چھاگلاسگون 16

حضرت پولُس تانگ سیلاس لا تِیمُتھیُس تھوگ۔

1حضرت پولُس تانگ سیلاس دِربے ستینگنے لُسترا سکیودس، تیرو تِیمُتھیُس زیرکھانّی لوبٹوگسجیگ دوگادپین۔ کھوے اما یہُودی پا ایمان چانجیگ یانگ ابا یُونانی اینپین۔ 2لُسترا تانگ اِکُنیُمامی نانّگا یودکھان ایمان چانگونّی تِیمُتھیُس سچودلامگونلا ستودّادپین۔ 3حضرت پولُس لا تِیمُتھیُس کھونگ نیامپو کھیرچیسلا دودپا یودپا، کھونگی تِیمُتھیُس لا لقپہ ہلژخمہ#16‏:3 بوتشے شے کانے پاگسپا چادتے ستاگس چوچیسپوا لقپہ ہلژخمہ زیرّانوگ۔ چوچوگس، چیازیرنا تے یولّی نیکھورلا یودکھانّی یہُودی پاگونلا کھوے ابا یُونانی اینکھانبو گیوسیودپین۔ 4کھونگون ڈونگکھیر چیگنے چیگّا سکیود زانے، تے یولّی ایمان چانگونلا یروشالیمّی نانّگا یودکھانّی رسُول تانگ اُسکیونگ گُونی تھاگچادکھانگون سیلتے شادین، یانگ تیگون کھانیانچیسلا سپوسپا سالین سکیودس۔ 5تیزوگ زادچیسپوے عبادت خانہ گون ایمانی نانّگا ستانپو سونگ یانگ ایمان چانگونّی ٹانگسکا جاگدانگ گیاسین سونگ۔

حضرت پولُس لا ژالزیگس تھونگ۔

6حضرت پولُس تانگ کھونگی ٹوپاگونلا ہلژخمہ رُوح یَ آسیہ نانّگا چھوسشادچیسنے گھاگّا زادسپا کھونگون پمفیلیہ تانگ گلَتیہ نا فروگیہ سکیودس۔ 7کھونگون میسیا یولّی سانتشامسلا لیبّاچیگ، کھونگونی بتُھنیہ نانّگا سکیودچیس چوس اِین نانگ حضرت عیسیٰ سی رُوح بوے کھونگون تیرو سکیود ماچوگس۔ 8تیبویپھیا کھونگون میسیا یول گیُودتے تروآس گیالسا سکیودس۔

9تینّا ژانلا ژالزیگسشیگی نانّگا حضرت پولُس لا مکدنیہ پاجیگ کھونگی لدُونلا لانگستے، ”جوجو مکدنیہ سکیودتے نگاجا روگس زاد“ زیرین جُووا پھولّا تھونگ۔ 10حضرت پولُسی ژالزیگسپو زیگستے ستینگنے تینّامالّا نگاجے مکدنیہ چھاچیسّی ڈال چوس، چیازیرنا خُدے نگاجا، کھونگونلا گاموےناتسُول شادچیسلا بودّا زادکھانبو ہاگو۔

فِلپّی پا لیدییے ایمان کھیونگس۔

11تروآسنے نگاجا گُون ٹُھوزینگا ژونتے سوموٹاکیا لیب، یانگ ستینگماجاگپوا نیی اُپلّوؔس لا لیب۔ 12تیکانے نگاجا گُون مکدنیہ یولجونگسّی گیالسا ما کھاگچان فِلپّیا سونگپین، کابوے نانّگا رومپا مانگپوجیگ دوگادپین۔ تیرو نگاجا گُون جاگبانشیگ دوگسپین۔

13شابّادّی آرام چوچیسی جاگّا دُعا چوسے ناسّاجیگ تھوبین سامتے نگاجا گُون گیالسے گھونے بینگستے لژانگسپو چھوگسلا سونگپین۔ تیرو دزومستے یودکھانّی بوموگون یودسا دُوگستے کھونگون نیامپو سپیرا تانگسپین۔ 14سپیرا نیانکھانگونّی ٹوا لیدیا زیرکھان بوموجیگ دوگپین، کھو تھواتِیرہ گیالسانے گیالپوے کوسلاگ جوگس راس رینچانّی تشونگ چوکھان تانگ خُدا چولکھانجیگ اینپین۔ مسیح، کھوے سیمس حضرت پولُسی مولکھانگونلا ایمان کھیونگچیسّی پھیا پھیازادس۔ 15کھو تانگ کھوے نانگمی گُونی غوتا لینس یانگ کھوے نگاجا جُووا پھولس، ”کالتیس نیجے نگا حضرت عیسیٰ مسیح نانّگا ایمان چانجیگ اینوگ سامّادنا، سکیودتے نگے کھانگپا جوگسا زاد۔“ کھوے نگاجا جُووا پھولین دوگسپا نگاجا گُون کھوے کھانگپا دوگسپین۔

حضرت پولُس تانگ سیلاس گُون زومس۔

16جاگشیگ نگاجا دُعا چوسے ناسّا چھوگسلا چھین یود زانے، نگاجا گُونلا ت شینا گ بوموجیگ تھوگ، کھوے نانّگا سیمسنید نگانپا یودچیسپوے کھوے میگونلا یونگچیسچانگونّی توسّی سکورلا سنگونکھیین تانگستے کھوے داگپوگونّی پھیا پینے مانگپو چوادپین۔ 17بوموبو حضرت پولُس تانگ نگاجے ستینگرانگنے یونگستے کُوچو تانگین زیرس، ” کھیود چان خُدے جابستوگپا اینکھانّی ای میگونّی کھیوجاگونلا تھارپے لامی سکورلا شادّانوگ۔“

18کھوے جاگدانگ تینّا ژوگس چوین دوگسپا، ستینگجوگا ماثانٹے سنانّگا تشیرتے حضرت پولُسی گیابلوگا زِیگس یانگ سیمسنید نگانپابوا مولس، ”نگے کھیورانّگا حضرت عیسیٰ مسیح مِنتخسی نانّگا کھوے نانگنے بینگستے یونگچیسلا کاتانّگاد۔“ تینّامالّا تے سیمسنید نگانپابو کھوے نانگنے بینگستے سونگ۔

19کھوے داگپوگونّی پینے چوچیسّی سکابس میدکھان چھاکھانبو ہاگواچیگ، کھونگونی حضرت پولُس تانگ سیلاس زومستے ٹھومسّی نانّگا وانگثولپاگونّی لدُونلا ٹُودین کھیرس۔ 20کھونگون شخ چوکان گونّی لدُونلا لیبّاچیگ اِزوک زیرس، ”ای یہُودی پاگون نگاتانگی گیالسے نانّگا یونگستے ہیلینگس پھینگدوگ، 21یانگ نگاتانگی رومپے شریعت نے گالکھانّی لام لوگثول ریگ نگاتانّگا لابدوگ“ ۔

22تیبو تشورّاچیگ میتشوگسّیانگ حضرت پولُس تانگ سیلاسّی گیابگال چوس، یانگ شخ چوکان گونّی کھونگ نییسکوا لجیرنیال پھودتے بیرگا تانگچیسّی کا تانگس۔ 23کھونگونلا بیرگا نیامپو ماثانٹے ردونگس یانگ تسونلا کاگستے تسونکھانگی سپونبوا گیالّا چوستے، ثونگچوگچیسلا کا تانگس۔ 24کا تانگسکھانبو تھوبّاچیگ، کھوے کھونگ نیسکو تشانگمیسانگ نانگکوگا یودکھانّی تسونکھانگی نانّگا کانگپاگون شینگی نانّگا چوگستے لدامستے بورس۔

25تشانپھیدلا حضرت پولُس تانگ سیلاس نیسکوے خُدا دُعا چوین، زبُور تانّگادپین، یانگ جان تسونپاگونّی کھونّگا نیانتے یودپین۔ 26ہونمیدلا سانگّول ٹاگپو یونگستے تسونکھانگی ماگلدانگون سکولس۔ تینّامالّا گھو تشانگما بے، یانگ تیرو یودکھانّی تسونپا تشانگمے لچاگتھاگون ڈولتے بُود۔ 27تسونکھانگی سپونبوا نییدتشاد یانگ کھوے تسونکھانگی گھوگون پھیستے تھونگ۔ تسونپا تشانگما شورتے میدکیاگ سامتے، کھوے رانگی رایَ پھینگستے رانگثوگ چادچیس چوس۔ 28حضرت پولُسی کُوچو تانگستے کھوا مولس، ”رانگی سروک ماچاد، نگاجا تشانگما ینیکانے یود۔“

29تسونکھانگی سپونبوے اوت کھیونگ زیرتے بودس یانگ کھو نانگکوگا بانگتانگستے سونگ یانگ داراینجیگ حضرت پولُس تانگ سیلاسّی لدُونلا گیل۔ 30کھوے کھونگون پھیلوگا کھیونگستے زیرس، ”سپونبولے نگے تھارپا تھوبچیسلا چی چوگوس؟“

31کھونگونی لانسالس، ”حضرت عیسیٰ مسیح یکا ایمان کھیونگ، تینے کھورانّگا تھارپا تھوبین، ماتشاد کھیرانگی کھانگپے نانّگا دوگکھانگونّانگ۔“ 32کھونگونی تسونکھانگی مالِک تانگ کھوے نانگمی گُونلا حضرت عیسیٰ مسیح سکورلا شادّا زادس۔ 33مِنتخسی تینّا توسلا تسونکھانگی سپونبوبوے کھونگون کھیرتے کھونگونی سماکھاگون غوتا، یانگ تینّا توسلا کھو تانگ کھوے نانگمی تشانگمے غوتا لینس۔ 34کھوے حضرت پولُس تانگ سیلاس کھورانگی کھانگپا کھیرتے دونتانگ پھولس، کھو تانگ کھوے نانگمی تشانگما سکیدپو سونگ چیازیرنا کھونگونی خُدے کا ایمان کھیونگس۔

35ناملانگسّاچیگ، شخ چوکان گونّی تسونکھانگی سپونبویکا ماگمیگون کالتے، ”کھونگون پھودّونگ“ زیرتے کا تانگس۔ 36تسونکھانگی سپونبوبوے حضرت پولُس جوس، ”شخ چوکان گونّی نییژا پھود زیرتے کا تانگستوگ۔ تا نییجاگون جیدے نیامپو سکیود۔“

37اِین نانگ حضرت پولُسی لانسالس، ”نگاجا رومپا اینتیانگ شخ چوکان گونّی نگاجیکا شریعت ماچادّا میگونّی لدُونلا نگاجا ردونگستے تسونکھانّگا کاگس۔ تا چی کھونگونی نگاجا سوانگ گیُوس چھا ماچوگّا پھودتانگین سامّانوگّا؟ نگاجا میچھا۔ کھورانگّون ایکا یونگستے، نگاجا تسونّے پھینگستے کھیرگوس۔“

38ماگمیگون سونگتے سپیراگون شادس یانگ حضرت پولُس تانگ سیلاس گُون رومپا اینکھانبو تشورتے شخ چوکان گُون ثانٹے جیگس۔ 39شخ چوکان گُون تسونکھانّگا یونگس یانگ حضرت پولُس تانگ سیلاس لا گونگسپا سالچیسلا جوس۔ کھونگون تسونّے پھیلوگا کھیرتے کھونگونلا گیالسانے بینگستے چھاچیسلا جُووا پھولس۔ 40حضرت پولُس تانگ سیلاس تسونکھانگنے بینگتے لیدیاے کھانگپا سکیودس، تیرو کھونگون فونو گون نیامپو تھوگتے کھونگونلا سپوسپا سالّا زادس، یانگ تے یولنے سکیودس۔

Currently Selected:

چھاگلاسگون 16: LBJNT

Highlight

Copy