Luka 22
22
O Juda manđol te izdol e Isuse
1Paše sasa o Prazniko e bikvasacose mangrenđe savo akhardol Pasha. 2E šorutne sveštenikura thaj e učitelja tare Mojsijaso zakon rodije sar te mudaren e Isuse, al darajle tare manuša te ni bunin pe.
3Tegani o Satana dija ano Juda Iskariotsko, savo sasa jekh tare dešuduj (12) apostolura. 4Vov đelo thaj vaćarda e šorutne sveštenikurencar thaj e hramese zapovednikurencar sar ka izdajil e Isuse. 5Von radujisajle thaj vaćarde e Judase kaj ka poćinen lese gova. 6O Juda pristanisada thaj rodija šukar vreme te predol e Isuse dok ni sesa gothe but manuša.
Angluno đive tare bikvasacose mangre
7Kana avilo o angluno đive taro Prazniko e bikvasacose mangrengo, ke savo trubuja te čhinol pe o pashalno bakroro, 8o Isus vaćarda e Petrese thaj e Jovanese: “Džan thaj ćeren amenđe pashalno xape te šaj te xa.”
9Von pučlje le: “Kaj manđe te ćera la?”
10O Isus vaćarda: “Kana ka den ano foro, ka araćhen manuše savo inđarol paj ano khoro. Džan pale leste ano ćher ane savo ka džal, 11thaj pučen gole ćherutne: ‘O učitelji pučol ane savi soba šaj xal i Pasha pe sikadencar?’
12Vov ka sikavol tumenđe bari upruni soba savi si postavimi. Gothe sa pripremin.”
13O Jovane thaj o Petar đele ano foro i arakhlje sa sar so vaćarda lenđe o Isus thaj gothe sa pripremisade o pashalno xape.
I Gospodnjo večera
14Kana avilo o sato, bešlo o Isus ko astali pe dešuduje (12) apostolurencar. 15Thaj o Isus phenda lenđe: “But mangljem te xav kaja Pasha tumencar angleder so ka avav mudardo. 16Golese vaćarav tumenđe kaj od akana ni ka xav i Pasha dok ni pherdol ano Carstvo e Devleso.”
17Pale gova lija o tahtaj e moljasa, dija hvala e Devlese thaj vaćarda: “Len kaja mol thaj ulaven la maškare tumende. 18Vaćarav tumenđe, od akana ni ka pijav mol sa dok ni avol o Carstvo e Devleso.”
19Pale gova lija o mangro, dija hvala e Devlese, phaglja le thaj ulada le e sikadenđe vaćarindoj: “Kava si mingro telo savo dol pe tumenđe. Kava ćeren te den tumen gođi mandar.” 20A palo xape lija o tahtaj e moljasa thaj vaćarda: “Kava tahtaj si nevo savez ane mingro rat savo čhordol tumenđe. 21A akh, mingro izdajniko bešol mancar kate ko astali. 22Thaj me, o Čhavo e manušeso, mora te merav sar so si phendo, al pharo e manušese savo ka izdol man!”
23Thaj e sikade lije maškar peste te pučen pe ko lendar bi ćerola gova.
Ko si embaro ano carstvo e Devleso
24E sikade lije te ćeren čingara maškare peste ko lendar si embaro.
25O Isus vaćarda lenđe: “E carura tare kava sveto vladin pire manušencar thaj isi len vlast pe lende. Von korkore pese vaćaren kaj si ‘manuša save but den šukaripe’. 26Al tumen ma ćeren gijate! Nego ko si tumendar embaro te avol emcikno, thaj ko vladil nek avol kova savo služil. 27Golese so, ko si pobaro? Kova savo bešol pašo astali il savo služil? Naj li kova savo bešol pašo astali? Al me sem maškar tumende kova savo služil. 28Tumen sen gola save ačhile mancar ane mingre iskušenjura. 29Me ačhavav tumenđe o carstvo sar so mingro Dad ačhada manđe 30te xan thaj te pijen ke mingro astali ane mingro carstvo thaj te bešen ko tron thaj te sudin e dešuduje (12) plemenuren e Izraelese.”
Ispunil pe ano Sveto lil so si pisimo taro Isus
(Mt 26,31–35; Mk 14,27–31; Jn 13,36–38)
31O Isus vaćarda: “Simone! Simone! Akh, o Satana manđol te sejil tumen sar so sejil pe o điv. 32Al me molisaljem tuće ćiro pačajipe ma te ačhol. A kana ka iri tut ke mande, te zurave ćire phralen!”
33O Petar phenda lese: “Gospode! Spremno sem ano phanglipe thaj ano meripe tusa te džav!”
34Al o Isus vaćarda lese: “Vaćarav tuće, Petre! Avđive ni ka đilabol o bašno dok tu trin droma ni vaćare kaj ni pindžare man.”
35Tegani vaćarda lenđe: “Kana bičhaldem tumen bize kese parencar thaj bize traste thaj bizo pođipe, so falisada tumenđe?”
Von phende: “Khanči.”
36O Isus vaćarda lenđe: “Al akana kas isi kesa e parencar, nek lol la! Gijate i piri trasta! A kas naj mačo nek biknol pe šeja thaj nek ćinol pese. 37Golese vaćarav tumenđe kaj trubul te pherdol kova so si pisimo mandar ano Sveto lil:
‘Dikhlje le sar jekhe tare kola save phađen o zakon.’
Golese ka avol čače sa so sasa pisimo mandar.”
38Al e sikade phende: “Gospode! Akh, isi amen duj mačura.”
O Isus vaćarda lenđe: “Dosta si!”
O Isus molil pe ki Maslinsko gora
(Mt 26,36–46; Mk 14,32–42)
39Iklindoj gothar, pale piro adeti, đelo o Isus ko Maslinsko brego. Lese sikade đele pale leste.
40Kana resle, o Isus vaćarda lenđe: “Molin tumen te ma peren ano iskušenje!”
41Pale gova crdija pe lendar gaći kobor šaj te čhudol pe o bar thaj pelo ke pe koča thaj molisajlo e Devlese: 42“Dade! Te mangljan le mandar te ma pijav kava tahtaj tari patnja. Al nek avol sar tu so manđe, a na sar so me mangav.”
43Tegani sikadilo lese o anđelo taro nebo thaj zurada le. 44A kana dolda le bari muka, but pozurale molisajlo, a leso znoj sasa sar kaplje taro rat save perena ki phuv.#22,44 Ane nesave purane grčka rukopisura naj 43․ i 44․ stiho.
45Pali molitva uštilo thaj avilo ke pe sikade thaj arakhlja len sar soven taro pharipe kobor sasa lenđe. 46O Isus pučlja len: “Sose soven? Ušten, molin tumen e Devlese te ma peren ano iskušenje!”
O Juda izdol e Isuse
(Mt 26,47–56; Mk 14,43–50; Jn 18,3–11)
47Dok o Isus vaćarda, e manuša thaj o Juda, jekh tare dešuduj (12) sikade, avena premal leste. O Juda avilo pašo Isus thaj čumidija le. 48O Isus pučlja le: “Judo! Čumidimasa li izdaji, man, e Čhave e manušese?”
49Kana e sikade dikhlje so ćerdol, vaćarde: “Gospode! Te mara amen e mačurencar?”
50Thaj jekh lendar čalada e bare sveštenikose sluga thaj čhinda leso desno kan.
51Al o Isus vaćarda: “Mućhen len! Dosta!” A dolda leso kan thaj sastarda le.
52Tegani o Isus vaćarda e manušenđe so avile pale leste, e šorutne sveštenikurenđe, e zapovednikurenđe e hramese thaj e starešinenđe: “Aviljen pale mande sar palo razbojniko, čhurencar thaj kaštencar te dolen man! 53Sose ni dolden man dok sema ano Hram? Svako đive sema tumencar odori. Al akana si tumaro sato – kana vladil o kalipe.”
O Petar odreknil pe taro Isus
(Mt 26,57–58, 69–75; Mk 14,53–54, 66–72; Jn 18,12–18, 25–27)
54Kana dolde e Isuse, inđarde le ano ćher e bare sveštenikoso. O Petar odural đelo pale lende. 55E stražara phabarde jag ani avlin thaj bešle savore katane. Thaj o Petar bešlo lencar.
56Dikhlja le jekh sluškinja sar bešol paši jag thaj dikhlja premal leste thaj vaćarda: “Kava sasa lesa!”
57Al o Petar xoxada vaćarindoj: “Džuvlije! Me ni pindžarav le!”
58Nekobor pale gova pindžarda le aver thaj vaćarda: “Tu san jekh lendar!”
Al o Petar phenda: “Manušeja, naj sem!”
59Thaj kana nakhlo paše jekh sato, nesavo manuš uporno vaćarda taro Petar: “Čače thaj kava manuš sasa lesa golese so si Galilejco!”
60Al o Petar vaćarda: “Manušeja! Ni džanav so tu phene!”
Thaj sigate dok vov vaćarda, o bašno đilabija. 61Tegani irisajlo o Gospod thaj dikhlja e Petre, a o Petar dija pe gođi so vaćarda lese o Gospod: “Avđive, angleder so o bašno ka đilabol, trin droma ka vaćare kaj ni pindžare man.” 62O Petar iklilo avral thaj zurale ruja.
E čuvara maren muj e Isusesa
(Mt 26,67–68; Mk 14,65)
63A e čuvara lije te maren e Isuse thaj te maren lesa muj.
64Učharde lese jakha thaj pučlje le: “Prorokuji, ko čalada tut?”
65Thaj but avera bilačhe lafura vaćarde lestar.
O Isus angle jevrejska šorutne
(Mt 26,59–66; Mk 14,55–64; Jn 18,19–24)
66Kana sasa sabalin, ćidije pe e manušenđe starešine, e šorutne sveštenikura thaj e učitelja tare Mojsijaso zakon. Ande e Isuse anglo Baro sudo 67vaćarindoj: “Tu li san o Hrist? Vaćar amenđe gova!”
O Isus phenda lenđe: “Te vaćardem tumenđe, ni ka pačan man. 68Te pučljem tumen khanči, ni ka phenen manđe. 69Al od akana me, o Čhavo e manušeso, ka bešav ki desno rig ko počasno than e Zurale Devlese.”
70Pe gova savore pučlje: “Tu li san, čače, o Čhavo e Devleso?”
O Isus phenda: “Gija si sar tumen vaćaren. Me sem.”
71Tegani von vaćarde: “So trubul amen pobut dokazura? Golese so korkore amen šundam tare leso muj!”
Currently Selected:
Luka 22: GSP
Highlight
Share
Copy
Want to have your highlights saved across all your devices? Sign up or sign in
