Eclesiastés 3
3
Spisil ay yorahil
1Spisil ay yorahil; ay yorahil spisil te bin ya yich' pasel ta ye'tal ch'ulchan:
2Ay yorahil ayinel, ay yorahil ya xcham;
ay yorahil ts'umbajel, ay yorahil ta bulel;
3ay yorahil milaw, ay yorahil poxtayel;
ay yorahil ta jinel, ay yorahil ta pasel;
4ay yorahil oq'uel, ay yorahil tse'ej;
ay yorahil mel-o'tan, ay yorahil ahc'ot;
5ay yorahil ta puhquel bahel tonetic,
ay yorahil ta tsobel tal tonetic;
ay yorahil mech'el,
ay yorahil mayuc mech'el;
6ay yorahil ta lehel, ay yorahil ta ch'ayel;
ay yorahil ta q'uejel, ay yorahil ta ch'ojel bahel;
7ay yorahil ta jatsel, ay yorahil ta ts'isel;
ay yorahil ch'abal ta c'op, ay yorahil ya xc'opoj;
8ay yorahil c'uxul-o'tanil, ay yorahil ihlayel;
ay yorahil guerra, ay yorahil lamal q'uinal.
9¿Bin ya xloc' yu'un a te winic te bayel ya x'a'teje? 10Quiloj te a'tel ya x'a'bot yu'un Dios te yal-snich'nab ants-winiquetic yu'un ya yo'tantayic spasel. 11Dios t'ujbil spasoj spisil ta yorahil; soc la ya'be sna' ta yo'tan te ants-winiquetic te bintic scuenta sbahtel q'uinal, aunque ma xhu' yu'unic sna'el te bin spasoj Dios c'alal shahchibal ha to ta slajibal.
12Jna'oj te mayuc yan bin lec ya spas te ants-winic, ha nax te tse'eluc yo'tan soc te lecuc bin ya spas ta scuxlejal; 13soc te ha mahtanil yu'un Dios te spisilic ya xwe'ic ya x'uch'ic, soc te ya smulanic spisil bintic ya spasique. 14Jna'oj te spisil bintic ya spas te Diose, stalel ay:
Mayuc bin yan ay ta otsesel
soc mayuc bin ay ta loq'uesel a.
Dios hich ya spas
scuenta yu'un ya x'ich'ot ta muc' yu'un te ants-winiquetique.
15Te bin ay ta ora ini, nameyix ay,
soc te bin ya xc'oht ta pasel, c'ohemix ta pasel;
soc Dios ya yac' chicnajuc yan buelta te bin c'axemixe.
Bintic ma stojiluc ya xc'oht ta pasel
16Ay to xan yan la jquil ta ye'tal ch'ulchan:
te banti ay chahpanwanej, ay bin chopol tey a;
te banti ay stojil ta pasel, ay mulil tey a.
17Hich la jcal ta co'tan: Dios ya schahpan te mach'a toj yo'tan soc te mach'a chopol yo'tan, como ay yorahil spisil bin ya sc'an soc ay yorahil spisil bintic ay ta pasel, xchihon.
18Soc la jcal xan ta co'tan: Te ants-winiquetic, Dios ya stsaj scuenta yu'un hich ya sna'ic a te pajal ayic soc te chambahlametique. 19Como te bin ya xc'oht ta scuenta te ants-winiquetic soc te chambahlametic junax ta schebalic: ha te bin ut'il ya xcham te june, hich nix ya xcham te yane. Pajal ya yich'ic ic'; te ants-winic mayuc banti toyol yu'un te chambahlam, yu'un spisil tojol nax.
20Spisil ya xbahtic ta junax awilal;
spisil pasbil ta ts'ubilum,
soc spisil ya suht xan ta ts'ubilum.
21¿Mach'a c'an sna' teme mohel ya xbaht te espíritu yu'un te ants-winic soc teme cohel ya xbaht ta sc'ubulil lumq'uinal te espíritu yu'un te chambahlame? 22Ha yu'un la jquil te mayuc bin yan xan lec ya xhu' ya spas te ants-winique, ha nax te ya smulan te ya'tele, yu'un hich a'bibil spas. Como ¿mach'a ya xhu' ya ya'be yil bin ya xc'oht ta pasel ta stojol ta patil?
Currently Selected:
Eclesiastés 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.