چھاگلاسگون 7

حضرت ستِفنُسی یہُودی پے ژوکسپے نانّگا رانگی گواہ تانگس۔

1تینے اِمامِ اعظمی حضرت ستِفنُس لا ٹیس، ” کھیرانگی کا کالکھانّی ای اُسکیونگون ٹانگپو اینّوگا؟“

2حضرت ستِفنُسی لانسالس، ”نگے فونو تانگ اُسکیونگ گُون نیونشیگ، نگاتانگی اتا اپو حضرت اِبراہیم حاران یولّا ناسّی سانگ سنگونلا مسوپتامیہ یود زانے کھونّگا شان چانّی خُدے جال۔ 3یانگ خُدے کھونّگا کا سالس، ’ کھیرانگی پھایول تانگ نیینگون بورتے نگے ستانچیسچانّی یولّا سونگ۔‘ #7‏:3 گوزوگ زیرکھانّی شوقبُوئ 12‏۔ 1 4حضرت اِبراہیم کالدیا یولنے بینگستے، حاران زیرسے یولّا ناستے دُوگس، یانگ کھونگی ابا ٹونگستے ستینگنے خُدے کھونگ کھیوجا دُوگستے یودکھانّی ای ساکیادپویکا کھیونگس۔“

5”خُدے نورسکال چانگ ماسالس، میٹار چیگی ساکیادّانگ۔ تیتوسلا حضرت اِبراہیمی ٹھوگو میدنانگ خُدے ای ساکیادپو کھونگ تانگ کھونگی اولاد گونلا تانگین مولتے حضرت اِبراہیمی وعدہ زادس۔ 6یانگ خُدے حضرت اِبراہیمی مولس، ’ کھیرانگی اولاد گون ژانیولجیگی نانّگا کھیامپو تسوگسلا دوگین۔ تے یولّی میگونّی کھونگون تشیوگ چوستے لو جیبگیا زامشیگ کھونگونلا ناگس ستانین۔ 7اِین نانگ خُدےکھیوجا تشییوگا بورکھانّی میرگیودگونلا چھادپا چادین، یانگ کھیرانگی اولاد گون تے یولنے بینگتے، کھونگونی ای یولّی نانّگا نگا چولین۔‘ #7‏:7 گوزوگ زیرکھانّی شوقبُوئ 15: 13‏، 14“

8”تیتوسلا خُدے حضرت اِبراہیم نیامپو لقپہ ہلژخمہ چوگوشیسّی وعدہ #7‏:8 خُدے وعدہ بو نی کالتیس حضرت اِبراہیم تانگ کھونگی اولاد تشانگما خُدے کاگیاگون نیانّا کھونگون خُدے میگون گیورین۔ کھونگونی لقپہ ہلژخمہ چوستے تے وعدہ بو ثونگچیسلا کھاچھامس۔ زادس۔ تینے حضرت اِبراہیم ابا گیورتے جاگ گیادپے جاگّا کھوے کھورانگی بُوژا حضرت اِضحاقؔ گا لقپہ ہلژخمہ چوچوگس۔ تینّا لوبسپو حضرت اِضحاقؔ حضرت یعقُوبؔ ی ابا گیور زانے، یانگ حضرت یعقُوبؔ نگاتانگی اتا اپو چوگنییسپے ابا گیور زان یانگ، چوس۔“

9”حضرت یعقُوبؔ ی جان ٹھوگوگون حضرت یُوسفؔ بیکاتشیگس پاسانگ، کھونگونی نو حضرت یُوسفؔ مصر پا ریگّا ت شینا گی پھیا تسونگس، اِین نانگ خُدے حضرت یُوسفؔ نیامپو یودپین۔ 10خُدے حضرت یُوسفؔ ردوگنگال تشانگمانے سکیوبستے بورّا زادس۔ خُدے کھوا مصری گیالپو فرِعونؔ نی چھوگسّکیور تھوب چوگّا زادس، یانگ شیسرابس سالّا زادچیسپوے کھو تے یول تانگ کھار گانگپویکا وانگثولپا سکوس۔“

11”تینے مصر تانگ کنعان یول گانگپوے نانّگا موگے جُونگستے ما ردوگنگال چھینمو تھونگ۔ نگاتانگی اتا اپو گونلانگ زاگیو سکونمو سونگپین۔ 12حضرت یعقُوبؔ ا مصر یولّی نانّگا ڈوناس یودکھانبو تشورتے، کھوے نگاتانگی اتا اپو گون مصری یولّا کالس، تیرو کھونگون گومارانگ سونگتے اینپین۔ 13لان نیسپا یونگ زانے حضرت یُوسفؔ بی کھورانگی فونو نو گونلا کھو سو اینکھانبو شادس، یانگ مصری گیالپو فرِعونؔ نانگ حضرت یُوسفؔ بی نانگتشانگسّی سکورلا گیُوس سانگ۔ 14تے ستینگنے حضرت یُوسفؔ بی رانگی ابا حضرت یعقُوبؔ تانگ کھونگی نانگمی 75 تشانگما مصر لا بودتے کھیونگس۔ 15حضرت یعقُوبؔ مصر یولّا سونگ یانگ تیرو کھونگ تانگ نگاتانگی اتا اپو تشانگما ڈونگس۔ 16کھونگونی جنازہ گون شیکیمّا کھیرتے قبرستانی نانّگا بورس، کا ساکیادپو حضرت اِبراہیم شیکیمپا ہامورّی بُوژا گُونی کانے نیوستے اینپین۔

17خُدے حضرت اِبراہیمی وعدہ زادکھانبوے توس ڈانڈا چھاچیس نیمو لیبّاچیگ، مصری نانّگا نگاتانگی میگون مانگپو پھیلتے یودپین۔ 18تینے مصری نانّگا گیالپو سوما بینگکھانبوا حضرت یُوسفؔ بی چوسکھانّی سکورلا چانگ رگیُوس میدپین۔ 19تے گیالپوبوے نگاتانگی اتا اپو گون نیامپو سکیون کولتے کھونگونلا ناگس ثانٹے ستانس، سپیرنا پھاماگونلا وانگ کولتے کھونگی ٹھوگو سکییسکھانگون شیچیسلا پھانگچوگس۔

20تینّا توسلا حضرت مُوسیٰؔ سکییس یانگ کھو نیامپو خُدے تھوگنییسّا زادس۔ لزاوا سوم تشوگپا کھوا کھورانگی پھامے ستاستوگ چوس۔ 21یانگ کھوے پھاما کھو کھانگپانے پھیلوگا بورگوسّاچیگ، مصری گیالپو فرِعونؔ نی بوموے کھو سوسبوا لینتے رانگی ٹھوگو تشوگسلا ثالتے بورس۔ 22حضرت مُوسیٰؔ سی مصر پے شیسرابس تشانگما لوبستے کھو سپیرا تانگ لاسّی نانّگا کھاسپا گیور۔“

23”لو ژیبچو چھاچیگ حضرت مُوسیٰؔ سی کھورانگی فونو بنی اِسرائیل پاگونلا تُھوگچیس تھاگچادس۔ 24تینے بنی اِسرائیل پاجیگیکا میوسپْا چھا تھونگپا کھو سکیوبالا سونگ، یانگ تیبوا لانتانگستے کھوے مصر پابو سادّانگس۔ 25حضرت مُوسیٰؔ سی، خُدے کھو گیُودتے بنی اِسرائیلی فونو تشانگما مصر پے نگایوگنے پھودچیسپو کھوے میگونّی ہاگوین سامّادپین، اِین نانگ کھونگونلا ہاماگو۔“

26”تھوریزوگپو حضرت مُوسیٰؔ سی بنی اِسرائیل پا نیس نولین تھونگتے کھونگونلا تھونچوگچیسّی سونڈوس چوین زیرس، کھیوجا فونو اینوگ، چیا چیگ تانگ چیگ نولّاد۔“

27”اینّانگ تے میوسپْا چوکھان می بوے حضرت مُوسیٰؔ انگوا ریلتانگستے زیرس، ’ کھیرانگ سوی نگاجیکا وانگثولپا تانگ شخ چوکان گونلا سکوس؟ 28تانگ تے مصر پابو سادّا تسوگسلا کھیرانگی نگانگ ساداینّا؟‘#7‏:28 مصر نے شورکھانّی شوقبُوئ 2‏۔ 14 29تیزوگ تشورّاچیگ حضرت مُوسیٰؔ میدییان زیرسے یولّا شورتے سونگ، یانگ تیرو کھیامپوجیگی تشولّا دُوگستے بُوژا نییسّی ابا گیور۔“

30”لو ژیبچوی ستینگنے، سینی ری نیمو یودکھانّی ریستونگجیگی نانّگا، بورتسے میے بارکھانجیگی نانگنے خُدے فرشتاجیگ کھونّگا جال۔ 31تیبو تھونگتے حضرت مُوسیٰؔ ہالاس، یانگ تے میبوا ستالا نیموا سونگپا کھوا تے بورتسے نانگنے مسیح خُدے سکاد تشور، 32’نگا نی کھیرانگی اتا اپو گونّی خُدے، حضرت اِبراہیم، حضرت اِضحاقؔ تانگ حضرت یعقُوبؔ ی خُدے این‘ #7‏:32 مصر نے شورکھانّی شوقبُوئ 3‏۔ 6 مولکھانبو تشورپا حضرت مُوسیٰؔ جیگستے دار، یانگ کھونّگا ستا ماکھیود۔“

33”تینے مسیح خُدے حضرت مُوسیٰؔ مولس، ’ کھیرانگی پابُو پھود چیازیرنا کھیرانگ لانگستے یودکھانّی ساکیادپو ہلژخمہ این۔ 34نگا مصر یولّا یودکھانّی نگے میگونّی ردوگنگال باردوگون تھونگ، یانگ نیانگانّی کوچوگون تشورپا نگا کھونگون تھارچوگچیسلا بابستے یونگستے این۔ تا سونگ، کھیرانگ نگے مصر لا لوگستے کالّاد‘۔“ #7‏:34 مصر نے شورکھانّی شوقبُوئ 3‏۔ 5، 7، 8، 10

35”یبو تینّا حضرت مُوسیٰؔ اینپین کا بو بنی اِسرائیل پاگونّی پھانگستے زیرس، ’کھیورانّگا سوی نگاجیکا وانگثولپا تانگ شخ چوکان گونلا سکوس؟‘ تینّا موزیسپوا بورتسے میے بارکھانّی ٹونے سنگونکھانّی فرشتا گیُودتے خُدے وانگثولپا تانگ تھارچوگکھانلا سکوا زادس۔ 36کھوے بنی اِسرائیل پا تشانگما مصر نے پھیلوگا پھینگستے کھیرس، یانگ معجزہ ستاگس گُون مصر، گیاتشو مارپو تانگ ریستونگی نانّگا لو ژیبچو ستانّا زادس۔“

37اِبو تینّا حضرت مُوسیٰؔ اینوگ، کابوے بنی اِسرائیل پاگونلا مولس، ”خُدے کھیوجا فونو گونّی ٹونے نگا تسوگسّی پیغمبر جیک پھینّگا زادِین۔“#7‏:37 شریعتی شوقبُو نیسپے 18‏۔ 15 38کھونگ ریستونگی نانّگا نگاتانگی اتا اپو گون نیامپو یودپین۔نام کھونّگا سینی ری کا فرشتے سپیرا سالس، یانگ تیرو حضرت مُوسیٰؔ نگاتانگ تشانگمالا تانگچیسّی پھیا سروک سالکھانّی کاگون تھوب۔

39اینّانگ نگاتانگی اتا اپو گون حضرت مُوسیٰؔ سی کھانیانچیسلا ماتھاد۔ کھونگونلا حضرت مُوسیٰؔ پھانگستے مصر یولّا لوگستے چھاچیسّی دودپا سکییس۔ 40کھونگونی حضرت ہارُونلا زیرس، ” کھیرانگی نگاجا لامستانکھانّی سکونڈاگون چوس چیازیرنا مصر یولنے پھینگستے کھیونگکھانّی حضرت مُوسیٰؔ چی سونگ نگاجا گیوسمید۔“ #7‏:40 مصر نے شورکھانّی شوقبُوئ 32‏۔ 1 41تیتوسلا کھونگونی لانگتوے زوگسپو تسوگسّی سکونڈاجیگ چوستے چھودپا پھولس یانگ رانگی لاگپانے چوسکھانّی سکونڈا ستودپا پھولین گامو چوس۔ 42اِین نانگ خُدے کھونگونلا گیاب گیورّا زادتے، نامکھے سکارماگونلا چولچیسلا پھود سالس، کازوگ پیغمبر گونّی شوقبُوئ نانّگا ڈِیازادتے اینوگ،

”کھیوجا بنی اِسرائیل پاگون ریستونّگا لو ژیبچو یودی توسلا

چی کھیوجے نگا ثوگی چھودپا تانگ بولّدوس گُون پھولپینّا؟

43اِین نانگ کھیوجے مولوگّا چولسے کور تانگ،

ریپھان زیرکھانّی سکارمے سکونڈا نیسکو کھورتے کھیرّادپین،

کھیوجے چوسکھانّی سکونڈاگونلا چولس۔

تیبویپھیا نگے کھیوجا کھیوجارانگی یولنے، بابلی سانگ تھاگرینّگا کھیامس چُوگین۔“ #7‏:43 اموسّی شوقبُوئ 5: 25

44”ریستونگی نانّگا نگاتانگی اتا اپو گونلا خُدے وعدہ ڈیسکھان بورکھانّی کوربو نیامپو یودپین۔ یانگ تے کوربو خُدے حضرت مُوسیٰؔ ستانّا زادکھانّی سپے نانگجین چوستے اینپین۔ 45تے ستینگنے نگاتانگی اتا اپو گونّی تے کوربو کھورتے حضرت یوشعی وانگی یوگا ای ساکیادپویکا کھیرس، کابوے یول میگون نگاتانگی اتا اپو گونّی پھیا خُدے پھینّگا زادس۔ یانگ تے کوربو گیالپو داؤد ّی توس تشوگپا ای ناسّیکا لوس۔“

46”خُدے چھوگسّکیور زادکھان حضرت یعقُوبؔ ی چولکھانّی خُدے خیمہ گاہ جیگ سیگچوگّا زادچیسلا جُووا پھولس۔ 47اِین نانگ داؤد ّی بُوژا حضرت سُلیمان لا تیبو سیگچیسّی گونگسپا تھوب۔ 48اِین نانگ ، کھیود چان خُدے نی میی لاگپانے سیگسکھانّی ناسّے نانّگا جوگسا مانوگ، کازوگ خُدے پیغمبر گیُودتے مولس“،

49نامکھا نی نگے جُوگسٹھیس این

یانگ دُنیا نی نگے کانگپا بورسا۔

کھیرانگی نگے پھیا کازوگ کھانگپاجیگ رسیگین؟

یا نگا آرام چوسے ناسّا کارُو یونگین؟

50چیتشانگما نگے لاگپانے چوسکھان مانوگا؟#7‏:50 حضرت یسعیاہ شوقبُوئ 66‏۔ 2

51”کھیوجا سکیونگپو ڈیدڈید، ایمان میدکھانّی سنینگ، یانگ خُدے حُکم نیانچیسّی نانّگا رگودگون، کھیوجے اتا اپو گون تسوگسلا کھیرانگونّیانگ ہلژخمہ رُوح لا توسگیون گیابگال چوانوگ۔ 52کھیوجے اتا اپو گونّی ناگس ماستانکھانّی پیغمبر جیک سو یود۔ تیگونّی ٹانگپو سکیودچیسچانّی سکورلا شادکھانّی پیغمبر گونّانگ سادتے اینپین، کھیوجے تے ٹانگپو میبو ڈاو لاگا ستادتے سادچوگس۔ 53خُدے فرشتاگون گیُودتے تھوبکھانّی شریعت گونلا کھیوجے ماثونگس۔“

حضرت ستِفنُس سادس۔

54تے سپیراگون تشورّاچیگ یہُودی پے ژوکسپے تھوسمی تشانگمالا ثو ثانٹے یونگستے سو ثیگس۔ 55اِین نانگ ہلژخمہ رُوح بوے گنگستے حضرت ستِفنُسی نامکھا زیگسپا، کھوا خُدے شان تانگ کھونگی سیواچانّی چھاگ یاسپے چھوگسلا حضرت عیسیٰ سی جانگستے جال۔ 56کھوے زیرس، ”ستوسشیگّانگ؛ نامکھا بیتے نگا اِبنِ آدم خُدے چھاگ یاسپے چھوگسلا جانگستے جالدوگ۔“

57تینے کھونگونی نامچھوگ کابستے کُوچو ثانٹے تانگین حضرت ستِفنُس چھوگسلا گیوگس۔ 58کھوا ٹُودین گیالسانے پھیلوگا پھینگستے سادّالا ردوا گیابچیس گوزوگ، یانگ حضرت ستِفنُس لا سکیون کالکھانگونّی رانگی کوسگون پھودتے ساؤل زیرکھانّی کھیوگتونگبوے لدُونلا بورس۔

59ردوا گیابین یود زانے حضرت ستِفنُسی، ”کیے حضرت عیسیٰ مسیح نگے سیمسنیدپو نامسّا زاد“ زیرین دُعا جوس۔ 60تینے کھو پِیکمویکا گییلتے سکاد چھینمو نیامپو، ”کیے مسیح، کھونگونی گیابگالّا ای دِیگپابو ایدتو بورّا مازاد“ مولتے کھو ڈونگس۔

Currently Selected:

چھاگلاسگون 7: LBJNT

Highlight

Copy