کولوسیپا 1
1
حضرت پولُسی سلام جْوس ۔
1خُدے تھوگّونگس نانگجین، حضرت عیسیٰ مسیح رسُول گُونلا لدامّا زادکھان حضرت پولُس تانگ نگاتانگونّی فونو تِیمُتھیُس گُونی چھوگسنے 2ای ایگے بو دیُوکُلُسّےگیالسے نانّگا یودکھانّی مسیح نانّگا ایمان چان تانگ ہلژخمہ فونو گُونلا ڈِیاد۔
نگاتانگی خُدے یابّی کھیوجاگونلا شزدے تانگ جیدے سالشیگ۔
حضرت پولُسی شُکر تانگ دُعا۔
3کھیوجاگونّی پھیا دُعا ژو زانے، نگاجے توسگیون نگاتانگی حضرت عیسیٰ مسیح یاب خُدا شُکر جُواد۔ 4چیاجونا کھیوجاگونّی حضرت عیسیٰ مسیح کا ایمان تانگ خُدے ہلژخمہ میتشانگما نیامپو چامسپا چوچیسپو نگاجے تشور۔ 5تے ایمان تانگ چامسپا گُون کھیوجاگونلا نامکھے نانّگا خُدے بورّا زادکھانّی شزدے ّی ریوابوے کانے یونگستے اینوگ۔ یانگ تے ریوابو کھیوجاگونّی نانّگا یودپین۔نام، کھیوجاگونلا تانگپورانگ لدینبے لون گاموےناتسُولبو تشور۔
6کھیوجاگونلا تھوبکھانّی تینّا گاموےناتسُولبو دُنیا گانگپوے نانّگا تشورین، یانگ ڈاسبو مانگپوجیگ سمینتے لداناین اینوگ، تینّا ژوگس کھیوجاگونّی میتشیے نانّگانگ لاس چوین اینوگ، نام کھیوجا تانگپورانگ خُدے شزدے سکورلا لدینبابو تشورتے ہاگو۔
7کھیوجاگونّی تے گاموےناتسُولبو نگاجے چیسپا جابستوگپا ٹوپا اِپفراسی کانے تشورتے این۔ کھو مسیح ایمان چانّی جابستوگپا، نگاجے تشابسلا کھیوجا روگس چوکھانبو این۔ 8یانگ ہلژخمہ رُوح بوے کھیوجا جانگونلا چامسپا چوچیسّی کھیود سالکھانبوانگ کھوے نگاجا شادس۔
9تینّابویپھیا نگاجے کھیوجاگونّی سکورلا تشورپانے پھارلا، چھادمیدلا کھیوجاگونّی پھیا خُدا دُعا چُواد۔ کھیوجاگونلا خُدے کھونگی تھوگّونگسپو گانگپو ہاگوچیس، یانگ رُوحانی تھوگسنے شیسرابس تانگ ہاگو سالّا زادچیسلا جُواد۔ 10تینے کھیوجاگونّی چیساتھوگنے مسیحا تھوگستھادچیس تانگ سیوا کھیونگکھانّی میتشے جیگ پھود نیانین۔ کھیوجے میتشے، ڈاسبوی ریگس زانگپو تشانگما سمینتے خُدے شیشیسّی نانّگا مانگنے مانّگا لدانین۔
11نگاجے دُعا چواد، کھیوجاگونلا زودپا یانگ ردوگنگال گُون کھور تھوبچیسّی پھیا خُدے کھیوجاگونّی رُوح بو کھونگی معجزہ کھیود نیامپو شیدچان چوا زادشیگ۔ یانگ ما تھادپو نیامپو، 12نگاتانگونّی یاب خُدا شُکر پھولشیگ۔ کھونگی کھیوجاگونلا، اودّی نانّگا دوگکھانّی کھونگی ہلژخمہ میگونّی نورسکالگون گوستے تھوبچیسلا لدامّا زادتے اینوگ۔ 13خُدے نگاتانگون شیطانی مونڈیگ وانگنے تھار چوگّا زادتے، کھونگرانگی چیسپے بُوژے گیالثیدّی نانّگا کھیرّا زادس۔ 14کھونگی بُوژے کھونگرانگی سروک سالتے نگاتانگون شیطانی وانگی کانے تھار چوگّا زادس، یانگ نگاتانگونّی دِیگپاگونلا مُعافی سالّا زادس۔
مسیحا نی تشانگمیسانگ جیگسپو این۔
15مسیحا ستاستے، مانے ماتھونگکھانّی خُداپو ہاگوانوگ۔
چیتشانگما چھاگشوگی سانگ سنگونلا مسیحا جُوگستے یودپین،
یانگ کھونّگا چیتشانگمیکا وانگ یودتے اینوگ۔
16کھونگ گیُودتے خُدے چیتشانگما چوا زادس۔
نامکھا تانگ دُنیائی نانّگا یودکھان تشانگما، تھونگکھان تانگ میتھونگکھان،
ٹھیس یا، گیالثید یا، وانگثول یا وانگ یودکھانگون،
تے تشانگما کھونگ گیُودتے یانگ کھونگی پھیا چوا زادتے اینوگ۔
17کھونگ تیگون چھاگشوگی سانگ سنگونلا جُوگستے یودپین۔
یانگ کھونگی جاستے ای تشانگما لوستے اینوگ۔
18عبادت خانہ نی کھونگی سکوزوگسپو اینوگ۔
یانگ کھونگ تے سکوزوگسپوے او این۔
کھونگ نی گوزوگسپو جُوگستے اینوگ،
یانگ شیتے سونتیا لانگسکھان تشانگمے ٹونے کھونگ ٹاگشوگپو این۔
تیبویپھیا کھونگ چیتشانگمے نانّگا دانگپوبو جُوگستے این۔
19مسیح نانّگا گانگپو ناسّالا خُدے تھوگستھادّادپین۔
20یانگ مسیحا گیُودتے خُدے چیتشانگما
کھونگرانگ نیامپو تھونڈیلّی نانّگا کھیونگا زادس۔
خُدے کھونگرانگی بُوژے ٹھاق کیانگشینگیکا پھوچیسپو گیُودتے،
دُنیا تانگ نامکھے نانّگا یودکھان تشانگما،
کھونگ نیامپو جیدیے نانّگا کھیونگا زادس۔
21سکابسشیگّا کھیوجاگون خُدانے ما تھاگرینّگا یودپین، یانگ کھیوجے چوتشول تانگ سامتشول نگانپا گُونی جاستے کھیوجا خُدے ڈاو اینپین۔ 22اِین نانگ مسیحا سکوزوگسّی نانّگا ڈونگشیسپوے جاستے کھیوجاگون خُدے نیامپو تھونڈیلّی نانّگا کھیونگا زادتے این۔ تینّابوے جاستے خُدے کھیوجاگون ہلژخمہ، ژانگما تانگ سکیونمید چوا زادتے، کھونگرانگی لدُونلا کھیونگا زادس۔
23اِین نانگ کھیوجاگون ای نانّگا ستانپو دُوگستے لدینبا اینکھانبو ایمان چوگوس۔ کھیوجاگونّی گاموےناتسُول تشورتے ایمان چوسکھانبوے کانے تھاگرینّگا ماچھاشیگ، یانگ تے گاموےناتسُولبو دُنیا گانگپوے نانّگا شادتے اینوگ۔ نگا، حضرت پولُس تے گاموےناتسُول شادچیسلا خُدے جابستوگپا لدامّا زادکھانبو این۔
عبادت خانہے پھیا حضرت پولُسی جابستوگ۔
24تا کھیوجاگونّی پھیا نگا ناگس تھونگکھانبوا تھادپو راگ، چیازیرنا مسیح کھونگرانگی سکوزوگس، عبادت خانہے پھیا ردوگنگال نامسکھانبوے نانّگا، نگیانگ کھاگنیناین اینوگ۔ 25خُدے کھیوجاگونلا کھونگرانگی لون گانگپو شادتے کھونگی عبادت خانہ گونلا جابستوگ چوچیسّی کھاگپو نگا کالا زادس۔ 26توسیونرینگ تانگ سنگونمے میرگیودگونّی کانے واستے بورّا زادکھانّی تے لونبو داگسا خُدے کھونگرانگی می ہلژخمہ گونلا سنگون چوگّا زادس۔ 27خُدے مسیح نور تانگ سپالبو کھیوجا یہُودی مانکھان گُونی پھیانگ اینکھانبو، کھونگرانگی میگونلا ہاگوچوگچیسلا تھوگستھادّانوگ۔ خُدے سانگوا نی، مسیحا کھیوجے نانّگا جُوگستے یودکھانبو این، تیبوے کھیوجاگونلا کھونگی سپالّی نانّگا تھوسچیسّی ریوابو تانّگانوگ۔
28خُدے نگاجا سالکھانّی شیسرابس تشانگما نیامپو سپانگپوداین یانگ لابجا تانگین، نگاجے مسیح سکورلا جانماگونلا شادّاد۔ خُدے لدُونلا تیگون مسیح نانّگا سامباچان ریگ گیورتے پھول تھوبچیسلا نگاجا دودّاراگ۔ 29تینّابویپھیا مسیح نگا سالّا زادکھانّی شید تانگ کھیود تشانگما نیامپو، نگے لاس ماثانٹے چواد۔
Currently Selected:
کولوسیپا 1: LBJNT
Highlight
Copy
Compare
Share
Want to have your highlights saved across all your devices? Sign up or sign in
Ladakhi Bible by The Love Fellowship is licensed under Creative Commons Attribution-ShareAlike 4.0 License.
