Sudije 18
18
O Mihej thaj e Daneso pleme
1Ane gova vreme ano Izrael vadži ni sasa caro. Tegani e Daneso pleme rodola pese than kaj te bešen, golese so vadži ni dobisade nasledstvo maškare Izraelska plemenura. 2Golese e Danovcura bičhalde andari Cora thaj andaro Eštaol pandže ratnikuren, predstavnikuren tare lengo pleme, te dićhen i phuv thaj te istražuin la.
Phende lenđe: “Džan thaj istražuin i phuv.”
Gija von đele ane Efremese bregura, avile dži e Mihejeso ćher thaj gothe i sute.
3Kana sesa paše e Mihejeso ćher, pindžarde o glaso kole terne Leviteso, golese đele dži leste thaj pučlje le: “Ko anda tut kate? So ćere kate? Sose san kate?”
4O Levito phenda lenđe sa so o Mihej ćerda baše leste: “Vov poćinda man te avav leso svešteniko.”
5Tegani von phende lese: “Amen moli tut te puče e Devle dal amaro drom ka avol uspešno.”
6O svešteniko phenda lenđe: “Džan ano miro! O GOSPOD mućhol tumen te džan ko kava drom.”
7Kola pandž džene đele thaj resle ano Laiš. Odori dikhlje so gola manuša živin spokojno sar e Sidoncura, mirno thaj bizi briga. Sesa barvale golese so ani phuv khanči ni falisada lenđe. Bešena dur tare Sidoncura thaj ni sasa len khanči nikasa.
8Kana kola pandž manuša irisajle ani Cora thaj ano Eštaol, lenđe phrala pučlje len: “So dodžangljen?”
9Von phende lenđe: “Spremin tumen, te dža te čalava pe lende! I phuv savi dikhljam but si šukar. Dal ka bešen phangle vastencar? Ma mislin tumen, džan odori thaj prelen goja phuv! 10Kana ka resen, ka araćhen narodo bizi briga thaj bari phuv sava o Dol dija ane tumare vasta, phuv ani savi khanči ni falil.”
11Tegani šovšel (600) naoružime manuša andare Daneso pleme đele andari Cora thaj andaro Eštaol. 12Ke pumaro drom ćerde logori pašo Kirjat-Jearim, ani phuv i Juda, pa golese gova than zapadno taro Kirjat-Jearim i avđive akhardol Mahaneh-Dan.#18,12 Mahaneh-Dan značil: “E Daneso logori.” 13Gothar đele podur ke Efremese bregura thaj resle dži ko ćher e Mihejeso.
14Tegani kola pandž džene save đele te istražuin i phuv ano Laiš, vaćarde pe phralenđe: “Džanen li kaj ane jekh tare kala ćhera isi prsluko, ćherutne dolura thaj rezime kipo učhardo srebrosa? Akana džanen so trubul te ćeren.”
15Gija von đele taro drom thaj avile dži ko ćher e Mihejeso kaj bešola o terno Levito, thaj pozdravisade le. 16Šovšel (600) naoružime Danovcura ačhile angli kapija, 17a kola pandž džene save sesa te dićhen i phuv, đele andre thaj lije o rezime kipo učhardo srebrosa, o svešteničko prsluko thaj e ćherutne devlen. A o svešteniko ačhilo kole šovšele naoružime manušencar angli kapija.
18Kana kala đele ano ćher e Mihejeso, lije o rezime kipo učhardo srebrosa, o svešteničko prsluko thaj e ćherutne devlen, o svešteniko pučlja len: “So ćeren gova?”
19Von phende lese: “Ćuti! Ni lafi ma te vaćare! Pođi amencar, ava amaro dad thaj amaro svešteniko. So si tuće pošukar, te ave svešteniko ano ćher jekhe manušeso, il te ave svešteniko jekhe izraelskone plemeso ane savo isi but familije?”
20Gova sasa šukar e sveštenikose, thaj vov lija o svešteničko prsluko, e ćherutne devlen, o rezime kipo thaj đelo e manušencar. 21O narodo irisajlo thaj đelo pe dromesa. Anglal mukhlje te džan e čhavore thaj e životinje, katane sa e barvalimasa so sasa len. 22Kana sesa dur taro ćher e Mihejeso, ćidije pe e manuša save bešle ane ćhera pašo ćher e Mihejeso, thaj resle e Danovcuren.
23Dije vika pale lende, a e Danovcura okrenisajle thaj pučlje e Miheje: “So si tusa? Sose ćidijen tumen?”
24O Mihej phenda lenđe: “Lijen e devlen save ćerdem thaj lijen me svešteniko, pa đeljen. So ačhilo man vadži? Sar šaj te pučen man: ‘So si mancar?’”
25E Danovcura phende lese: “Ma vazde ćo glaso. Maškar amende isi holjame manuša save bi šajine te napadin tut, tegani bi i tu thaj ći familija hasarena tumaro džuvdipe.”
26Tegani e Danovcura đele pe dromesa. Thaj kana o Mihej dikhlja kaj von si pozurale lestar, irisajlo thaj đelo ćhere.
27Tegani e Danovcura lije kova so ćerda o Mihej thaj lese svešteniko, thaj đele ano Laiš. Gothe čalade pe manuša save sesa mirna thaj bizi briga, mudarde len mačurencar a o foro phabarde. 28Ni sasa khoni te avol lenđe ano pomoć golese so sesa dur taro foro Sidon thaj ni sasa len nikasa khanči. O foro sasa ani dolina paše o foro Bet-Rehov. Pale gova e Danovcura palem vazdije o foro thaj gothe lije te bešen. 29O foro akharde Dan, palo alav lenđe paradadeso, savo sasa čhavo e Jakoveso. Angleder gova, o foro akhardola Laiš.
30E Danovcura čhute pese kova rezime kipo, a o Jonatan, e Geršomeso čhavo, e Mojsijaso unuko, thaj e Jonatanese čhave sesa sveštenikura bašo pleme e Daneso sa dži kaj o narodo ni sesa inđardo ano ropstvo. 31O rezime kipo savo ćerda o Mihej, ačhilo gothe sa dži kaj e Devleso šatori sasa ano Šilo.
Currently Selected:
Sudije 18: GSP
Highlight
Copy
Compare
Share
Want to have your highlights saved across all your devices? Sign up or sign in
