2 Reyes 3
3
Ya'tel Joram ta ajwalil yu'un Israel
1Ta swaxaclajunebal (18) ha'bil yochel ta ajwalil yu'un Judá a te Josafat, te Joram snich'an Acab och ta ajwalil yu'un Israel ta Samaria; lahchayeb (12) ha'bil ay ta ajwalil. 2Chopol bin la spas ta stojol Jehová, pero ma hichuc te bin ut'il te sme'stat, como la sloq'ues te ch'ultesbil ton yu'un Baal te la spas te state. 3Pero la spas te muliletic la spas te Jeroboam snich'an Nabat, te la ya'be sta smul a te Israel, ma ba la yihquitay.
Eliseo la yal te ya yich' tsalel Moab
4Te Mesa ajwalil yu'un Moab ya'telinej scoltesel tuminchijetic. Ay ta scuenta stojel spatan j'ohlil yoxlajunpic (100,000) alal tuminchijetic te ajwalil yu'un Israel soc j'ohlil yoxlajunpic (100,000) tat tuminchijetic soc stsotselic. 5Pero te c'alal cham te Acab, te ajwalil yu'un Moab la stoy sba ta stojol te ajwalil yu'un Israel. 6Hich te ajwalil Joram loc' hahchel ta Samaria, la yahtay spisil Israel. 7Soc hich la sticon ta halbeyel te Josafat ajwalil yu'un Judá: Te ajwalil yu'un Moab la stoyix sba ta jtojol. ¿Ya bal ajoquinon ta ya'beyel guerra te Moab? xchi.
Ya joquinat, como jun ayotic, jun ay te pueblo cu'untic soc jun ay te cawuhetic cu'untic. 8¿Banti behil ya xbohotic? xchi.
Ta sbehlal te jochol taquin q'uinal yu'un Edom, xchi te Joram.
9Hich loq'uic bahel te ajwaliletic yu'un Israel, yu'un Judá soc yu'un Edom. Te bin ut'il la sc'an te ya sjoybetayic te jochol taquin q'uinal huqueb c'ahc'al, laj te ha' yu'un ya yuch'ic te soldadohetic soc te ha' yu'un te chambahlametic yu'unique. 10Ha yu'un hich la yal te ajwalil yu'un Israel: ¡Ah! Te Jehová la yic' tal te oxeb ajwaliletic ini yu'un ya ya'be ta sc'ab te moabetic, xchi.
11Pero la yal te Josafat: ¿Ma bal ayuc jalwanej yu'un Jehová li'i te ya xhu' ya joc'obetic Jehová ta scuenta? xchi.
Ay jtuhl a'bat yu'un te ajwalil yu'un Israel, hich la yal: Li' ay te Eliseo snich'an Safat, te a'bat yu'un Elías, xchi.
12Ha me te yich'oj te sc'op Jehová, xchi te Josafat. Hich te ajwalil yu'un Israel, te Josafat soc te ajwalil yu'un Edom cohic bahel ta stojol Eliseo.
13Te Eliseo hich la yalbe te ajwalil yu'un Israel: ¿Bin cochelat a te ha'ate? Bahan ta stojol te jalwanejetic yu'un te anane, la yut.
Ma'uc, como te Jehová ha stsoboj te oxeb ajwaliletic ini yu'un ya ya'be ta sc'ab te moabetic, xchi te ajwalil yu'un Israel.
14La yal te Eliseo: ¡Yiloj Jehová te scuentahinej spisil, te ayon ta stojol! te manchuc ay ta cuenta cu'un te Josafat ajwalil yu'un Judá, ma ba ya quilat soc ma ba ya quich'at ta cuenta te hichuque. 15Ic'bonic tal jtuhl jtij-arpa, xchi.
Te c'alal yac ta tijel a te arpa, cuentahinot yu'un Jehová te Eliseo, 16hich la yal: Hich ya yal te Jehová: Pasahic bayel hotbil lumetic scuenta yawil ha' li' ta spamlej ini. 17Como hich ya yal te Jehová: Ma ba yac awilic te ay ic' soc ma ba yac awilic ha'al, pero ya me xnoj ta ha' te spamlej; ya me x'uch'ex soc te chambahlametic awu'unic, xchi. 18Ma wocoluc ya ya'iy te Jehová ini; ha nix hich ya me ya'beyex ta ac'abic te moabetique. 19Ya me ajinticlanic te pueblohetic te ay sts'ahcul, soc te pueblohetic te bayel sc'oblalic, yac ats'eticlanic spisil lequil te'etic, yac abut'ticlanic spisil te sloq'uib-ha'etic soc yac anojesic ta ton spisil te lequil q'uinal, xchi.
20Ta sab ta yan c'ahc'al, ta yorahil te ya yich' a'beyel milbil mahtanil, tal ha' ta sbehlal Edom; noj ta ha' te q'uinale. 21C'alal la ya'iyic spisil mach'atic yu'un Moab te yac ta talel ta a'beyel guerra yu'un te ajwaliletic, la stsob sbahic spisil te mach'atic ya xhu' yu'un schucbel te a'tejibal yu'un guerra, queremetic soc winiquetic, c'oht yac' sbahic ta sti'il te sq'uinalique. 22Te c'alal hahchic ta sab soc te c'oht sjahts' c'ahc'al ta sba te ha'e, te moabetic namal la yilic te ha', tsaj yilel te ha' hich te bin ut'il ch'ich'. 23Ha yu'un hich la yalbe sbahic: ¡Ha ch'ich' te malbil ta espada! Te ajwaliletic talel c'axel la wan scontrahin sbahic soc la wan smil sbahic. ¡Conic, Moab, ya jpojbetic sbiluquic! xchihic.
24Pero c'alal c'ohtic ta campamento yu'un Israel, hahchic te israeletic ta ya'beyel guerra te moabetique. Loq'uic ta ahnel ta stojol te israeletic. Pero la snutsic bahel soc la smilticlanic te moabetic, 25la slajimbeyic te pueblohetic, soc ta spisil te lequil q'uinaletic jujutuhl la snojesic hilel ta ton; la sbut'ticlanic spisil te sloq'uib-ha'etic soc la sts'eticlanic spisil te lequil te'etic. Ha xanix hil te Kir-hareset, pero te j'ac'-jihmuch'iletic la sjoytayic soc la slajinic.
26C'alal la yil te ajwalil yu'un Moab te ya xtsalotic ta guerra yu'unic, la yic' sjoquin bahel ho'lajunwinic scha'bahc' (700) winiquetic te ay espada yu'unic yu'un ya ya'beyic guerra te ajwalil yu'un Edom; pero ma ba hu' yu'unic. 27Ha yu'un la stsac te sba-nich'an te sc'oblal ya xhil ta sjelol ta ajwalil, la yac' ta chic'bil mahtanil ta sba ts'ahc. Hahch bayel ilimba ta stojol Israel, hich te israeletic la yihquitayic hilel, suhtic bahel ta sq'uinalic.
Currently Selected:
2 Reyes 3: TZH
Highlight
Share
Copy
Want to have your highlights saved across all your devices? Sign up or sign in
Biblia Tzeltal Bachajon © Sociedad Bíblica de México, A.C., 2006.