Ester 3
3
Amán ya schahpambe sc'oblal lajinel te judiohetic
1Ta patil ini, te ajwalil Asuero la stohytesbe ya'tel te Amán snich'an Hamedata, sts'umbal Agag, ha toyol xan c'oht yu'un spisil te príncipaletic te joquimbilic yu'une. 2Spisil te a'batetic yu'un te ajwalil te ayic ta ti'nahil yu'un te sna ajwalil ya squejan sbahic soc ya snijan sbahic ta stojol Amán, como hich yaloj ta mandar te ajwalil. Pero te Mardoqueo ma ba la squejan sba soc ma ba la spehc'an sba ta stojol.
3Te a'batetic yu'un te ajwalil te ayic ta ti'nahil la sjoc'obeyic te Mardoqueo: ¿Bin yu'un yac ac'axuntaybe smandar te ajwalil? xchihic. 4Jujun c'ahc'al hich la yalbeyic, pero ma ba ich'otic ta cuenta. Ha yu'un baht yalbeyic ya'iy te Amán yu'un ya yilic teme ma ba ya sut sc'op te Mardoqueo, como halbotiquix yu'un te ha judio-winic.
5Te c'alal la yil te Amán te ma ba ya squejan sba soc ma ba ya spehc'an sba ta stojol, mero ilin yu'un. 6Ma tic'uc ya ya'iy a teme ya smil stuquel te Mardoqueo; te bin ut'il halbilix te banti slumal te Mardoqueo, te Amán la snop bin ut'il ya slajin spisil te judiohetic te ayic ta ban c'alal scuentahinej te Asuero.
7Ta shachel u, ha te u Nisán, ta slahchayebal (12) ha'bil yochel ta ajwalil a te Asuero, la stuhunic te pur, ha te seña ta na'el, ta stojol te Amán scuenta sna'el bin c'ahc'alil soc bin uhil te hich ya xc'oht ta pasel. Ha c'oht ta slahchayebal (12) u, ha te u Adar.
8Te Amán hich la yalbe te ajwalil Asuero: Ay jun pueblo te puhquemic ta yohlil te pueblohetic ta spisil ta jujusehp q'uinal te ban c'alal acuentahinej, te leyetic yu'unic ma pajaluc soc te leyetic yu'un te yantic pueblohetic, soc ma ba ya sch'uhunic spasel te leyetic yu'un te ajwalil. Mayuc bin ya xtuhun yu'un te ajwalil teme cuxul ya xhilic. 9Teme lec ya ya'iy te ajwalil, ac'a yal mandar te ac'a yich'ic lajinel. Ho'on ya ca'be jpic soc ho'bahc' (10,000) talento#3.9 16.5 toneladas plata ta sc'abic te mach'atic ya scuentahimbeyic te bintic ay yu'un te ajwalil, yu'un ya x'och ta yawil sc'ulejal te ajwalil, xchi.
10Hich te ajwalil la sloq'ues ta sc'ab te sch'ocow, la ya'be te Amán snich'an Hamedata, sts'umbal Agag, te scontra te judiohetic, 11hich la yalbe: Te plata yac awac', hiluc ta acuenta. Pasbeya te pueblo te bin yac ac'an, xchi.
12Ha yu'un ta yoxlajunebal (13) c'ahc'al ta shachel u la yich'ic iq'uel te secretariohetic yu'un te ajwalil, la yich' sts'ihbayel spisil te bintic la yal ta mandar te Amán, la sticonlambe ta stojol te gobernadoretic ta jujusehp q'uinal soc te príncipaletic yu'un jujun pueblo, ta jujusehp q'uinal chican bin yilel te sts'ihbajelic soc ta jujun pueblo ha chican te sc'opique. La yich' ts'ihbayel ta scuenta sbihil te ajwalil Asuero soc la yich' te sello yu'un sch'ocow. 13La yich' ticonel bahel cartahetic ta scuenta mach'atic ya yich'ic bahel cartahetic ta stojol te jujusehp q'uinal yu'un te ajwalil, te ya yal mandar te ya me yich' jinel, milel soc lajinel spisil te judiohetic, ta spisil ach'ix-queremetic soc me'el mamaletic, alaletic soc antsetic, soc te ya yich' pojbeyel te biluquetic yu'unic, ta junax c'ahc'al, ta yoxlajunebal (13) c'ahc'al ta slahchayebal (12) u, ha te u Adar. 14Te copia te la yich' ts'ihbayel te ha mandaril ya xc'oht ta jujusehp q'uinal, la yich' puhquel ta spisil te pueblohetic scuenta yu'un chapalic a te c'alal ya xc'oht sc'ahc'alel. 15Te mach'atic yich'ojic te cartahetic loq'uic bahel ta scuenta smandar te ajwalil, soc la yich' aq'uel te mandaril ta Susa banti nahinem te ajwalil. Te ajwalil soc te Amán hucajtic ta uch'bajel, pero ta Susa ma ba la sna'ic bin ya spasic.
Biblia Tzeltal Bachajon © Sociedad Bíblica de México, A.C., 2006.