ya yich' ilbeyel ta stojol. 2Hich la stahic te banti ts'ihbabil te Mardoqueo la yac' chicnajuc te la schapbeyic sc'oblal ta milel te ajwalil Asuero te Bigtán soc Teres, te cha'tuhl eunucohetic te jcanan-ti'nahiletic yu'un te ajwalil. 3La yal te ajwalil: ¿Bin yich'el ta muc' la sta a, o bin smahtan la sta a te Mardoqueo te hich la spase? xchi.
Mayuc bin pasbot yu'un, xchihic te a'batetic yu'une.
4Ha yu'un te ajwalil la sjoc'oy: ¿Mach'a ay ta amac'? xchi. Ha yorahil a te yac ta ochel tal te Amán ta amac' te ay ta spat sna te ajwalil yu'un ya sjoc'obe te ajwalil te yacuc yich' jihpanel te Mardoqueo ta te' te pasbil yu'une. 5Te a'batetic yu'un te ajwalil hich la sjaq'uic: Ha te Amán te ay ta amac', xchihic.
Ac'a ochuc tal, xchi te ajwalil.
6Hich och tal te Amán, soc hich joc'obot yu'un te ajwalil: ¿Bin ya sc'an ya yich' pasbeyel te mach'a ya sc'an te ajwalil te ya yac' ta ich'el ta muc'? xchi.
Te Amán la yal ta yo'tan: ¿Mach'a a te ya sc'an te c'ax hich ya yac' ta ich'el ta muc' a te ajwalil te bin ut'il te ho'one? xchi. 7Ha yu'un te Amán la sjac'be te ajwalil: Te winic te ya sc'an ya x'ac'ot ta ich'el ta muc' yu'un te ajwalil, 8ac'a yich'ic tal te snahtil-c'u' ajwalil soc te cawu te banti ya xmo te ajwalil, soc ac'a ya'beyic ta sjol te scorona te ajwalil; 9patil ac'a ya'beyic te nahtil-c'u'ul soc te cawu ta sc'ab jtuhl príncipal te mero muc' sc'oblal yu'un te ajwalil, ac'a ya'beyic slap sc'u' te mach'a ya sc'an ya x'ac'ot ta ich'el ta muc' yu'un te ajwalil, ac'a yac' behenuc ta cawu ta plaza yu'un te pueblo soc hich ac'a yich' halel ta stojol: ¡Hich ya yich' pasbeyel te winic te ya x'ac'ot ta ich'el ta muc' yu'un te ajwalil! xchi te Amán.
10Te ajwalil hich la yalbe te Amán: Suja aba, ich'a bahel te nahtil-c'u'ul soc te cawu, hich te bin ut'il la awalixe, hich me xapasbe te judio Mardoqueo te hucul ta yochibal sna ajwalil. Ma me ayuc bin xach'ay ta spisil te bintic la awalix, xchi sc'oblal.
11Hich te Amán la stsac te nahtil-c'u'ul soc te cawu, la ya'be slap te Mardoqueo, la snitbe bahel te cawu ta plaza yu'un te pueblo, hich yac yalbel ta aw ta stojol: Hich ya yich' pasbeyel te winic te ya x'ac'ot ta ich'el ta muc' yu'un te ajwalil, xchi ta aw.
12Ta patil te Mardoqueo suht bahel ta yochibal sna te ajwalil, te Amán ora baht ta sna, yac ta mel-o'tan soc smacoj bahel sjol. 13La yalbe ya'iyic te Zeres te yihnam soc te yamigotac spisil bintic c'oht ta pasel. Hich halbotic yu'un te j'ac'-o'taniletic yu'un soc Zeres te yihnam: Teme ha sts'umbal judio te Mardoqueo, te hahchatix ta pehc'ajel ta stojol, ma ba yac atsal, ha'at me peq'uel ya xc'ohat ta stojol, xchihic.
14Te c'alal yaquic ta c'op soc a, ora c'ohtic te eunucohetic yu'un te ajwalil yu'un ya yiq'uic bahel te Amán ta we'el te chahpambil yu'un te Ester.
Biblia Tzeltal Bachajon © Sociedad Bíblica de México, A.C., 2006.