چھاگلاسگون 24

حضرت پولُس تانگ کالون فیلِکس۔

1جاگپو ثن٘ے ستینگنے اِمامِ اعظمی حننیاہ، اُسکیونگ کھاچیگ تانگ تِرطُلُس زیرکھانّی واکیل نیامپو کالون فیلِکسیکا حضرت پولُسی گیابگالّا نیادگال کالکھانگون شادّا یونگس۔

2حضرت پولُس کھیونّگاچیگ، واکیل تِرطُلُسی حضرت پولُسی کا نیادکالین زیرس، کیے سپونبو فیلِکس نیرانگی وانگی یوگا، نگاجے توس رینگموجیگ جیدے نیونگس، یانگ نیرانگی شیسرابس گیُودتے ای یولّی نانّگا پھانتھوگسچانّی گیورجا مانگپو کھیونگس۔ 3سپونبو فیلِکس، تے تشانگمے پھیا نگاجے نیرانّگا شُکر جُواد۔ 4اِین نانگ نیرانگی توس رینچانبو گودلا ماتانّگا نگاجے دورلدوستے شادچیسچانبو سانّا زاد۔ 5نگاجا ای میبو پھاسادپھینگکھانجیگ اینکھان گیوسّونگ، کھوے دُنیا گانگپوے نانّگا یہُودی پاگونّی ٹوا ہیلینگس پھینگین دوگدوگ، یانگ کھو ناصرة پے یامتشان سدیجیگی گاُسکیونگ اینوگ۔ 6نگاجے بیت المقدِس سانگ تشیتو چوچیسّی سونڈوس چوسپا نگاجے کھو زومسپین۔ 7‏-8کالتیس نیرانگی کھوا سارچود تانگنا نگاجے کھویکا کالکھانّی سکیون تشانگما تانتان اینکھانبو گیوسچھین۔ 9یہُودی پاگونّیانگ چیگ سونگتے تِرطُلُسی سکیون کالکھان تشانگما لدینبا اینوگ زیرس۔

10کالونّی حضرت پولُس لا زیرچیسلا ردوا تانّگاچیگ، کھونگی لانتانگین مولس، ”لو مانگپوجیگنے نیرانگ ای گیالکھاگّی ٹھیمسپون اینکھانبو نگا گیوسیودپا نگے نگارانگ نونگسمید اینکھانّی سکور نیرانگی لدُونلا شادّا تھادّاراگ۔ 11جاگ چوگنییسّی سنگونلا، نگا یروشالیمّی بیت المقدِس لا خُدا چولّا سونگکھانبو نیرانگی لامو نیامپو گیوسچونیانچیس اینوگ، 12ماتشاد نگے نیادگالپاگونّی نگا بیت المقدِس سی نانّگا سوجیگ نیامپو دزینگمو تانگین یا مجلِس گُون یا گیالسے نانّگا میتشوگسّی ٹوا ہیلینگس پھینگین ماتھوبّا اینوگ۔ 13کھونگونی نگیکا کالکھانّی نیادگالگون لدینبا این زیرتے نیرانّگا ستان میتھوب۔“

14”اینّانگ نگے مسیح لامیکا ڈولتے نگاجے اتا اپو گونّی خُدا چولکھانبو لدینبا این کابوا کھونگونی یامتشان سدے زیردوگ، یانگ پیغمبر تانگ شریعتی سپیچھاگونّی نانّگا ڈِیستے یودکھان تشانگمیکا نگے ایمان چواد۔ 15کھونگونی نانّگا، خُدے می ٹانگپو تانگ نگانپا نیسکو سونتیا لانّگا زادچیسّی ریوا یودکھانبو نگے نانّگانگ یود۔ 16تیبویپھیا نگے میتشانگما تانگ خُدے سکوندونلا نگارانگی سیمس لاگمو بورچیسّی سونڈوس چواد۔“

17”لو مانگپوجیگی ستینگنے، نگا نگے یولپا نیالباچانگونلا روگسّی پینے کھیونگچیس تانگ خُدا چھودپاگون پھولچیسلا یروشالیمّا لوگستے یونگسپین۔ 18کھونگونی نگا بیت المقدِس سی نانّگا تھونگ زانے نگا نگاجے شریعتی شریعت نانگجینلا ژانگما سونگتے اینپین، یانگ نگے نگیکھورلا میتشوگس یا ہیلینگس میدپین۔ 19اِین نانگ تیرو آسیہ پے یہُودی پا کھاچیگ دوگپین، کالتیس نگے گیابگالّا زیرچیس یودنا، تینے کھونگون نیرانگی لدُونلا نگا سکیون کالا یونگّوس۔ 20ایکا یودکھانگونّی، نگا یہُودی پے ژوکسپے لدُونلا یود زانے کھونگونلا نگیکا سکیون تھوبکھانگون شادگوس۔ 21’نگے شیکھانگون سونتیا لانگچیسپویکا ایمان چوسپا، دیرینگ نگیکا شاگس تانّگادا‘ زیرتے کُوچو تانگسچیسپو چیگپو نی، نگے سکیون اینپین۔“

22تینے مسیح لامیکا ڈولکھانگونّی سکورلا گیالّا گیوسیودکھانّی فیلِکسّی، ”ماگستونگی سپونبو لُوسیاس لیبّاچیگ، کھیرانگی شاگسپوا تھاگچاد تانگین“ زیرتے میتشوگس شولچوگس۔ 23کھوے ماگیے سپونبوا، حضرت پولُس لا ثونگکھان بور اِین نانگ کھارّی نانگ ڈولچیسّی رانگوانگ تونگ یانگ کھونگی ٹوپاگونلا کھونگی گھوسدوم کھیونگچیسلا گھاگ ماگوس زیرتے کا تانگس۔

24جاگ کھاچیگی ستینگنے، فیلِکس رانگی ناما ڈوسیلّا نیامپو یونگس، کھو یہُودی ماجیگ اینپین۔ فیلِکسّی حضرت پولُس لا بودکھان تانگستے حضرت عیسیٰ مسیح نانّگا ایمانی سکورلا حضرت پولُسی کانے نیانس۔ 25حضرت پولُسی لاس ٹانگپو چوچیس، رانگسیمس چونچیس تانگ یونگچیسچانّی خُدے ٹھیمسچادّی سکورلا شادّا زادپا، فیلِکس جیگستے زیرس، ”تا ڈوگ، کھیرانگ سونگ، یانگ جاگشیگ نگا لونگ یود زانے نگے بودین۔“ 26حضرت پولُسی چھوگسنے پھاگسوبّی پینے تھوبچیسّی ریوا چوسپا کھوے حضرت پولُس لا سپیرا تانگچیسلا لان مانگپو بودس۔

27لو نییسّی ستینگنے، فیلِکسّی تشابسلا، فیستُس پورکیوس زیرکھانّی میجیگ کالونلا سکوس۔ فیلِکس لا یہُودی پاگونّی چھوگسّکیور گوس پاسانگ کھوے حضرت پولُس تسونکھانگی نانّگا بورس۔

Currently Selected:

چھاگلاسگون 24: LBJNT

Highlight

Copy