چھاگلاسگون 27

حضرت پولُس رومّا کھیرس۔

1نگاجا گُون ٹُھوزینگی نانّگا اٹلی یولّا کالچیس تھاگچادّاچیگ، کالونّی حضرت پولُس تانگ جان تسونپا کھاچیگ ماگیے سپونبو یولیوس زیرکھانّی لاگا ستادس، کھو رومی گیالپوے میگسالّی ماگمیی نانگنے اینپین۔ 2نگاجا گُون اڈامیدیمنے لیبکھانّی ٹُھوزینگجیگّا ژونتے سونگپین، کا بو آسیہ یولجونگسّی تشوے تھاما یودکھانّی ناسّاگون گیُودتے چھاچیس اینپین، یانگ مکدنیہ یولجونگسّی تھسلُنیکے گیالسانے اینکھانّی ارِسترخُس نگاجا نیامپو یودپین۔

3ستینگماجاگپو صیدا گیالسا لیبّاچیگ، گھوسدومگون تھوبچیسّی پھیا یولیوسّی شزدے چوستے حضرت پولُس لا کھونگی دزاوگون نیامپو تھوگچیسلا گونگسپا تانگس۔ 4تیکانے نگاجا گُون ٹُھوزینگا جونس یانگ لونگسپو نگاجا چھین یودسے گولوگپوا یونگسپا، نگاجا لونگسپو میدسا کُپُرؔس تشولینگ، یوما چھوگسلا بورتے سونگپین۔ 5تینے نگاجا گُون کِلِکیہ تانگ پمفیلیہ نیموا یودکھانّی گیاتشو گیُودتے لیگیا یولجونگسّی میرا گیالسا بابسپین۔ 6تیرو ماگیے سپونبوا اسکندریہ گیالسانے اینکھانّی ٹُھوزینگ، اٹلی یولّا چھاکھانجیگ تھوبپا نگاجا گُون تیبوے نانّگا سکیونس۔

7نگاجا یودکھانّی ٹُھوزینگ، جاگ مانگپو کولیا مانے ثول مانیان، یانگ کاگسپو نیامپو نگاجا کنیدوس گیالسا لیب۔ لونگراگ یودچیسپوے، نگاجا چھین یودکھانّی لامیکا چھا مانیانپا، نگاجا گُون سالمونے چھوگسنے لونگسپو گھاگچیسلا کریتے تشولینگ یاسپا چھوگسلا بورتے سونگپین۔ 8یانگ گیاتشوے تھاما تھامانے ما کاگسپو نیامپو نگاجا گُون جیگسپا مید زیرکھانّی ناسّا لیب، کا بو لاسیا گیالسے نیموا یودپین۔

9تیرو لیبچیسلا ما جاگ مانگپو گور، یانگ نامزا سوگپو لوسشیسّی توسپو لیبپا گیاتشوے نانّگا ٹُھوزینگ ثولچیسپو ما جیگسپاچان گیورّادپین۔ حضرت پولُسی کھونگونلا کھادا سالین مولس، 10” فونو گون نگے سامبے نانّگا نگاتانگونّی سفر پو ما جیگسنانگچان گیورچیسدوگ سامّاراگ، نور تانگ ٹُھوزینگی کودکھا ماتشاد نگاتانگونّی ثوگّانگ سکیالچیسّی جیگسپا دوگ۔“ 11اِین نانگ ماگیے سپونبوے، حضرت پولُسی مولکھانّی سانگ ٹُھوزینگ ثولکھانّی سپونبو تانگ ٹُھوزینگی داگپوے زیرکھانبوا نیانچیس سامباچان تشور۔ 12تے ناسّابو گُونلا دوگچیسّی پھیا گیالّا مانپا، می مانگچھیابوے پھونیگسّی گیالسا لیبچیسّی ریوا بورتے چھاچیسلا تھاگچادس۔ پھونیگس کریتے تشولینگی ٹُھوزینگ بورسے ناسّا، کا بو لونوب تانگ چانگنوب چیگپونے گیاتشوے چھوگسلا بیتے یودچیسپوے لونگسپو ثانٹے یونّگا میدپین۔

گیاتشوے نانّگا لونگراگ تانگ چھولباگ۔

13لو چھوگسنے لونگسپو جامپو یونگچیس گوزوگ چھاچیگ، ٹُھوزینگ ثولکھانگونّی پھونیگسلا کھامزانگ لیبچیس سونگ سامستے کھونگونی ٹُھوزینگبو ٹولتے کریتے تھامانے ثولتے کھیرس۔ 14بینگتے توس مانگپوجیگ ماچھا کریتے چھوگسنے لونگراگ ٹاگپو یونگس، کابوا چانگشارّی لونگسپو زیرّادپین۔ 15لونگراگ ٹاگپوے جاستے ٹُھوزینگبو پھونیگسّی چھوگسلا کھیر مانیانپا، کھونگونی ٹُھوزینگبو لونگسپوے کھیرس ا چھوگسلا پھودتانگس۔ 16کودا تشولینگی لونگسپو میدسا چھوگسنے نگاجا گُون چھا زانے، سروک سکیوبّی ٹُھوزینگ چھونگونبو نگاجا ما کاگسپو نیامپو سکیوبنیانتے ٹُھوزینگ چھینمویکا ستاگس۔ 17تینے ٹُھوزینگ چھینموبو چھاگچیسنے سکیوبچیسلا کھونگونی ستاگنے یوگ تشوگپا تھاگپا نیامپو لدامس، یانگ ٹُھوزینگبو سیرتیسّی ناسّے کھورلا پیمے نانّگا نیرچیسّی جیگسپا یودپا کھونگونی ٹُھوزینگ کولیا ڈولچوگکھانّی یولابو چھوی نانّگا پھابس، یانگ لونگسپوے ٹُھوزینگبو ثولتے کھیرس۔

18لونگراگ تانگ چھولباگ ثانٹے ٹُھوزینگبوا پھوگسپا، ستینگماجاگپو ٹُھوزینگ یانگمو چوچیسلا کھونگونی تینانّگا یودکھانّی چالاگّون چھوی نانّگا پھانگچیس گوزوگس۔ 19جاگ سومپے جاگّا ٹُھوزینگ ثولکھانگونّی ٹُھوزینگی لاگچھا تشانگمانگ پھانگس۔ 20گیاتشوے نانّگا لونگراگ تانگ چھولباگ ماچادّا جاگ مانگپو نییما یا سکارما ماتھونگ پاسانگ، نگاجا تھارچیسّی ریوا مالوس۔

21میگونّی زان مازا جاگ مانگپو سونگپا، حضرت پولُس کھونگونی ٹوا لانگستے مولس، ” فونو گون، کالتیس کھیوجاگونّی نگے زیرکھانبوا نیانتے کریتے نے ما بینگپینّا ایتسوگسّی نودسکیال تانگ کودکھا سونگتے میدڈو۔ 22اِین نانگ نگے کھیوجاگونلا تارُوانگ ریوا ستانپو بورچیسلا زیرّاد، چیازیرنا کھیوجے ٹونے سوانگ میشی، ٹُھوزینگ چیگپو ٹھیسّتور چھین۔ 23نگے جابستوگ جوکھان خُدے حُکم بوے نگا این، کھونگی فرشتا، تانگ ژانلا نگا یودسا سکیودتے 24مولس، لے پولُس جیگس ماجیگس، کھیرانگ رومی گیالپوے لدُونلا شاگس چادّی پھیا تانتان لیبین، یانگ لتوس خُدے کھیرانگ نیامپو ٹُھوزینگی نانّگا یودکھان تشانگماں سکیوبین۔ 25تینے ٹوپاگون ریوا تھونپو بور، نگے ایمان چواد خُدے مولکھانبو ڈانڈا ڈوبین۔ 26اِین نانگ نگاتانگی ٹُھوزینگ تشولینگ جیگی نیموا تانتان کھادین۔“

ٹُھوزینگ چھاگس۔

27تشان 14 جاگّا نگاجا گُون اڈییا گیاتشوے چھوگسلا لونگسپوے ریلتے کھیر زانے تشانپھید زودچیگّا ٹُھوزینگ ثولکھانگونّی ساکیادّی نیموا لیبتیراگ زیرین تشور۔ 28تینے کھونگونی چھو تسامشیگ کونڈو دوگ تابسپا، میٹار 37 بینگ، یانگ تساپیگجیگ ستینگنے تابسپا، تشادپو میٹار 28 بینگ۔ 29ٹُھوزینگبو ڈاگّا پھوگچیسّی جیگسپے نانّگا کھونگونی ٹُھوزینگ گھاگچیسّی پھیا ٹُھوزینگی جوگنے لچینتے لچاگس تاگسکھانّی تھاگپا ژی چھوی نانّگا پھابس، یانگ ناملانگشیسّی پھیا دُعا جوس۔

30تینے ٹُھوزینگ ثولکھانگونّی ٹُھوزینگی گونّے لچینتے لچاگس تاگسکھانّی تھاگپا پھابسزون تانگستے شورچیسّی پھیا ٹُھوزینگ چھونگونبو پھابس۔ 31حضرت پولُسی ماگیے سپونبو تانگ ماگمی گُونلا مولس، ”کالتیس ای میگون ٹُھوزینگی نانّگا مادوگنا کھیوجے سروک میتھار۔“ 32تینے ماگمیگونّی ٹُھوزینگ چھونگون چینگستے یودکھانّی تھاگپا چادتے گیاتشوے نانّگا بودچوگس۔

33ناملانگسّاچیگ حضرت پولُسی میگونلا کھارجی زاچوگچیسلا سونڈوس چوین مولس، کھیوجے جاگ چوبژینے پھارلا جیگسپا تانگ تھےژومسّی نانّگا کھارجیا لاگپا ماسیس۔ 34جوجو نگے کھیوجاگونلا سونتیا لوسشیسّی پھیا کھارجی زاچیسلا جُووا پھولّاد۔ کھیوجا چیگیانگ گوی ثانیاگ چیگ می ستور۔ 35تیبو مولتے ستینگنے کھونگی تاگیجیگ لینتے کھونگ تشانگمے لدُونلا خُدا شُکر پھولتے چاگستے زوس۔ 36تینے تشانگمالا ہامپا سکیستے زان زوس۔ 37ٹُھوزینگی نانّگا یودکھانگونّی ٹانگسکا 276 یودپین۔ 38کھونگون زان زوستے ڈانگسّاچیگ، ٹُھوزینگ یانگمو چھاچیسّی پھیا کھونگونی ٹُھوزینگی نانّگا یودکھانّی ٹوناس تشانگما چھوی نانّگا پھانگس۔

39ناملانگسّاچیگ گیاتشوے تھامے ساکیادجیگ تھونگ، اِین نانگ کاناسّا این نُگو ماشیس۔ کالتیس نیانّا ٹُھوزینگ تے ساکیادّی نییموے پیمے نانّگا کھادچوگچیسلا کھونگونی تھاگچادس۔ 40کھونگونی لچینتے لچاگس تاگسکھانّی تھاگپاگون چادتے گیاتشوے نانّگا پھانگس، تینّا توسلا ٹُھوزینگ کیوگچیسّی شینّگا لدامسکھانّی تھاگپاگون ٹولس، تینے ٹُھوزینگی دونّی یولابو ستاگس تے لونگسپوا ٹُھوزینگبو تھاما چھوگسلا کھیرچوگس۔ 41اِین نانگ سامکھانّی سانگ سنگونلا ٹُھوزینگی دُونبو پیمے نانّگا کھاد، یانگ گیابّو چھولباگ شیدچانّی جاستے چھاگچیس گوزوگ۔

42تسونپاگون چھوا سکیالتے شورتے میچھاچیسّی پھیا ماگمیگونّی کھونگون سادچیسّی تھابسلدینّگادپین۔ 43اِین نانگ ماگیے سپونبوا حضرت پولُس سکیوبچیسّی دودپا یودپا، کھونگونلا تے تھابسلدینگس نانگجین چو ماچوگس۔ کھوے کا تانگس، گوما سکیالنیانکھانگون ساکیادّیکا چھاچیسلا چھوی نانّگا چھوم، 44یانگ لوسکھانگونّی سپانگلیب تانگ ٹُھوزینگ چھاگکھانّی شینگّونّی روگس لینس۔ تیزوگ چوس پاسانگ تشانگما سا سکامپویکا کھامزانگ بینگنیان۔

Currently Selected:

چھاگلاسگون 27: LBJNT

Highlight

Copy